Read Fulfulded Alkaali'en 16 Bible Online

Alkaali'en 16 - Fulfulded bible

Alkaali'en 16

¹Nyannde feere, Samson yehi Gaaza. O fotti bee debbo daakaareejo ton, o waaldi bee maako.

²Yimɓe Gaaza nani Samson ɗon ton. Ɓe taari mo, ɓe mbaɗi baaltol haa dammugal berniwol jemmaare man fuu. Ammaa walaa ko ɓe mbaɗi Samson jemmaare man, ɓe mbi'i: “En ndeena haa fajiri nden en mbara mo.”

³Samson waali, ammaa caka jemma o ummi. O naŋngi pareeje dammugal berniwol bee daŋraŋge maaje ɗiɗi fuu. O ɗoofi daŋraŋge bee palduŋgal dammugal, o hoo'i ɗum fuu dow balbe maako, o roondi ɗum haa dow hooseere tiitotirnde bee Heburuun.

⁴Ɓaawo man Samson fuɗɗi yiɗugo debbo bi'eteeɗo Deliila, jooɗiiɗo haa waadiwol Soorek.

⁵Laamiiɓe Filisti'en njowo ngari mbi'i Deliila: “Ƴoyru Samson o anndine haa o heɓi semmbe fantunde nde'e. E no goɗɗo heɓrata naŋngugo mo. Bana nii min mbaawan haɓɓugo mo, min tampina mo. Koo moy amin hokkete ceede cardi ujineere e teemerre (1.100).”

⁶Nden Deliila ƴami Samson: “Useni anndinam haa keɓata semmbe fantunde nde'e. Bee ɗume goɗɗo haɓɓete ngam tampingo semmbe ma?”

⁷Samson jaabi mo: “To ɓe kaɓɓi yam bee jiriiji kecci joweeɗiɗi ɗi ciwaa yoorugo, mi tampan, mi laatoto bana yimɓe fuu mba'i.”

⁸Laamiiɓe Filisti'en ngaddani Deliila jiriiji kecci joweeɗiɗi ɗi njooraay tawon. O haɓɓi Samson bee maaji.

⁹Deliila nyukkinino yimɓe nder suudu cakaaru. Nden o wooki, o wi'i: “Samson, Filisti'en ngari naŋngugo ma!” Samson ta'i jiriiji go bana ɓoggol gulaaŋgol. Bana nii walaa mo heɓti sirri semmbe maako.

¹⁰Deliila wi'i Samson: “A janci yam bee fewugo yam. Jonta kam yeccam no goɗɗo waawrata haɓɓugo ma.”

¹¹O jaabi mo: “To ɓe kaɓɓiri yam ɓoggi kesi ɗi kuuwtiniraaka tawon, mi tampan, mi laatoto boo bana yimɓe fuu mba'i.”

¹²Deliila hoo'i ɓoggi kesi, haɓɓi Samson bee maaji. Nden o wooki: “Samson, Filisti'en ngari naŋngugo ma!” Saa'i man worɓe woɗɓe ɗon mbaaltani mo haa nder suudu cakaaru. Ammaa Samson ta'i ɓoggi man haa juuɗe muuɗum bana gaaraaji.

¹³Deliila wi'i Samson: “A janci yam kadiboo bee fewugo yam. Jonta kam, gooŋga anndinam no goɗɗo waawrata haɓɓugo ma.” Samson jaabi mo: “To a wamindiri bami gaasa hoore am joweeɗiɗi bee gaaraaji geesaaɗi, a tiggi ɗum bee tiggirgal nder cannyirɗum, nden kam mi tampan, mi laatoto bana yimɓe fuu mba'i.”

¹⁴Deliila esti Samson ɗaani, o hoo'i bami gaasa hoore maako joweeɗiɗi, o wamindiri ɗi bee gaaraaji geesaaɗi, o tiggi ɗum bee tiggirgal haa nder cannyirɗum. Nden o wooki: “Samson, Filisti'en ngari naŋngugo ma!” Samson fini, o ɗoofi tiggirgal bee gaaraaji e cannyirɗum man fuu.

¹⁵Deliila wi'i Samson: “Ɗume tabitinta a yiɗi yam, alhaali boo a hoolaaki yam? Ndaa a janci yam nde tati e a sali boo anndingo yam haa keɓata semmbe fantunde nde'e.”

