Read Fulfulded Alkaali'en 8 Bible Online

Alkaali'en 8 - Fulfulded bible

Alkaali'en 8

¹Yimɓe Efrayim mbi'i Gedeyon: “Koni a ewnaaki min, wakkati njahɗa haɓoygo bee Madiyan'en? Koni kuuwɗa min bana nii?” Ɓe njokkiri bee maako masin.

²Ammaa Gedeyon jaabi ɓe: “Ɗume mi waɗi haa ɓuri ko on ngaɗi? Walliinde mooɗon onon yimɓe Efrayim, koo no nde famɗiri fuu, nde ɓuraay ko keɓmi bee danygol am e ngol Abi'ezer saman na? Fakat ɗum ɓuri.

³Ndaa, haa mooɗon Jawmiraawo hokki Oreb e Ze'eb, laamiiɓe Madiyan. Ko kuuwmi fuu, fotaay nanndineego bee kuugal mon.” Nde o wolwani ɓe bana nii, tikkere yimɓe Efrayim dow Gedeyon feewti.

⁴Gedeyon e honooɓe muuɗum teemeɗɗe tato njotti maayo Urdun, ɓe eeri ngo. Ɓe comi, ammaa bee maajum fuu ɓe tokkitini taasnugo konne'en maɓɓe.

⁵Ɓe ngari haa Sukkot, Gedeyon wi'i yimɓe ton: “Useni, ndokke yimɓe tokkiiɓe yam tamseeje, ngam ɓe comi. Mi ɗon taasna Zebaha e Calmunna, laamiiɓe Madiyan.”

⁶Ammaa mawɓe Sukkot mbi'i: “Kadi a naŋngaay Zebaha e Calmunna tawon non min ndokka jama'aare ma tamseeje na?”

⁷Nden Gedeyon jaabi ɓe: “Booɗɗum! To Jawmiraawo hokki yam Zebaha e Calmunna, nden kam mi ɓoccan on bee gi'e ladde hamaadaare e giŋngille.”

⁸Nden o dilli, o wa'i dow Peniyel. O tori yimɓe ton tornde ndeya go. Kamɓe boo ɓe njaabi mo bana yimɓe Sukkot njaabori.

⁹Gedeyon wi'i ɓe: “To mi jaalake, mi warti jam, mi yibbinan suudu towndu haa berniwol mooɗon.”

¹⁰Zebaha e Calmunna ɗonno haa Karkor, bee jama'aaje konu muuɗum'en, worɓe baakin ujine sappo e njowo (15.000). Ɗum luttuɓe nder honooɓe iwɓe haa fuunaaŋge, ngam honooɓe maɓɓe ujine teemerre e noogas (120.000) mbaraama.

¹¹Gedeyon tokki laawol ngol jooɗiiɓe haa ladde nder cuuɗi laymaaji tokkoto, haa fuunaaŋge Nobah e Yogbeha, o ukkani saŋngeere laamiiɓe Madiyan'en nde ɓe ɗonno njooɗi jam.

¹²Zebaha e Calmunna, laamiiɓe Madiyan ɗiɗo ndoggi, ammaa Gedeyon taasni ɓe, naŋngi ɓe, saŋngeere fuu diwni daliila kultoreeŋgol maŋngol.

¹³Nde Gedeyon ɗon warta konu gal wa'orde Heeres,

¹⁴o naŋngi derkeejo mo Sukkot, o ƴami mo. Derkeejo winndani mo inɗe mawɓe Sukkot e ndotti'en berniwol man, ɓe ɗon cappanɗe njoweeɗiɗo e njoweeɗiɗo.

¹⁵Nden Gedeyon yehi haa yimɓe Sukkot, wi'i ɓe: “On ɗon ciftora kuudi ndi on kuɗino yam na? On cali hokkugo yimɓe am somɓe tamseeje, ngam mi naŋngaayno Zebaha e Calmunna tawon. Ndaa ɓe!”

¹⁶Nden o hoo'i gi'e ladde hamaadaare e giŋngille, o ɓocci ndotti'en Sukkot e yimɓe berniwol man bee maaje.

¹⁷O yibbini suudu towndu haa Peniyel boo, o mbari yimɓe berniwol man.

