Read Fulfulded Wahayu Yuhanna 10 Bible Online

Wahayu Yuhanna 10 - Fulfulded bible

Wahayu Yuhanna 10

¹Nden mi yi'i malaa'ikaajo feere marɗo baawɗe ɗon jippo asama. O ɗon ɓorni ruuldere, timotimooŋgal ɗon taari hoore maako, yeeso maako ɗon yayna bana naaŋge, kosɗe maako nanndi bee moosli yiite.

²Nder juŋngo maako o jogi deftel maɓɓitaaŋgel. O jo'ini kosŋgal maako nyaamal dow mbeela, nanal boo dow lesdi,

³o wooki bee sawtu, o wooki bana ubbaaŋgo mbarooga. Nde o wooki bana nii, pelmaali joweeɗiɗi mbaɗi hoolo.

⁴Nde pelmaali joweeɗiɗi ɗi mbolwi, mi taaskani winndugo ɗum. Ammaa mi nani sawtu wolwani yam diga asama, wi'i: “Taa waŋgin ko pelmaali joweeɗiɗi ɗi'i mbolwi. Taa winndu ɗum.”

⁵Nden malaa'ikaajo mo mi yi'i ɗon dari dow mbeela e dow lesdi go ɓaŋgti juŋngo muuɗum nyaamo heedi asama,

⁶huni bee innde Allah, geeto haa abada abadin, tagɗo asama e lesdi e ko woni ton fuu, tagɗo mbeela e ko woni ton fuu, o wi'i: “Walaa wakkati fahin!

⁷Ammaa yaake nde yimɓe tammi nanugo sawtu malaa'ikaajo njoweeɗiɗaɓo, to o fuufi luwal maako, nden Allah timmitinan anniya muuɗum sirriiha, bana o anndinno jaggiiɓe maako, annabi'en.”

⁸Nden sawtu diga asama go, wolwani yam fahin, wi'i: “Yah, jaɓ deftel maɓɓitaaŋgel ngel diga juŋngo malaa'ikaajo dariiɗo dow mbeela e dow lesdi go.”

⁹Mi yehi haa malaa'ikaajo go, mi ƴami mo o hokkammi deftel go. O wi'i yam: “Hoo'u ngel, nyaam ngel, ngel haaɗan nder reedu maaɗa, ammaa nder hunnduko maaɗa, ngel dakman bana njumri.”

¹⁰Mi jaɓi deftel man diga juŋngo malaa'ikaajo go, mi nyaami ngel, ngel dakmi nder hunnduko am bana njumri. Ammaa nde mi moɗi ngel, ngel haaɗi nder reedu am.

¹¹Nden goɗɗo wi'i yam: “Sey a waɗa annabaaku dow jama'aaje e ummaatooje e ɗemɗe e laamiiɓe ɗuuɗɓe fahin.”