Read Fulfulded Alkaali'en 20 Bible Online

Alkaali'en 20 - Fulfulded bible

Alkaali'en 20

¹Isra'iila'en wonɓe haa Dan diga woyla haa yotti fombina Beersaba, non boo diga Gile'at haa fuunaaŋge fuu, kawti haa Mispa bee ɓernde woore yeeso Jawmiraawo.

²Ardiiɓe e yimɓe le'i Isra'iila fuu ngari haa mooɓtorde yimɓe Allah nde'e, woodi boo jama'aare Isra'iila, honooɓe ujine teemeɗɗe nayo (400.000), marɓe kaafaaje.

³Yimɓe lenyol Benyamin nani haala mooɓtorde Isra'iila'en haa Mispa. Isra'iila'en ƴami: “Noy halleende nde'e waari?”

⁴Lewiijo mo culaaɗo mum mbaraama go jaabi: “Mi wari haa Gibiya nder lesdi Benyamin, min e culaaɗo am, haa min mbaala ton.

⁵Ardiiɓe Gibiya ummani yam, ngari bee jemma, taari suudu haa ngonnoomi. Ɓe nufi mbarugo yam, ammaa ɓe toski culaaɗo am haa o maayi.

⁶Mi hoo'i mo, mi ta'i mo geɓe geɓe, mi neldi geɓe man nder lesdi Isra'iila fuu. Yimɓe ɓe'e kuuwi kuugal nyidduŋgal kalluŋgal caka meeɗen.

⁷Onon wonɓe haa ɗo fuu on Isra'iila'en. Linye haala maajum, carwootire ko mbaɗeten!”

⁸Yimɓe fuu ummi bana goɗɗo gooto, ɓe mbi'i: “Walaa mo hootata laymaaru mum malla suudu mum semmbiɗndu.

⁹Ndaa ko mbaɗeten: En mbaɗan kur'u ngam suɓugo woɗɓe meeɗen, ɓe ukkano Gibiya.

¹⁰Gooto nder sappo haa worɓe Isra'iila fuu yaha, heɓana jama'aare nyaamdu. Luttuɓe fuu njaha, kiito yimɓe Gibiya ngam daliila kuugal maɓɓe nyidduŋgal nder Isra'iila.”

¹¹Bana non Isra'iila'en fuu kawti ngam ɓe ukkano Gibiya.

¹²Le'i Isra'iila fuu neli nelaaɓe koo toy nder lesdi Benyamin, ngam wi'ugo ɓe: “Bana noy halleende nyiddunde nde'e waari haa mooɗon?

¹³Ndokke min halluɓe Gibiya ɓe'e, haa min mbara ɓe, min itta halleende man nder Isra'iila.” Ammaa yimɓe Benyamin cali nanango banndiraaɓe muuɗum'en Isra'iila'en.

¹⁴Ɓe ngari diga gure Benyamin fuu, ɓe mooɓi haa Gibiya ngam haa ɓe kaɓa bee Isra'iila'en.

¹⁵Nyannde maajum ɓe ndaari warɓe diga gure Benyamin fuu, ɓe limi honooɓe ujine noogas e njoweego (26.000), marɓe kaafaaje, non boo worɓe Gibiya suɓaaɓe teemeɗɗe njoweeɗiɗo (700).

¹⁶Nder honooɓe ɓe'e, woodi worɓe agula'en suɓaaɓe teemeɗɗe njoweeɗiɗo, fiɗooɓe kaa'e, haldooɓe koo dow gaasaawol.

¹⁷Le'i Isra'iila'en boo kawti honooɓe waawɓe konu ujine teemeɗɗe nayo (400.000).

¹⁸Isra'iila'en njehi haa Baytila. Haa ton ɓe ƴami Allah: “Lenyol ngole aartata haɓugo bee yimɓe Benyamin?” Jawmiraawo jaabi: “Lenyol Yahuuda aartata.”

¹⁹Jaŋngo maajum fajiri, Isra'iila'en ummi. Ɓe njehi ɓe caŋngini kommbi Gibiya.

²⁰Nden ɓe njehi haa ɓe kaɓa bee yimɓe Benyamin. Ɓe ndarni caffuuji[21] konu haa nokkuure tiitotirnde bee berniwol.

²¹Jama'aare Benyamin wurti Gibiya. Nyannde maajum ɓe mbari honooɓe Isra'iila'en ujine noogas e ɗiɗo (22.000).

²²Isra'iila'en njehi fahin mboyi yeeso Jawmiraawo haa kiikiiɗe waɗi. Ɓe ƴami mo: “Min njahan fahin haa min kaɓa bee banndiraaɓe amin yimɓe Benyamin na?” Jawmiraawo jaabi: “Njehe!” Isra'iila'en caatini ɓerɗe muuɗum'en, ndarni caffuuji konu haa nokkuure nde ɓe ndarno nyannde arannde.

²³

²⁴Kadiboo ɓe njehi haɓugo bee yimɓe Benyamin.

²⁵Nder konu nyalaade ɗiɗawre nde'e yimɓe Benyamin ngurti Gibiya, ɓe mbari Isra'iila'en honooɓe waawɓe konu ujine sappo e njoweetato (18.000), marɓe kaafaaje.

