Read Fulfulded Alkaali'en 19 Bible Online

Alkaali'en 19 - Fulfulded bible

Alkaali'en 19

¹Nder zamanu ndu walaano laamiiɗo haa Isra'iila, goɗɗo Lewiijo jooɗi haa sera kooseeje Efrayim. O hoo'i culaaɗo haa Baytilaama nder lesdi Yahuuda, o te'i mo.

²Saa'i feere culaaɗo maako tikkani mo, acci mo, hooti haa baaba mum, faɓɓi ton lebbi nayi.

³Goriiko hoo'i suka mum e bamɗe ɗiɗi, tokki mo ngam haa o ɗelmitina mo, o hoora mo. Debbo nastini mo saare baaba mum. Nde baaba maako yi'i goɗɗo, o jaɓɓi mo bee seyo.

⁴Esiiko tori mo o jooɗo, ngam maajum o faɓɓi haa maako nyalɗe tati. Gorko bee suka mum nyaami, njari, mbaali ton.

⁵Nyannde nayaɓre, ɓe ummi fajiri cub. Nde Lewiijo taaskani dillugo, esiraawo muuɗum wi'i mo: “Nyaam nyaamdu seɗɗa ngam keɓa semmbe, nden on ndilla.”

⁶Ɓe njooɗi ɓe ɗiɗo fuu, ɓe nyaamdi, ɓe njardi. Nden baaba debbo wi'i esum: “Yerda waalugo haa ɗo, seynu ɓernde ma.”

⁷Nde gorko ummi ngam haa o dilla, esiiko tori mo ɗuuɗɗum. O lori, o waali ton kadiboo.

⁸Nyannde jowaɓre o ummi fajiri cub ngam haa o dilla. Baaba debbo maako wi'i: “Nyaam tawon, munye haa kiikiiɗe.” Nden ɓe nyaamdi.

⁹Nde Lewiijo yiɗino dillugo bee debbo muuɗum e suka muuɗum, esiiko wi'i mo: “Ndaa hiiri jonta, jemma ɓadake. Yerda fahin waalugo haa ɗo. Seynu ɓernde ma. Jaŋngo on ummoto fajiri cub, on koota saare.”

¹⁰Ammaa Lewiijo jaɓaay waalugo fahin. O waati kirkeeji dow bamɗe maako ɗiɗi, o dilli, kaŋko bee culaaɗo maako. Ɓe njotti nokkuure tiitotirnde bee Yebus, kanjum woni Urusaliima.

¹¹Nde ɓe ɓaditi berniwol, ɗum hiiri, suka wi'i jawmum: “En nasta berniwol Yebusi'en, en mbaala ton.”

¹²Ammaa jaagorɗo maako wi'i mo: “En nastataa berniwol ngol yimɓe mum laataaki Isra'iila'en. En njaha haa en njotta Gibiya.”

¹³O ɓesdi wi'ugo: En kaɓda en mbaaloya haa Gibiya malla Rama.

¹⁴Nden ɓe tokkitini jahaaŋgal maɓɓe. Ɓe njotti Gibiya, nder lesdi Benyamin, naaŋge muti.

¹⁵Ɓe celi laawol ngam haa ɓe nasta Gibiya, ɓe mbaala ton. Ɓe nasti, ɓe njooɗi haa daldal nder berniwol, ammaa walaa mo jaɓɓi ɓe haa saare mum.

¹⁶Kiikiiɗe maajum, goɗɗo ndottiijo huuwi haa ngesa, o ɗon warta saare, o nasti wuro maajum. O goɗɗo iwɗo haa kooseeje Efrayim, wonɓe ton ɓe yimɓe Benyamin.

¹⁷Ndottiijo oo laari koɗo ɗon jooɗi haa daldal nder berniwol. O ƴami mo: “Toy iwɗaa? Toy njahataa?”

¹⁸Lewiijo jaabi: “Min ummi Baytilaama nder lesdi Yahuuda. Min njehino Baytilaama, jonta min ɗon koota haa wuro wongo sera kooseeje Efrayim. Ton min ngoni. Walaa mo jaɓɓi min haa saare mum ngam waalugo,

¹⁹alhaali boo, min ngoodi huɗo e nyaamdu ngam bamɗe amin, non boo tamseeje e inaboojam ngam am e culaaɗo am e suka am. Walaa ko min ŋakki.”

²⁰Ndottiijo go wi'i: “On njaɓɓaama! To woodi ko ŋakkani on fuu, mi humtanan on ɗum. Taa mbaale haa daldal ɗo.”

²¹O yahri ɓe haa saare maako, o nyaamni bamɗe maɓɓe. Ɓe looti kosɗe maɓɓe, ɓe nyaami, ɓe njari.

²²Yaake ɓe ɗon ciwto, worɓe, halluɓe nder berniwol man ngari taari saare, tappi parewal, mbi'i ndottiijo jawmu saare: “Wurtinan min goɗɗo mo a weerni haa min mbaalda bee maako!”

²³Jawmu saare wurti, wi'i ɓe: “Deerɗiraaɓe am, taa mbaɗe kalluɗum! Kaŋko o koɗo am, taa kuuwe halleende nde'e!

²⁴Nane, mi woodi ɓiɗɗo debbo mo meeɗaay gorko tawon, koɗo oo boo, o woodi culaaɗo. Min ngurtinanan on ɓe, on koo'a ɓe, on mbaɗa ɓe ko fottani on, ammaa taa mbaɗe goɗɗo oo irin halleende nde'e!”

²⁵Ammaa worɓe ɓe, cali nanango mo. Nden Lewiijo, wurtinani ɓe debbo muuɗum. Ɓe toski mo jemmaare man fuu. Sey subaha ɓe njoofi mo.

²⁶Fajiri cub debbo wari, do'i yeeso dammugal suudu ndu goriiko woni e mum. Haa naaŋge fuɗi, o ɗon waali ton tawon.

²⁷Goriiko ummi fajiri, maɓɓiti dammugal ngam tokkitina jahaaŋgal mum. O tawi debbo maako ɗon forti haa yolnde, juuɗe maako ɗon porti heedi dammugal.

²⁸O wi'i mo: “Umma, en ndillu!” Ammaa debbo jaabaaki sam. Nden o wallini ɓanndu debbo maako dow wamnde, o hooti saare maako.

²⁹Nde o yotti saare maako, o nasti, o hoo'i laɓi. O naŋngi ɓanndu culaaɗo maako, o ta'i mo geɓe sappo e ɗiɗi. Nden o neldi geɓe man haa lesdi Isra'iila fuu.

³⁰Koo moy yi'i ɗum, wi'i: “Irin ɗu'um meeɗaay waɗeego malla naneego diga gurtaaki Isra'iila'en nder Misra haa wargo hannde. Doole en numta ɗum, en carwootira. En koo'a anniya.”