Read Fulfulded Wahayu Yuhanna 13 Bible Online

Wahayu Yuhanna 13 - Fulfulded bible

Wahayu Yuhanna 13

¹Nden mi yi'i ndabbaawa ɗon wurto mbeela. Nga woodi luwe sappo e ko'e joweeɗiɗi. Luwal koo ngale fuu ɗon bee woronnde, inɗe kuɗanɗe Allah mbinndaama dow ko'e maaga.

²Ndabbaawa nga ngi'mi nanndi bee paaɗaawu, kosɗe maaga nanndi bee kosɗe ɓoodu[14], hunnduko maaga nanndi bee hunnduko mbarooga. Kuuŋga go hokki ndabbaawa man semmbe mum e leeso laamu mum e baawɗe mum ɗuuɗɗe.

³Mi yi'i woore haa ko'e ndabbaawa man, nde nanndi bana nde meeɗi naawneego haa daande maayde, ammaa huuduure man yamɗiti. Yimɓe duniyaaru fuu kayɗini, ɓe tokki ndabbaawa man.

⁴Ɓe cujidani Kuuŋga ngam nga hokki ndabbaawa baawɗe maaga. Ɓe cujidani ndabbaawa boo, ɓe mbi'i: “Moy nanndi bee ndabbaawa nga'a? Moy he'i haɓugo bee maaga?”

⁵Ndabbaawa heɓi laawol wolwugo bolle elewɗe e kalluɗe dow Allah, nga heɓi huuwtinirgo baawɗe maaga lebbi cappanɗe nayi e ɗiɗi (42).

⁶Nga fuɗɗi wolwugo kalluka dow Allah e innde muuɗum e jooɗorde muuɗum e jooɗiiɓe haa asama fuu.

⁷Nga heɓi laawol haɓugo bee senaaɓe Allah haa nga jaalo ɓe, nga heɓi baawɗe dow yimɓe asli e jama'aaje e ɗemɗe e ummaatooje fuu.

⁸Jooɗiiɓe haa duniyaaru fuu cujidanan nga, waato koo moy mo innde muuɗum winndaaka nder deftere ngeendam diga fuɗɗam duniyaaru. Jawgel kirsaaŋgel go mari deftere nde'e.

⁹“To goɗɗo woodi noppi, sey nana!

¹⁰Mo hoddirana naŋngeego, o naŋngeteeɗo. Mo hoddirana mbareego bee kaafahi, o mbareteeɗo bee kaafahi. Ngam man sey senaaɓe Allah tiiɗa nder munyal e nuɗɗinki.”

¹¹Nden mi yi'i ndabbaawa ngoɗŋga ɗon wurto lesdi. Nga woodi luwe ɗiɗi bana luwe jawgel, ammaa nga ɗon wolwa bana Kuuŋga go.

¹²Nga huuwtiniri baawɗe ndabbaawa aartuŋga go yeeso mum. Nga dooli duniyaaru e jooɗiiɓe nder maaru fuu cujidana ndabbaawa aartuŋga, nga huuduure mum yamɗiti go.

¹³Nga waɗi alaamaaji mawɗi haa nga jippini yiite diga asama haa lesdi gite yimɓe fuu.

¹⁴Nga zammbi jooɗiiɓe haa duniyaaru fuu bee waɗugo alaamaaji ɗi nga heɓi baawɗe waɗugo yeeso ndabbaawa aartuŋga go. Nga yecci jooɗiiɓe haa duniyaaru ɓe mbaɗa suura ndabbaawa naawnaaŋga bee kaafahi e yamɗiti go.

¹⁵Ndabbaawa ɗiɗaɓa heɓi baawɗe nastingo poofɗe yoŋki haa nder suura ndabbaawa aartuŋga, ngam haa suura man boo wolwa e koo moy mo sujidanaay ndabbaawa nga mbare.

¹⁶Ndabbaawa nga dooli yimɓe fuu, leesɓe e mawɓe, riskuɓe e talaka'en, maccuɓe e rimɓe, ngam ɓe njaɓa maandorde dow juuɗe maɓɓe nyaame malla dow tiiɗe maɓɓe.

¹⁷Walaa mo heɓata soodugo malla soorrugo koo ɗume, sonaa to o woodi maandorde man, waato innde ndabbaawa malla lammba innde maaga.

¹⁸Sey goɗɗo mara hikma ngam faamugo haala ka'a. Marɗo hakkiilo fiya lisaafi maana lammba ndabbaawa nga, ngam lammba man ɗon dari mbattudi[15] innde neɗɗo. Lammba man woni teemeɗɗe joweego e cappanɗe joweego e joweego (666).