¹⁸Nden Gedeyon ƴami Zebaha e Calmunna: “Worɓe ɓe mbarɗon haa Taboora, noy ɓe mba'i?” Ɓe njaabi: “Bana maaɗa, koo moy maɓɓe nanndi ɓii laamiiɗo.”

¹⁹O wi'i ɓe: “Ɗum deerɗiraaɓe am, ɓiɓɓe daada am. Fakat mi ɗon hunoro Jawmiraawo geeto, to on accino ɓe bee yoŋki, mi mbarataano on!”

²⁰O umri Yeter, afo maako: “Umma, mbar ɓe!” Ammaa derkeejo losaay kaafahi mum. O huli ngam o derkeejo tawon.

²¹Zebaha e Calmunna mbi'i Gedeyon: “Sey an a mbara min! Sey semmbe gorko fotata huuwugo kuugal gorko.” Ɗon nii Gedeyon ummi, mbari ɓe. O hooci suuraahoy lewru haa daaɗe geelooɗi maɓɓe boo.

²²Ɓaawo man Isra'iila'en mbi'i Gedeyon: “Laamana min, an e ɓiɗɗo ma e taaniraawo ma, ngam a hisni min juuɗe yimɓe Madiyan.”

²³Gedeyon jaabi ɓe: “Min mi laamantaako on, koo ɓiyam boo, Jawmiraawo feere muuɗum laamanto on.”

²⁴E o wi'i ɓe fahin: “Ammaa woodi huunde woɗnde mi yiɗi toraago on: Koo moy mooɗon hokkammi halagaare wonnde nder keɓal konu mum.” Yimɓe Madiyan ngoodino kalagaaje kaŋŋeeri, ngam ɓe danygol Isma'iilu.

²⁵Isra'iila'en njaabi mo: “Fakat min ndokkete ɗe.” Ɓe mbe'iti limce, koo moy maɓɓe sakkini halagaare keɓal mum dow maaje.

²⁶Teddeeŋga kalagaaje kaŋŋeeri ɗe ɓe ndokki Gedeyon, waɗi baakin kaŋŋeeri kilo noogas. Ɓe ndokki mo boo kuuje pawne goɗɗe bana: Yeriiji e limce boɗeeje e suuraahoy jagnaakoy daaɗe geelooɗi maɓɓe.

²⁷Gedeyon waɗi ɗanciki limanjo bee kaŋŋeeri man, ɓili ki haa Ofra, wuro maako. Ton Isra'iila'en fuu laatini ɗanciki ki'i lawru, ɓe ndewi ndu, bana non ndu laatori tuuforgol ngam Gedeyon e yimɓe saare muuɗum.

²⁸Diga saa'i maajum Madiyan'en leestani Isra'iila'en, baawɗe maɓɓe timmi. Konu meetaay nder lesdi Isra'iila baakin duuɓi cappanɗe nayi yaake ngeendam Gedeyon.

²⁹Gedeyon ɓii Yo'as, coometeeɗo Yerub-Ba'al hooti saare mum, jooɗi ton.

³⁰O danyi ɓiɓɓe worɓe cappanɗe njoweeɗiɗo, ngam o woodi rewɓe ɗuuɗɓe.

³¹O woodi boo culaaɗo haa Sikem, kaŋko boo o danyani mo ɓiɗɗo gorko mo Gedeyon inndi ɗum Abimelek.

³²Gedeyon maayi bee seyo nder ndottaaku. Ɓe uwi mo nder yenaande baaba maako Yo'as haa Ofra, wuro yimɓe danygol Abi'ezer.

³³Ɓaawo maayde Gedeyon, Isra'iila'en puɗɗiti rewugo Ba'alji. Ɓe laatini Ba'al-Berit ɗowanteeɗo maɓɓe.

³⁴Ɓe ngejjiti Allah Jawmiraawo maɓɓe, kisnuɗo ɓe juuɗe konne'en maɓɓe taariiɓe ɓe fuu.

³⁵Ɓe mbarjaaki saare Gedeyon bi'eteeɗo boo Yerub-Ba'al fodde kuuɗe booɗɗe ɗe o huuwani Isra'iila.