¹⁶Bana nii o tokkori Samson bee haala man nyalɗe fuu, haa Samson somi, waawaay munyango ɗum.

¹⁷Nden o wi'i Deliila: “Gaasa hoore am meeɗaay laɓeego, ngam mi cenaaɗo Allah diga nyalaade danyeeki am. To mi laɓi, semmbe am accatam, mi tampan, mi laatoto bana yimɓe fuu mba'i.”

¹⁸Nde Deliila anndi Samson wi'i mo gooŋga, o neli ewnaago laamiiɓe Filisti'en, o wi'i: “Ngare jonta, ngam o yecci yam gooŋga.” Laamiiɓe Filisti'en ngari, ɓe ngaddi ceede go boo.

¹⁹Deliila wallini hoore Samson dow koppi mum haa o ɗaano. Nden o ewni goɗɗo ngam ta'ugo bami gaasa Samson joweeɗiɗi. Deliila fuɗɗi doolugo Samson, ngam semmbe maako majjiri mo.

²⁰Deliila wooki: “Samson, Filisti'en ngari naŋngugo ma!” Samson fini, tammi o hisan bana foroy, ngam o anndaa Jawmiraawo acci wallugo mo.

²¹Filisti'en naŋngi mo, ɗoppiti gite maako. Nden ɓe njahri mo haa Gaaza. Ɓe kaɓɓi mo bee callalluuji njamndi mboɗeeri, ɓe ndooli mo namugo alkamaari nder fursina[20].

²²Ammaa gaasa hoore maako fuɗi fahin.

²³Nyannde feere laamiiɓe Filisti'en mooɓi ngam waɗugo juulde jaalorgal muuɗum'en e lii'anaago ɗowanteeɗo muuɗum'en bi'eteeɗo Daagon kirseteeŋga maŋnga. Ɓe ɗonno ngima: “Ɗowanteeɗo meeɗen hokki en konneejo men Samson.”

²⁴Ummaatoore laari Samson, ɓe teddini ɗowanteeɓe maɓɓe ɓe mbi'i: “Ɗowanteeɗo meeɗen hokki en konneejo men. Kaŋko o wonni lesdi, o mbari ɗuuɗɓe nder ummaatoore meeɗen.”

²⁵Nde ɓerɗe maɓɓe ɗon ceyi, ɓe mbi'i: “Ngurtine Samson haa min pijira mo!” Ɓe ngurtini Samson nder fursina, ɓe pijiri mo. Nden ɓe ndarni mo caka daŋraŋge suudu, Daagon,

²⁶o wi'i derkeejo mo ɗon ɗowa mo: “Ɗowam haa mi meema daŋraŋge doondiiɗe suudu ndu, haa mi ɓaaro ɗe.”

²⁷Suudu man heewi worɓe e rewɓe, laamiiɓe Filisti'en njowo fuu ɗon ton, dow soorowol boo yimɓe ujine tato (3.000). Ɓe fuu ɓe ɗon ndaara no Samson seyniri ɓe.

²⁸Nden Samson tori Jawmiraawo: “Yaa Allah Jawmiraawo, siftoram, hokkitam semmbe am ngam saa'iire nde'e tan, haa mi waato Filisti'en nde woore ngam gite am ɗiɗi.”

²⁹Ɓaawo man o naŋngi daŋraŋge cakaaje ɗiɗi, doondiiɗe suudu fuu. O meemi nga'al bee nyaamo maako, ngala boo bee nano maako.

³⁰O hooli: “Sey Filisti'en maayda bee am!” Nden o yerɓi bee semmbe maako fuu. Suudu yibbi dow laamiiɓe e yimɓe wonɓe nder maaru fuu. Mbaraaɓe Samson nder maayde muuɗum ɓuri ɗuuɗugo dow mbaraaɓe muuɗum nder wakkati ngeendam muuɗum.

³¹Deerɗiraaɓe maako e banndiraaɓe maako woɗɓe ngari, kooci ɓanndu maako. Ɓe uwi mo hakkunde Cor'a e Estawol nder yenaande Manooha, baaba maako. Samson laatino alkaaliijo Isra'iila duuɓi noogas.