Read Fulfulded Alkaali'en 11 Bible Online

Alkaali'en 11 - Fulfulded bible

Alkaali'en 11

¹Woodino konoowo cemmbiɗɗo nder Gile'at, bi'eteeɗo Yefta, ɓii debbo daakaareejo e baaba maako wi'ete Gile'at.

²Debbo Gile'at boo danyani mo ɓiɓɓe worɓe. Nde ɓe mawni, ɓe ndiiwi Yefta bee wi'ugo mo: “A walaa geɗal maral nder maral saare baaba amin, ngam a ɓii debbo feere.”

³Nden Yefta doggi daayiiɗum diga deerɗiraaɓe muuɗum, o jooɗoyi haa lesdi Tooba. Meere'en ngari mooɓti kommbi maako e ɓe tokki mo, ɓe njahdi hippugo lesdi.

⁴Wakkati seɗɗa ɓaawoɗon, Ammooni'en ngari honugo Isra'iila.

⁵Saa'i maajum, ndotti'en Gile'at njehi ɗaɓɓitoygo Yefta nder lesdi Tooba.

⁶Ɓe mbi'i mo: “War, laata ardiiɗo amin, en kaɓa bee Ammooni'en.”

⁷Yefta jaabi ndotti'en Gile'at: “Naane on nganyi yam haa on ndiiwi yam e saare baaba am. Ngam ɗume ngarɗon jonta nde on nasti ɓillaare?”

⁸Ndotti'en mbi'i mo: “Gooŋga min ngaylitake haa maaɗa jonta. Min ngiɗi a yahda bee amin, en kaɓa bee Ammooni'en e a laato hooreejo jooɗiiɓe Gile'at fuu.”

⁹Yefta jaabi ɓe: “To on koori yam ngam haɓugo bee Ammooni'en, to Jawmiraawo hokki yam ɓe, nden kam mi laatoto hooreejo mon.”

¹⁰Ndotti'en Gile'at mbi'i Yefta: “Jawmiraawo woni ceedoowo hakkunde meeɗen, min mbaɗan ko a wi'i min.”

¹¹Nden Yefta yahdi bee maɓɓe. Yimɓe Gile'at mbaɗi mo hooreejo e ardiiɗo konu muuɗum'en. Yefta wolwi haala muuɗum fuu yeeso Jawmiraawo haa Mispa.

¹²Ɓaawo man Yefta neli nelaaɓe haa laamiiɗo Ammooni'en, o wi'i: “Ko yaali yam bee maaɗa? Ngam ɗume ngarɗa haɓugo bee am nder lesdi am?”

¹³Laamiiɗo Ammooni'en jaabi nelaaɓe Yefta: “Wakkati Isra'iila'en ngurti lesdi Misra, ɓe nyaami lesdi am, diga maayo Arnon haa yotti Yabbok e Urdun. Lornan min geɓe lesɗe ɗe jonta bee hakkiilo ma!”

¹⁴Fahin Yefta neli nelaaɓe haa laamiiɗo Ammooni'en,

¹⁵ngam wi'ugo mo: “Isra'iila'en nyaamaay lesdi Mo'ab e ndi Ammooni'en.

¹⁶Ngam nde ɓe ummi lesdi Misra, ɓe caali gal ladde hamaadaare haa yotti maayo Maaliya, nden ɓe ndilli Kaades.

¹⁷Diga ton, ɓe neli nelaaɓe haa laamiiɗo Edoom ngam ƴamugo mo duŋayeere saalaago nder lesdi maako. Ammaa laamiiɗo man yerdanaaki ɓe. Isra'iila'en ƴami boo laamiiɗo Mo'ab, kaŋko boo o sali. Nden ɓe njooɗi haa Kaades.

¹⁸Ɓaawo man ɓe tokkitini jahaaŋgal maɓɓe gal ladde hamaadaare, ɓe mbiddi lesdi Edoom e lesdi Mo'ab, ɓe ngari diga fuunaaŋge gal lesdi Mo'ab. Ɓe caŋngini gaɗa maayo Arnon, ɓe nastaay lesdi Mo'abi'en, Arnon woni keerol lesdi man.

¹⁹Diga ton, Isra'iila'en neli nelaaɓe haa Sihon, laamiiɗo Amoori'en haa Hesbon, ɓe mbi'a mo: Accu min caalo nder lesdi ma haa min njotto lesdi amin.

²⁰Ammaa Sihon hoolaaki Isra'iila'en, o duŋanaaki ɓe ɓe caalo nder lesdi maako. O mooɓti yimɓe maako fuu, ɓe caŋngini haa Yahas. Nden o haɓi bee Isra'iila'en.

