Read Fulfulded Wahayu Yuhanna 5 Bible Online

Wahayu Yuhanna 5 - Fulfulded bible

Wahayu Yuhanna 5

¹Mi yi'i deftere taggaande haa juŋngo nyaamo jooɗiiɗo dow leeso laamu go. Binndi keewi bakeeje maare ɗiɗi fuu, nde maɓɓaama e nde takkaama bee takkanɗe joweeɗiɗi.

²Mi yi'i boo malaa'ikaajo baawɗo, mo ɗon wooyna bee sawtu: “Moy he'i takkititgo takkanɗe e maɓɓititgo deftere nde'e?”

³Ammaa koo haa asama, koo haa lesdi, koo haa les lesdi, walaa mo waawi maɓɓititgo deftere nde'e malla laarugo ko woni nder maare.

⁴Mi woyi masin ngam walaa koo gooto he'i maɓɓititgo deftere malla laarugo ko woni nder maare.

⁵Nden gooto caka ndotti'en go wi'i yam: “Taa woy. Ndaa mbarooga nder lenyol Yahuuda, iwɗo diga asŋgol Daawuda. Kaŋko o jaaliiɗo, o foti takkitugo takkanɗe joweeɗiɗi ɗe'e e maɓɓititgo deftere man.”

⁶Nden mi yi'i caka leeso laamu e kuuje geete nayi e caka ndotti'en go, jawgel mbaalu ɗon dari, ngel nanndi bana ngel meeɗino mbareego. Ngel woodi luwe joweeɗiɗi e gite joweeɗiɗi, kanje ngoni ruuhuuji Allah joweeɗiɗi nelaaɗi haa duniyaaru fuu.

⁷Jawgel go yehi, jaɓi deftere man haa juŋngo nyaamo jooɗiiɗo dow leeso laamu go.

⁸Nde ngel hoo'i deftere go, kuuje geete nayi e ndotti'en noogas e nayo go tuggi koppi yeeso jawgel, koo moy maɓɓe woodi moolooru e taasaaje[5] kaŋŋeeri keewɗe uurle. Kanje ngoni do'aaje senaaɓe Allah.

⁹Ɓe ngimi yimre hesre bana ni'i: “An a he'i hoo'ugo deftere nde'e, a takkita takkanɗe maare. Ngam a mbaraama, bee ƴiiƴam maaɗa a soottani Allah yimɓe iwɓe diga asli e ɗemɗe e jama'aaje e ummaatooje fuu.

¹⁰A waɗi ɓe yimɓe laamu e liman'en ngam Allah meeɗen, ɓe laamanto duniyaaru.”

¹¹Nden mi yi'i, mi nani sawtu malaa'ika'en ɗuuɗɓe masin, ujine ujineeje taariiɓe leeso laamu e sawtu kuuje geete nayi e ndotti'en go.

¹²Ɓe ɗon mbolwa bee sawtu, ɓe mbi'i: “Jawgel ngel ɓe mbarino he'i jaɓugo baawɗe e risku e hikma e semmbe e daraja e tedduŋgal e maŋgtoore.”

¹³Mi nani boo tagefooji gonɗi haa asama e haa lesdi e haa les lesdi e nder mbeela fuu, mi nani ɗi ɗon mbi'a: “Maŋgtoore e maŋngu e tedduŋgal e baawɗe laatano jooɗiiɗo dow leeso laamu e jawgel haa abada abadin!”

¹⁴Kuuje geete nayi go njaabi: “Aamiina.” Ndotti'en tuggi koppi, cujidi.