Read Fulfulded Wahayu Yuhanna 4 Bible Online

Wahayu Yuhanna 4 - Fulfulded bible

Wahayu Yuhanna 4

¹Ɓaawo man mi yi'i dammugal maɓɓitaaŋgal haa asama. Sawtu bana luwal ngal mi aarti nanugo wi'i yam: “Wa'a haa ɗo, mi hollete ko tammi laataago ɓaawoɗon bee doole!”

²Saa'i man nden Ruuhu naŋngi yam. Mi yi'i leeso laamu jo'inaama nder asama, goɗɗo ɗon jooɗi dow maago.

³Jooɗiiɗo oo ɗon jalbita bana hayre yaspa bee hayre sardis. Timotimooŋgal bee noonde hayre imiradi taari leeso laamu man.

⁴Leese laamu noogas e nayi goɗɗe taari leeso go. Ndotti'en noogas e nayo, ɓorniiɓe limce daneeje e boroɗɗe kaŋŋeeri dow ko'e maɓɓe, ɗon njooɗi dow maaje.

⁵Ma'e e hoolooji e pelmaali iwi haa leeso laamu go. Yeeso maago pittirlaaji joweeɗiɗi ɗon kuɓɓi, kanji ngoni ruuhuuji Allah joweeɗiɗi.

⁶Ko nanndi bee mbeela laaɓŋga, jalbitanŋga bana kiristal ɗon yeeso leeso laamu go. Kuuje geete nayi ɗon taari ngo haa buttuli nayi fuu non boo haa caka. Ɗe keewi gite yeeso e ɓaawo fuu.

⁷Huunde arannde nanndi bee mbarooga, huunde ɗiɗawre nanndi bee gaggel, huunde tataɓre woodi yeeso bana ngo neɗɗo e huunde nayaɓre nanndi bee dutal piiranŋgal.

⁸Kuuje nayi ɗe'e, woore fuu woodi bileeji joweego, keewɗi gite haa nder e haa taarde maaje fuu. Jemma bee naaŋge fuu kuuje ɗe'e ɗon mbi'a tum bilaa siwtaare: “Ceniiɗo, ceniiɗo, ceniiɗo woni Jawmiraawo Allah Baawɗo dow koo ɗume fuu. O ɗonno ɓooyma, o ɗon jonta, o tammi wargo boo.”

⁹Nde kuuje geete nayi go ɗon maŋgta, ɗon ngetta jooɗiiɗo dow leeso laamu, geeto haa abada abadin go,

¹⁰nden ndotti'en noogas e nayo go ɗon tugga koppi yeeso jooɗiiɗo dow leeso laamu, cujidana geeto haa abada abadin. Ɓe ɗon mballina boroɗɗe maɓɓe yeeso leeso laamu go, ɓe ɗon mbi'a:

¹¹“Yaa Jawmiraawo Allah amin, a he'i jaɓugo tedduŋgal e daraja e baawɗe! Ngam an tagi kuuje fuu, bee muuyo maaɗa ɗe tagra e ɗe keɓri joonde.”