Read Fulfulded Alkaali'en 1 Bible Online

Alkaali'en 1 - Fulfulded bible

Alkaali'en 1

¹Ɓaawo maayde Yosuwa, Isra'iila'en ƴami Jawmiraawo: “Lenyol ngole nder le'i amin aartata yahugo haa Kanaani'en ngam haɓugo bee maɓɓe?”

²Jawmiraawo jaabi: “Lenyol Yahuuda aarta yahugo. Mi hokki ngol lesdi man.”

³Yimɓe Yahuuda mbi'i yimɓe Simeyon banndiraaɓe muuɗum'en: “En njahda haa geɗal lesdi ngal laatani min, en kaɓa bee Kanaani'en. Nden minin boo min njahdan bee mooɗon haa geɗal mon.” Nden yimɓe lenyol Simeyon kawti bee lenyol Yahuuda.

⁴Nden ɓe ndilli haɓoygo bee maɓɓe. Jawmiraawo hokki ɓe Kanaani'en e Perezzi'en. Ɓe mbari worɓe ujine sappo (10.000) haa Bezek.

⁵Nder berniwol ngo'ol, ɓe tawi Adoni-Bezek, ɓe kaɓi bee maako, ɓe njaali Kanaani'en e Perezzi'en.

⁶Adoni-Bezek doggi, ammaa ɓe taasni mo, ɓe naŋngi mo, ɓe ta'i mo kooli gorɗi, juuɗe e kosɗe fuu.

⁷Nden o wi'i: “Laamiiɓe cappanɗe njoweeɗiɗo ta'aaɓe kooli gorɗi, juuɗe e kosɗe ɗonno cuɓta piccite colɗe les taabal am. Jonta Allah waatani yam bana kuuwmi ɓe!” Kadiboo ɓe njahri laamiiɗo oo haa Urusaliima haa o maayi ton.

⁸Yimɓe Yahuuda kippi berniwol Urusaliima, ɓe nyaami ngol, ɓe mbari wonɓe ton bee kaafahi, ɓe nguli ngol.

⁹Ɓaawo man ɓe ndiirti haa lesdi kooseeje, Lesdi Fombina e haa lesdi towndiije ngam haɓugo bee Kanaani'en.

¹⁰Ɓe ummini konu dow jooɗiiɓe haa Heburuun, ɓooyma ɓe ɗonno mbi'a berniwol ngol: Kiriyat-Arba. Ton ɓe mbari Sesay e Akiman e Talmay.

¹¹Ɓe ummi ton ɓe ndilli ɓe kippi jooɗiiɓe haa Debir, ɓooyma ɓe ɗonno mbi'a berniwol ngol: Kiriyat-Sefer.

¹²Kaaleb wi'i: “Mi te'nan Aksa ɓiyam debbo haa mo jaali, nyaami Kiriyat-Sefer.”

¹³Otniyel ɓii Kenas, minyiraawo Kaaleb, nyaami ngol. Kaaleb te'ni mo Aksa ɓiyum debbo.

¹⁴Nde o yotti haa kommbi Otniyel, o ɓilli mo, o toro baaba maako ngesa, ɓaawo man o jippi wamnde maako, Kaaleb ƴami mo ko o yiɗi.

¹⁵O jaabi: “Yerdanam ko mi toroto ma. A hokki yam Lesdi Fombina[1] njoorndi, hokkam ceeɓooje ndiyam boo.” Ngam maajum Kaaleb hokki mo seeɓoore haa dow hooseere e seeɓoore haa les maare.

¹⁶Keni'en, asŋgol esiraawo Muusa, ummodi diga Berniwol-Dibinooje, bee yimɓe Yahuuda, ɓe ngari ɓe njooɗi haa ladde hamaadaare fombina lesdi Yahuuda, haa fombina Arat. Ɓe njehi ɓe njooɗi caka ummaatoore Amaleki'en.