²¹Jawmiraawo Allah Isra'iila'en hokki Sihon e jama'aare konu mum fuu haa Isra'iila'en, ɓe njaali ɓe. Isra'iila'en mari lesdi ndi Amoori'en njooɗino fuu,

²²diga waadiwol Arnon haa yotti maayo Yabbok e diga ladde hamaadaare gal fuunaaŋge haa yotti Urdun.

²³Ɗum Jawmiraawo Allah Isra'iila'en nyaami lesdi Amoori'en yeeso Isra'iila ummaatoore muuɗum, an a yiɗi jaɓtugo ndi na?

²⁴Naa an mari lesdi koo ndiye ndi Kemos ɗowanteeɗo ma marni ma na? Bana non, minin boo min maran lesdi koo ndiye ndi Jawmiraawo Allah amin riiwi yimɓe maari yeeso amin, min nyaami ndi.

²⁵A ɗon tammo a ɓuri Balak, ɓii Cippor, laamiiɗo Mo'ab semmbe na? Kaŋko ma o meeɗaay jokkirgo bee Isra'iila, ummaatoore Allah e o meeɗaay haɓugo bee maɓɓe boo.

²⁶Duuɓi teemeɗɗe tati (300) Isra'iila'en ɗonno njooɗi haa Hesbon e gure maagol, haa Aro'er e gure maagol, non boo haa berniiji haa fomoonde maayo Arnon fuu. Diga saa'i man, ngam ɗume on koocitaay lesɗe ɗe haa juuɗe maɓɓe?

²⁷Aa'a, min mi waɗaay ma aybe[15] sam, ammaa an a ɗon waɗanammi kalluɗum, ngam a ɗon ɗaɓɓa haɓre bee am. Jawmiraawo woni kiitoowo, sey o hiito hannde hakkunde Isra'iila'en e Ammooni'en!”

²⁸Ammaa laamiiɗo Ammooni'en jaɓaay bolle Yefta ɗe o neldi mo.

²⁹Ruuhu Jawmiraawo wari dow Yefta, o saali nder lesdi Gile'at e Manassa, nden o dilli Mispa nder lesdi Gile'at, o saali nder lesdi Ammooni'en.

³⁰Yefta togani Jawmiraawo togayeere, o wi'i: “To a hokki yam Ammooni'en ɓe'e,

³¹to mi jaalake ɓe, mi warti jam, mi lii'ante koo moy aarti wurtaago diga saare am ngam jaɓɓaago yam bana guleteeŋga.”

³²Nden o saali keerol Ammooni'en ngam o haɓa bee maɓɓe. Jawmiraawo hokki mo ɓe.

³³O jaali ɓe diga Aro'er haa yotti Minnit, berniiji noogas, haa yotti Abel-Keramiima boo. Isra'iila'en mbari Ammooni'en ɗuuɗɓe masin. Bana nii Ammooni'en leestiri yeeso Isra'iila'en.

³⁴Nde Yefta warti saare mum haa Mispa, ndaa, ɓiyiiko debbo wurti ngam jaɓɓaago mo, o ɗon wama, o ɗon fiya mbaggu. O bajjo Yefta, walaa ɓiɗɗo feere, koo gorko, koo debbo.

³⁵Nde Yefta yi'i mo, o seeki limce maako, o wi'i: “Kayto, ɓiŋngel am! A nastini yam boneeji naawɗi masin! Ngam ɗume laatiiɗa caka torranɓe ɓernde am? Min mi togani Jawmiraawo togayeere, mi waawataa faasititgo!”

³⁶Ɓiɗɗo maako jaabi mo: “Baaba am, to a toganake Jawmiraawo togayeere, waɗam ko togiiɗa, Jawmiraawo hokki ma a waato konne'en ma Ammooni'en.”

³⁷Nden o wi'i baaba maako: “Mi ɗon toro ma huunde woore tan: Accam lebbi ɗiɗi, mi yaha dow kooseeje, min e sappiraaɓe am, min mboya paanyaaku am, nde nii mi anndaa gorko.”

³⁸Yefta wi'i: Yah kadi! Nden o duŋani mo dillugo jooɗo lebbi ɗiɗi. O yehi, kaŋko e sappiraaɓe maako, o woyi paanyaaku maako dow kooseeje.

³⁹Nde lebbi ɗiɗi timmi, o warti haa baaba maako. Kaŋko o waɗi mo ko o togani Jawmiraawo. Paanyo oo meeɗaay anndugo gorko. Diga wakkati man al'aada ka fuɗɗi nder Isra'iila.

⁴⁰Hitaande fuu nyalɗe nayi ɓiɓɓe rewɓe Isra'iila'en njahata woyugo ɓii Yefta mo Gile'at.