Read Fulfulded Wahayu Yuhanna 17 Bible Online

Wahayu Yuhanna 17 - Fulfulded bible

Wahayu Yuhanna 17

¹Nden gooto haa malaa'ika'en njoweeɗiɗo jogiiɓe taasaaje joweeɗiɗi go wari, wi'i yam: “War, mi hollete no daakaareejo ɓurduɗo hallugo, jooɗiiɗo haa berniwol maŋngol nyiɓaaŋgol dow ndiyamji ɗuuɗɗi hiitorte.

²Laamiiɓe duniyaaru mbaɗi daakaareeku bee maako, jooɗiiɓe haa duniyaaru nguyki bee njaram, waato daakaareeku maako.”

³Ruuhu naŋngi yam, malaa'ikaajo yahri yam haa ladde. Ton mi yi'i debbo ba'iiɗo ndabbaawa mboɗeewa. Nga ɗon heewi inɗe kuɗanɗe Allah, nga woodi ko'e joweeɗiɗi e luwe sappo.

⁴Debbo oo ɗon ɓorni limce ɗelemɗe e boɗeeje, o pawniiɗo bee kaŋŋeeri e kaa'e marɗe saman e luuluuje. O ɗon jogi jardugel kaŋŋeeri, keewŋgel kuuje nyidduɗe coɓɗe ɗe daakaareeku maako.

⁵Haa tiinde maako innde bee maana cuuɗiika winndaama: “Baabila maŋngol, daada[20] daakaare'en e kuuje nyidduɗe haa duniyaaru.”

⁶Mi yi'i debbo oo wuyki bee ƴiiƴam senaaɓe Allah e bee ƴiiƴam seedooɓe Yeesu. Nde mi yi'i mo, mi hayɗini masin.

⁷Malaa'ikaajo go wi'i yam: “Ngam ɗume a hayɗini? Mi wi'ete sirri debbo e ndabbaawa marŋga ko'e joweeɗiɗi e luwe sappo nga o wa'i.

⁸Ndabbaawa nga a yi'i, nga ɗonno naane, ammaa jonta nga walaa. Nga tammi wurtaago ngaska lugguka, nga dillan haa halkere. Jooɗiiɓe haa duniyaaru ɓe inɗe muuɗum'en mbinndaaka nder deftere ngeendam diga fuɗɗam duniyaaru kayɗinan to ɓe ngi'i ndabbaawa nga ngam nga ɗonno naane, nga walaa jonta, nga waŋgan fahin.

⁹Ngam faamugo ɗum, sey goɗɗo mara hikma. Ko'e joweeɗiɗi ɗe'e, ɗum kooseeje joweeɗiɗi ɗe debbo go ɗon jooɗi dow maaje. Kanje ngoni laamiiɓe njoweeɗiɗo boo,

¹⁰njowo ndo'ake, gooto ɗon laami, gooto boo waraay tawon. To o wari, doole o jooɗo ngam wakkati seɗɗa.

¹¹Ndabbaawa nga ɗonno naane, ammaa jonta nga walaa, kaŋga woni laamiiɗo njoweetataɓo, o gooto nder njoweeɗiɗo boo, o dillan haa halkere.

¹²Luwe sappo ɗe a yi'i ngoni laamiiɓe sappo, ɓe puɗɗaay laamaago tawon, ammaa saa'a ngoota non ɓe keɓan baawɗe laamodaago bee ndabbaawa.

¹³Ɓe sappo fuu ɓe ngoodi numo wooto, ɓe ndokki ndabbaawa baawɗe e laamu maɓɓe.

¹⁴Ɓe kaɓan bee jawgel. Ammaa jawgel jaaloto ɓe, ngam kaŋgel woni Jawmiraawo jawmiraaɓe e Laamiiɗo laamiiɓe. Wonduɓe bee maako, ɓe ewnaaɓe e suɓaaɓe e hoolaaɓe, kamɓe boo ɓe njaaloto bee maako.”

¹⁵Malaa'ikaajo go wi'i yam: “Ndiyamji ɗi a yi'i, haa daakaareejo oo jooɗi, ɗum jama'aaje e mooɓe e ummaatooje e ɗemɗe.

¹⁶Luwe sappo ɗe a yi'i e ndabbaawa fuu nganyan daakaareejo go. Ɓe ɓoftan ko o mari fuu, ɓe accan mo temmbo, ɓe nyaaman kusel ɓanndu maako, ɓe ngulan mo.

¹⁷Ngam Allah ɗowi ɓerɗe maɓɓe haa ɓe kuuwa nufaye maako, ɓe kuuwa bee nufayeere woore, haa ɓe ndokka ndabbaawa baawɗe laamu maɓɓe haa to bolle Allah ngooŋɗi.

¹⁸Debbo mo a yi'i, kaŋko woni berniwol marŋgol laamu dow laamiiɓe duniyaaru.”