Read Fulfulded Alkaali'en 5 Bible Online

Alkaali'en 5 - Fulfulded bible

Alkaali'en 5

¹Nyalaade maajum Deboora e Barak ɓii Abino'am ngimi yimre nde'e:

²Maŋgte Jawmiraawo, ngam Isra'iila'en taaskani konu, ummaatoore nasti haɓre bee ngiɗa maare.

³Keɗite, onon laamiiɓe e mawɓe! Min, mi yimanan Jawmiraawo. Mi maŋgtan Jawmiraawo Allah Isra'iila.

⁴Yaa Jawmiraawo, nde ngurtiiɗaa Se'ir, nde ngarɗa diga gese Edoom, lesdi dimmbi, duule toɓni ndiyam maaje, diga asama iyeende ɗuuɗnde toɓi.

⁵Kooseeje ɓolwi yeeso ma, Jawmiraawo Allah mo Sina, Jawmiraawo Allah Isra'iila.

⁶Nder zamanu Samgar ɓii Anat, nder zamanu Ya'el, laabi perwi, waɗooɓe jahaale tokki laabi leliiɗi.

⁷Ardiiɓe nder lesdi Isra'iila majjiti, haa ummiimi, min Deboora e mi laati bana daada[7] ngam Isra'iila.

⁸Ummaatoore suɓi ɗowanteeɓe feere, nden law konne'en ndari haa dammugal. Ammaa walaa koo gooto jogi wawarde[8] malla labbo nder worɓe ujine cappanɗe nayo nder Isra'iila'en

⁹Ɓernde am ɗon numa dow ardiiɓe, honooɓe Isra'iila e nastuɓe haɓre bee ngiɗa muuɗum'en. Maŋgte Jawmiraawo!

¹⁰Onon wa'iiɓe mbamkon ndaneehon, onon jooɗiiɓe dow daɗɗaaje ɗelemɗe, onon tokkotooɓe laabi boo, nume booɗɗum!

¹¹Haa kommbi keeleeje, senndooɓe ndiyam ɗonno maŋgta kuuɗe Jawmiraawo adiliije, ɗum kuuɗe dimɗinooje nder Isra'iila, nden ummaatoore diirti haa dammuɗe berniwol.

¹²Deboora, taa ɗaana, umma! Umma! Dara, yimu gimol konu. Barak ɓii Abino'am, umma! Hooru naŋngaaɓe ma!

¹³Luttuɓe bee yoŋki ndiirti kawtoy bee tedduɓe, ummaatoore Jawmiraawo hawti haa kommbi am, caka semmbiɗɓe.

¹⁴Diga kooseeje Efrayim jaalotooɓe Amalek njippi, ɓaawo maɓɓe lenyol Benyamin caka yimɓe mum. Umrooɓe iwi haa Makir, ardiiɓe honooɓe boo iwi haa Zabulon.

¹⁵Mawɓe Issakar ngardi bee Deboora, bana Issakar, non Barak boo wari. Ɓe nasti waadiwol, ɓe tokki mo. Ammaa jokkirgol waɗi caka yimɓe Ruben, ɓe ɗon ngaabotira haa foroy.

¹⁶Koni on njooɗi caka kowaaje? Haa on nana luu'aaŋgo waynaaɓe baali na? Nonnon, jokkirgol waɗi caka yimɓe Ruben, onon on ɗon ngaabotira haa foroy.

¹⁷Haa Gile'at, fuunaaŋge Urdun, le'i ɗi ndimmbaaki ngoni: Yimɓe lenyol Dan njooɗi dow koommbooje[9] muuɗum'en. Yimɓe Aser boo njooɗi non haa fomoonde mbeela, dow jipporde koommbooje.

¹⁸Yimɓe Zabulon kulaay maayugo nder konu. Yimɓe Neftali njooɗi dow towndiije lesdi.

¹⁹Laamiiɓe ngari mbaɗi haɓre, ɓe kaɓi bee laamiiɓe Kanaana haa Ta'anak kommbi maaje Megiddo, ammaa walaa ko ɓe keɓi, koo cardi.

²⁰Koode asama boo nasti haɓre man, dow laabi maaje ɗe kaɓi bee Sisera.

²¹Maayo ɗon ila diga ɓooyma, maayo Kison ilni konne'en. Sey mi nasta haɓre bee semmbe!

²²Pucci ɗon caamna bee semmbe, ɗi piyi lesdi bee kororamje maaji bana pucci caamgal.

²³Malaa'ikaajo Jawmiraawo wi'i: “Naale Meeros! Naale yimɓe jooɗiiɓe ton! Ngam ɓe ngaraay wallugo Jawmiraawo, ɓe ngaraay wallugo mo caka semmbiɗɓe.”

²⁴Ammaa barka laatanto Ya'el, debbo Heber Keniijo. Barka laatanto mo ko ɓuri rewɓe jooɗiiɓe nder cuuɗi laymaaji fuu.

²⁵Sisera tori mo ndiyam, o hokki mo kosam, o waddani mo kettuŋgol nder taasawo[10] marŋgo saman.

²⁶Nden o forti juuɗe maako, o hoo'i tiggirgal, o naŋngi tappirɗum bee nyaamo maako. O fiyi Sisera, o fusi mo hoore, o sumpiti galaŋgal maako.

²⁷O turi yeeso maako, o do'i, o lutti o ɗon waali les kosɗe Ya'el dow lesdi, o yoofti, o maayi.

²⁸Daada Sisera ɗon laara gal wurdere suudu, gal kasaryel, o ɗon ƴooƴna: “Ngam ɗume moota pucci maako neeɓi? Ngam ɗume ɓe njaawaay wargo law?”

²⁹O ɗon tokko lornango hoore maako jaawaabu ngu rewɓe marɓe hikma njaaboto.

³⁰“Haa sooje'en ɗon mooɓta keɓal na? Fakat, ɓe ɗon cennda ngal, paanyo debbo gooto malla ɗiɗo ngam konoowo fuu, limce jaage e tuppitaaɗe boo ngam Sisera e mojaaje tuppitaaɗe ngam mojugo marɗo jaalorgal. Naa non na?”

³¹Jawmiraawo, sey konne'en ma fuu kalka, ammaa yiɗɓe ma njayna bana naaŋge fuɗirta. Nden konu timmi nder lesdi baakin duuɓi cappanɗe nayi.