Read Fulfulded Yahuuda 1 Bible Online

Yahuuda 1 - Fulfulded bible

Yahuuda 1

¹Min Yahuuda, maccuɗo Yeesu Almasiihu, deerɗiraawo Yaakuba, mi ɗon winndana on onon ewnaaɓe, yiɗaaɓe Allah Baabiraawo e aynaaɓe Yeesu Almasiihu.

²Hinnuye e salaaman e yiide ɗuuɗana on.

³Soobiraaɓe am yiɗaaɓe, mi yelino masin winndango on dow haala kisndam ɗam en fuu en kawti nder muuɗum. Ngam maajum, doole mi winndana on ngam suusɗingo on nder haɓre ngam nuɗɗinki ki Allah hokki yimɓe muuɗum nde woore, ki he'i haa foroy.

⁴Ngam halluɓe corkake caka mooɗon. Kiita dow maɓɓe winndaama diga ɓooyma. Ɓe ngayli habaru mo'ere Allah ngam ɓe keɓa hujja waɗugo daakaareeku, ɓe ngeddi Yeesu Almasiihu mo woni Jawmiraawo e jaagorɗo meeɗen feere muuɗum.

⁵Koo nde on anndi kuuje ɗe'e fuu, mi yiɗi siftinorgo on no Jawmiraawo hisniri Isra'iila'en diga lesdi Misra, ammaa ɓaawoɗon o halki ɓe ngam ɓe nuɗɗinaay mo.

⁶Ciftore haala malaa'ika'en ƴaɓɓuɓe keerol baawɗe ɗe Allah hokkuno ɓe, ɓe acci joonde maɓɓe. Allah maɓɓi ɓe nder nyiɓre les, haɓɓi ɓe bee callalluuji ɗi piistataake haa foroy. Ɓe ɗon ndeena nyannde kiita maɓɓe ton.

⁷Bana non boo Sodoma e Gomorra bee berniiji piltuɗi. Yimɓe maaji mbaɗi bana malaa'ika'en go mbaɗi, ɓe tokki waɗugo daakaareeku, ɓe mbaɗi baaldal ngal luuti ɗabiya. Kiita yiite duumiiŋge ɗon torra ɓe, ɗum laati deentinki ngam yimɓe fuu.

⁸Bana nii boo, yimɓe sorkuɓe caka mooɗon go, nder raayu maɓɓe, ɓe ɗon coɓna ɓalli maɓɓe. Ɓe ɗon njawo baawɗe Allah, ɓe ɗon mbolwa kalluka dow tedduɓe asama.

⁹Koo Mika'iilu, mawɗo malaa'ika'en, saa'i o waabotiri bee Sayɗaanu dow ɓanndu Muusa, o huli wolwugo kalluka dow maako, ngam maajum o wi'i mo: “Jawmiraawo telɓane!”

¹⁰Ammaa yimɓe ɓe'e ɓe ɗon mbolwa kalluka dow ko ɓe paamaay. Ɓe ngalaa hakkiilo bana dabbaaji, ko suunooji maɓɓe anndinta ɓe, kanjum yahrata ɓe haa halkere.

¹¹Kayto! Bone laatanto ɓe ngam ɓe tokkake laawol Kayinu. Kadiboo ɓe njoofi ko'e maɓɓe nder majjere ngam heɓugo ceede bana ko Balaama waɗno. Ɓe tuurti bana Koora tuurtirno, ɓe kalki.

¹²Saa'i on ɗon nyaamda, ɓe ɗon njiiɓa kawtal mooɗon, ɓe cemtataa sam, ɓe ɗon kebbina deeɗi maɓɓe tan. Ɓe nanndi bee duule ɗe henndu soggata meere, ɗe ngalaa iyeende. Ɓe nanndi bee leɗɗe ɗe ndimataa koo to saa'i rimugo yottake. Ɓe nanndi bee leɗɗe ɗoofaaɗe, baatɗe.

¹³Ɓe nanndi bee ƴuuge caatuɗe haa maayo, ɓe ɗon mbaŋgina kuuɗe maɓɓe cemtiniiɗe bana nguufo ƴuuge man. Ɓe nanndi bee koode majjuɗe ɗe anndaa laabi maaje. Allah taaskani ɓe nokkuure nder nyiɓre ɓurannde nyiɓɓugo haa foroy.

¹⁴Anuhu mo yeeɗi nder yidere joweeɗiɗawre haa danygol Aadamu, waɗi annabaaku dow maɓɓe diga ɓooyma, o wi'i: “Ndaa, Jawmiraawo waran bee malaa'ika'en muuɗum senaaɓe ujineeje ɗuuɗɗe

¹⁵ngam o hiito yimɓe fuu. O hiitoto hakke'en, yedduɓe Allah fuu fodde kuuɗe maɓɓe kalluɗe fuu, o hiitoto ɓe ngam bolle maɓɓe elewɗe ɗe ɓe mbolwi dow maako fuu!”

¹⁶Yimɓe ɓe'e ɗon ngurŋgurto, ɓe ɗon ciŋka, ɓe ɗon tokko suunooji maɓɓe, kunnduɗe maɓɓe ɗon keewi bolle mawnitiiɗe, ɓe ɗon njobbito yimɓe ngam ɓe keɓa ko ɓe ngiɗi.

¹⁷Ammaa onon, soobiraaɓe am yiɗaaɓe, ciftore ko nelaaɓe Jawmiraawo meeɗen Yeesu Almasiihu ngeccuno on diga ɓooyma.

¹⁸Ngam ɓe ɗonno mbi'a on: “Haa balɗe ragareeje, jancooɓe mbaŋgan, ɓe njancan on, ɓe tokkoto suunooji maɓɓe kalluɗi.”

¹⁹Yimɓe ɓe'e mbaɗan cennduki caka yimɓe. Sey ɗabiya maɓɓe tan ɓe tokkoto, ɓe ngalaa Ruuhu Allah.

²⁰Ammaa onon, soobiraaɓe am yiɗaaɓe, cemmbiɗine ko'e mooɗon nder ekkitinol ɓurŋgol senaago ngol on ekkiti. Tore bee baawɗe Ruuhu Ceniiɗo,

²¹tabite nder yiide Allah, nde on ɗon ndeena haa Jawmiraawo meeɗen Yeesu Almasiihu hinno on, hokka on ngeendam nduumiiɗam.

²²Njurmine sekanɓe.

²³Woɗɓe, mbifte ɓe diga yiite, kisne ɓe. Woɗɓe boo, njurmine ɓe, ammaa ndeente bee maɓɓe, taa meeme koo limce maɓɓe ngam taa coɓki maɓɓe raaɓa on.

²⁴Tedduŋgal e maŋngu e laamu e baawɗe laatano Allah gooto, kisnoowo en bee Yeesu Almasiihu Jawmiraawo meeɗen, baawɗo aynugo on ngam taa on ndo'o, haa on mbaŋga on seyiiɓe, laaɓɓe yeeso tedduŋgal maako, diga zamanuuji ciwaa, non boo jonta e haa foroy. Aamiina!