Read Fulfulded Alkaali'en 7 Bible Online

Alkaali'en 7 - Fulfulded bible

Alkaali'en 7

¹Nden Gedeyon bi'eteeɗo Yerub-Ba'al boo dawi cub, kaŋko e yimɓe wonduɓe bee maako fuu. Ɓe caŋngini kommbi seeɓoore Harodi. Ammaa saŋngeere yimɓe Madiyan ɗon haa woyla maɓɓe, nder waadiwol gal towndiire Moore.

²Jawmiraawo wi'i Gedeyon: “Worɓe wonduɓe bee maaɗa ɗuuɗi. Mi hokkataa ɓe yimɓe Madiyan, ngam taa Isra'iila'en njuro dow am, taa ɓe mbi'a: Semmbe amin hisni min.

³Kadi, wooynu haa jama'aare fuu nana: Koo moy hultori, diwni, sey o hoota, o diirto hooseere Gile'at fajiri.” Worɓe ujine noogas e ɗiɗo (22.000) lori, ujine sappo lutti.

⁴Jawmiraawo wi'i Gedeyon: “Koo jonta boo yimɓe ɗuuɗi. Yahru ɓe haa ndiyam, haa mi suɓtane ɓe ton. Mo mbi'anmaami: Oo yahdata bee ma, kaŋko o yahdan bee maaɗa. Ammaa mo mbi'anmaami: Oo yahdataa bee ma, kaŋko o yahataa bee maaɗa.”

⁵Gedeyon yahri ɓe haa ndiyam. Jawmiraawo wi'i mo: “Koo moy tahi ndiyam bee ɗemŋgal bana rawaandu tahrata, darnu mo wakeere nde'e. Koo moy tuggi koppi mum ngam yarugo ndiyam, darnu mo wakeere ndeya.”

⁶Worɓe teemeɗɗe tato nyeɗi ndiyam bee juŋngo, tahi ɗam bee ɗemŋgal. Ammaa luttuɓe fuu tuggi koppi ngam yarugo ndiyam.

⁷Jawmiraawo wi'i Gedeyon: “Bee worɓe teemeɗɗe tato tahuɓe ndiyam mi hisnirta on, mi hokkete jaalorgal dow yimɓe Madiyan. Ammaa luttuɓe fuu koota!”

⁸Gedeyon lorni Isra'iila'en woɗɓe ɓe koota. O jogiti worɓe teemeɗɗe tato go tan. Kamɓe ɓe koo'i njooɓaari e luwe konu haa hootanɓe. Saŋngeere yimɓe Madiyan ɗon haa les Gedeyon nder waadiwol.

⁹Jemmaare man Jawmiraawo wi'i Gedeyon: “Umma, jippa haa saŋngeere Madiyan'en, mi hokki ma nde.

¹⁰Ammaa to a ɗon hula jippaago ton, njippide ton bee Pura jaggiiɗo ma.

¹¹A nanan ko ɓe mbolwata ton, nden, a heɓan cuusal yahugo ukkano nde. Gedeyon jippodi bee jaggiiɗo mum haa sera saŋngeere.

¹²Yimɓe Madiyan e Amalek e yimɓe iwɓe haa laɗɗe fuunaaŋge kebbini waadiwol, ɓe ɗuuɗɓe bana baɓɓatti. Geelooɗi maɓɓe boo limataake, bana njaareendi maayo.

¹³Nde Gedeyon yotti ton, goɗɗo feere ɗonno limtana soobaajo muuɗum koyɗol. O wi'i mo: Ndaa ko koyɗumi, mi yi'i tamseere sa'iiruuri ɗon tallo nder saŋngeere meeɗen, wari lukki suudu laymaaru, yibbini ndu, jimmiti ndu.”

¹⁴Soobaajo maako wi'i mo: “Ko saawi nder koyɗol man, fakat ɗum kaafahi Gedeyon ɓii Yo'as, Isra'iilaajo. Allah hokki mo yimɓe Madiyan e saŋngeere konu meeɗen fuu.”

¹⁵Nde Gedeyon nani haala koyɗol man e ko saawi nder maagol, o sujidani Jawmiraawo. Nden o lori haa saŋngeere Isra'iila, o wi'i: “Umme, Jawmiraawo hokki on saŋngeere Madiyan.”

¹⁶O senndi honooɓe maako teemeɗɗe tato geɓe tati. O hokki koo moy luwal konu e mbulku sookru bee jamre yiite nder maagu.

¹⁷O wi'i ɓe: “To mi yottake sera saŋngeere, ndaareeɗam, mbaɗe ko mbaɗanmi.

¹⁸To mi fuufi luwal konu, min e wonduɓe bee am fuu, onon boo puufe luwe mon nder taarde saŋngeere fuu. Nden koole, mbi'e: En kaɓana Jawmiraawo e Gedeyon!”

¹⁹Gedeyon e worɓe teemerre wonduɓe bee muuɗum njotti sera saŋngeere diga jeŋngaay. Ɓe cannjino aynooɓe wakkati man. Ɓe puufi luwe konu, ɓe pusi bulki gonɗi haa juuɗe maɓɓe.

²⁰Nden geɓe tati go fuu puufi luwe, ɓe pusi bulki. Juŋngo nano ɓe njogori jamre yiite, juŋngo nyaamo boo luwal konu ngam fuufugo. Ɓe kooli, ɓe ɗon mbi'a: “En kaɓana Jawmiraawo e Gedeyon bee kaafaaje meeɗen!”

²¹Ɓe ɗon taari saŋngeere, koo moy maɓɓe ɗon dari haa nokkuure mum. Jama'aare konne'en fuu wooki, doggi.

²²Saa'i worɓe teemeɗɗe tato ɗon puufa luwe, Jawmiraawo ummini kaafaaje nder saŋngeere fuu, ngam haa Madiyan'en mbar-mbartira bee kaafaaje. Ɓe fuu ɓe ndoggi gal Serera haa yotti Bayti-Sitta e Abel-Mehola baŋnge Tabbat.

²³Ɓe ewni Isra'iila'en nder le'i Neftali e Aser e lenyol Manassa fuu. Ɓe ngari, ɓe taasni yimɓe Madiyan.

²⁴Gedeyon neli nelaaɓe koo toy dow kooseeje Efrayim, ɓe mbi'a ɓe: “Njippe, potte bee Madiyan'en, maɓɓe eerorɗe Urdun e eerorɗe haa kommbi Bayti-Bara.” Ɓe njippi, ɓe maɓɓi eerorɗe Urdun e eerorɗe haa kommbi Bayti-Bara.

²⁵Ɓe naŋngi laamiiɓe Madiyan ɗiɗo, Oreb e Ze'eb e yerima'en. Ɓe mbari Oreb haa Tapaare-Oreb, Ze'eb boo haa Ɓiɗɗirde-Je'eb. Ɓe tokki taasnugo yimɓe Madiyan, ɓe ngaddi hoore Oreb bee nde Ze'eb haa Gedeyon gonɗo haa gaɗa Urdun.