¹⁷Yimɓe Yahuuda njahdi bee yimɓe lenyol Simeyon deerɗiraawo Yahuuda, ɓe kaɓi bee Kanaani'en jooɗiiɓe haa Safat, ɓe njaali ɓe. Ɓe nattini berniwol man, ɓe inndi ngol Horma bana wi'ugo nattere.

¹⁸Ɓaawo man yimɓe Yahuuda nyaami berniiji ɗi'i: Gaaza, Askalon e Ekuruun e non boo gure taariiɗe berniiji ɗin.

¹⁹Jawmiraawo ɗonno wondi bee maɓɓe, ɓe nyaami lesdi kooseeje. Ammaa ɓe mbaawaay riiwugo jooɗiiɓe haa waadiiji, ngam yimɓe man ɗonno bee mootaaji njamɗe bee pucci.

²⁰Ɓe ndokki Heburuun haa Kaaleb bana Muusa umruno, Kaaleb riiwi ɓiɓɓe Enak tato jooɗinooɓe ton.

²¹Ammaa yimɓe Benyamin ndiiwaay Yebusi'en jooɗinooɓe haa Urusaliima e haa hannde yimɓe ɓe ɗon njooɗodi bee yimɓe Benyamin.

²²Yimɓe danygol Yusufu, ndilli honugo Baytila, Jawmiraawo wondi bee maɓɓe.

²³Ɓe aarti nelugo yimɓe ngam horoygo berniwol bi'eteeŋgol Luus ɓooyma.

²⁴Horooɓe ngi'i goɗɗo gurtiiɗo ngol. Ɓe mbi'i mo: “Hollu min no min nastirta berniwol ngol, nden kam min mboonante.”

²⁵Goɗɗo oo holli ɓe pellel nastugo. Bana nii yimɓe danygol Yusufu mbardi yimɓe berniwol man bee kaafahi. Ammaa ɓe acci goɗɗo go dilli jam bee saare muuɗum fuu.

²⁶Goɗɗo oo dilli jooɗi haa lesdi Heti'en, o mahi berniwol, o inndi ngol Luus, ɗum laati innde maagol haa wargo hannde.

²⁷Yimɓe Manassa ndiiwaay yimɓe Bayti-Se'an e Ta'anak Door e Yible'am e Megiddo e jooɗiiɓe haa gure taariiɗe berniiji ɗi'i. Kanaani'en kasdi jooɗaago nder lesdi man.

²⁸Nde Isra'iila'en ɓesdi semmbe, ɓe laatini Kanaani'en maccuɓe maɓɓe, ɓe ndiiwaay ɓe fuu.

²⁹Yimɓe Efrayim boo ndiiwaay Kanaani'en jooɗiiɓe haa Gezer. Yimɓe ɓe tokki jooɗaago caka yimɓe Efrayim haa ton.

³⁰Yimɓe Zabulon ndiiwaay Kanaani'en jooɗiiɓe haa Kitiron e Nahalol. Yimɓe ɓe'e tokki jooɗaago caka maɓɓe. Yimɓe lenyol Zabulon laatini ɓe maccuɓe muuɗum'en.

³¹Yimɓe Aser ndiiwaay jooɗiiɓe haa Akko e Sidon e Ahalab e Akizib e Helba e Afik e Rehob.

³²Ngam maajum ɓe njooɗi caka Kanaani'en jooɗiiɓe haa lesdi man.

³³Yimɓe Neftali ndiiwaay Kanaani'en jooɗiiɓe haa Bayti-Semes e Bayti-Anat. Ɓe njooɗodi haa lesdi man, ammaa ɓe laatini ɓe maccuɓe maɓɓe.

³⁴Amoori'en ngerɓi yimɓe Dan haa gal hooseere, ɓe nduŋanaaki ɓe jippaago nder waadiwol.

³⁵Amoori'en tokki jooɗaago haa Eloon e Saalbiima, non boo haa hooseere Heres. Ammaa yimɓe Yusufu laamani ɓe bee caatal, ɓe laatini ɓe maccuɓe maɓɓe.

³⁶Keerol Amoori'en yehi diga wa'orde Akrabbiima, diga Sala haa yahugo dow.