Read Fulfulded 2 Yuhanna 1 Bible Online

2 Yuhanna 1 - Fulfulded bible

2 Yuhanna 1

¹Min ndottiijo, mi ɗon winndana mayramjo[1] cuɓaaɗo e ɓiyum'en ɓe ngiɗmi bee gooŋga bataakewol ngo'ol. Naa min feere am yiɗi on, ammaa annduɓe gooŋga fuu,

²ngam gooŋga ɗon nder meeɗen e ka wondan bee meeɗen haa foroy.

³Mo'ere e hinnuye e salaaman Allah Baabiraawo e Yeesu Almasiihu Ɓiɗɗomuuɗum ngondan bee meeɗen nder gooŋga e yiide.

⁴Mi seyi masin nde mi tawi ɓikkoy ma ngoɗkoy ɗon tokki gooŋga fodde umroore nde en keɓi diga Baabiraawo.

⁵Jonta mi ɗon toro ma, an mayramjo, naa bana umroore hesre mi winndani ma, ammaa ɗum umroore nde en keɓi diga fuɗɗam: Ngiɗindiren.

⁶Yeeɗugo fodde umrooje Allah, kanjum woni yiide. Ɗum umroore nde on nani diga fuɗɗam, haa ngeeɗon fodde maare.

⁷Ngam fewooɓe ɗuuɗɓe ɗon caŋkiti nder duniyaaru. Ɓe njaɓataa wi'go Yeesu Almasiihu laati neɗɗo fakat. Irin yimɓe ɓe'e, ɓe fewooɓe e konne'en Almasiihu.

⁸Kakkilane ko'e mooɗon, ngam taa on majjina nafuuda kuugal amin ngam mooɗon, ammaa haa on keɓa mbarjaari mooɗon fuu.

⁹Mo jogaaki ekkitinol Almasiihu, luuti ngol, o walaa kawtal bee Allah. Ammaa mo jogi ekkitinol ngo'ol, o ɗon nder kawtal bee Baabiraawo e Ɓiɗɗo.

¹⁰To goɗɗo wari haa mooɗon e o waddanaay on ekkitinol Almasiihu, taa njaɓɓe mo haa ci'e[2] mooɗon, taa koofne mo sam.

¹¹Ngam to goɗɗo hoofni mo, o hawti bee maako nder halleende.

¹²Woodi kuuje ɗuuɗɗe ɗe ngiɗmi winndango on, ammaa mi yiɗaa winndugo ɗe dow ɗereewol. Mi ɗon tammo yahugo haa mooɗon e yeewtididgo bee mooɗon hunnduko bee hunnduko, ngam haa seyo hebbina ɓerɗe meeɗen.

¹³Ɓikkoy deerɗiraawo ma cuɓaaɗo koofni ma.