²⁶Nden Isra'iila'en fuu njehi haa Baytila. Ɓe njooɗi ton yeeso Jawmiraawo, ɓe mboyi, ɓe cuumi haa kiikiiɗe waɗi. Ɓe lii'ani Jawmiraawo guleteeɗi e kirseteeɗi ngam kawtal maɓɓe bee Allah.

²⁷Wakkati maajum sundukru[22] alkawal Allah ɗonno haa Baytila.

²⁸Pinehas ɓii Eli'azaaru, taaniraawo Haruna, wonno limanjo. Isra'iila'en ƴami Jawmiraawo: “Min njahan fahin haa min kaɓa bee banndiraaɓe amin yimɓe Benyamin na? Malla min acca?” Jawmiraawo jaabi: “Njehe, jaŋngo mi hokkan on jaalorgal dow maɓɓe.”

²⁹Isra'iila'en nyukkini honooɓe haa taari Gibiya.

³⁰Luttuɓe fuu njehi fahin haa ɓe kaɓa bee yimɓe Benyamin, ɓe ndarni caffuuji konu kommbi Gibiya bana naane.

³¹Worɓe Benyamin ngurti berniwol ngam potta bee maɓɓe. Isra'iila'en keɓi daaynugo ɓe bee berniwol. Worɓe Benyamin puɗɗi mbarugo woɗɓe nder maɓɓe bana naane, baakin worɓe cappanɗe tato. Kanjum ɗum laati haa yaasi, haa laawol Baytila e laawol Gibiya.

³²Yimɓe Benyamin numi: “En njaali ɓe bana naane.” Ammaa Isra'iila'en mbi'i: “Sey en ndogga yeeso maɓɓe, haa ɓe ngara dow laabi, ɓe ndaayo berniwol.”

³³Jama'aare Isra'iila fuu ummi, lori ɓaawo, nden ɓe ndarni caffuuji konu haa Ba'al-Tamar. Waaltiiɓe boo ummi haa nyukkorde muuɗum'en kommbi Gibiya.

³⁴Honooɓe Isra'iila'en suɓaaɓe ujine sappo (10.000) ukkani Gibiya, haɓre wuli jaw. Ammaa yimɓe Benyamin anndaa tawon sarru warani ɓe.

³⁵Jawmiraawo hokki Isra'iila'en jaalorgal dow lenyol Benyamin. Nyannde maajum ɓe mbari honooɓe Benyamin ujine noogas e njowo e teemerre (25.100), marɓe kaafaaje.

³⁶Yimɓe Benyamin ngi'i ɓe njaalaama. Isra'iila'en acci haɓugo bee yimɓe Benyamin, ngam ɓe kooli waaltiiɓe maɓɓe kommbi Gibiya.

³⁷Worɓe ɓe'e njaawɗi, nasti berniwol, mbari koo moy fuu bee kaafahi.

³⁸Jama'aare Isra'iila e waaltiiɓe narrino dow alaama: To waaltiiɓe nasti berniwol, sey ɓe ummina cuurɗe ɗuuɗɗe.

³⁹To jama'aare Isra'iila yi'i cuurɗe man, sey ɓe ngaylito heedi berniwol fahin. Wakkati maajum yimɓe Benyamin mbarno Isra'iila'en cappanɗe tato, ɓe numi: “En njaali ɓe bana naane!”

⁴⁰Nden alaama waŋgi, cuurɗe ummi haa berniwol fuu. Nde yimɓe Benyamin ngeesiti, ɓe ngi'i berniwol fuu ɗon wula.

⁴¹Nden Isra'iila'en ngayliti, yimɓe Benyamin boo cakli masin, ngam ɓe paami ɓe ɗon kalka.

⁴²Yimɓe Benyamin ndoggi gal ladde, ammaa haɓre jokkiti ɓe. Ɓe ɓiɗɗaaɓe hakkunde jama'aare konu Isra'iila e Isra'iila'en honooɓe wurtiiɓe berniwol, ɓe kalki ton.

⁴³Isra'iila'en taari ɓe, taasni ɓe diga fooftirde maɓɓe haa yotti nokkuure haa fuunaaŋge Gibiya, mbari ɓe haa laawol man fuu.

⁴⁴Honooɓe Benyamin semmbiɗɓe ujine sappo e njoweetato (18.000) maayi.

⁴⁵Luttuɓe ngayliti, ndoggi gal ladde hamaadaare haa tapaare Rimmon. Isra'iila'en mbari ujine njowo (5.000) nder maɓɓe haa laabi. Ɓe tokki taasnugo luttuɓe Benyamin haa yotti Gidi'om, ɓe mbari ujine ɗiɗo (2.000) woɗɓe nder maɓɓe.

⁴⁶Nyannde maajum honooɓe Benyamin semmbiɗɓe ujine noogas e njowo (25.000) maayi.

⁴⁷Ammaa worɓe teemeɗɗe njoweego (600) keɓi daɗugo haa tapaare Rimmon nder ladde hamaadaare. Ɓe paɓɓi ton lebbi nayi.

⁴⁸Isra'iila'en lorti dow luttuɓe Benyamin, mbari ɓe ɓe fuu, worɓe e rewɓe e ɓikkoy bee dabbaaji fuu. Ɓe nguli berniiji lesdi maajum fuu.