Read Fulfulded Wahayu Yuhanna 9 Bible Online

Wahayu Yuhanna 9 - Fulfulded bible

Wahayu Yuhanna 9

¹Nden malaa'ikaajo njowaɓo fuufi luwal muuɗum. Mi yi'i horre do'i diga asama haa lesdi. Nde hokkaama maɓɓitirgel ngaska lugguka.

²Nde maɓɓiti ngaska man. Nden cuurɗe ngurti ka bana cuurɗe ɓolinirde mawnde, naaŋge e hawa ɓalwi bee cuurɗe man.

³Baɓɓatti ngurti cuurɗe man, caŋkiti haa lesdi, ɗi keɓi baawɗe bana ɗe jahe.

⁴Ɗi umraama taa ɗi mbonna huɗo dow lesdi malla haako hecco koo koye e lekki koo kiye, sey yimɓe ɓe ngalaa lammba Allah haa tiiɗe muuɗum'en tan.

⁵Ɗi keɓaay duŋayeere mbarugo yimɓe man, sey torrugo ɓe lebbi jowi. Naawɗum torra baɓɓatti man nanndi bee naaweeŋga nga goɗɗo maatata to yaare fiɗi ɗum.

⁶Nder nyalɗe ɗe'e, yimɓe ɓe'e tefan maayugo, ammaa ɓe keɓataa. Ɓe ngeloto maayugo, ammaa maayde doggan ɓe.

⁷Baɓɓatti ɗi'i nanndi bee pucci taaskaniiɗi konu. Ɗi keɓi ko nanndi bee boroɗɗe kaŋŋeeri dow ko'e maaji. Geese maaji nanndi bee geese yimɓe,

⁸gaasa ko'e maaji nanndi bee gaasa ko'e rewɓe, nyii'e maaji boo nanndi bee nyii'e mbarooga.

⁹Biɓɓe maaji cuuɗaama bee ko nanndi sulkeeji njamndi. Hoolo bileeji maaji nanndi bee hoolo mootaaji ɗi pucci ɗuuɗɗi ndasata saa'i ɗi ɗon camna yahugo konu.

¹⁰Ɗi ngoodi bicce e tufirkoy bana ɗe jahe, bee bicce maaji ɗi ngoodi baawɗe naawnugo yimɓe lebbi jowi.

¹¹Ɗi ngoodi laamiiɗo, kaŋko woni malaa'ikaajo kalfinaaɗo ngaska lugguka go. Innde maako bee Ibraniŋkeere, Abaddon, bee Yunaniŋkeere[9] boo Apolliyon[10].

¹²Torra arana saalake, ndaa torraaji ɗiɗi goɗɗi ɗon ngara yeeso ɗo.

¹³Nden malaa'ikaajo njoweegoojo fuufi luwal muuɗum. Mi nani sawtu iwi haa tolɗi[11] hirsirde kaŋŋeeri dariinde yeeso Allah nayi fuu.

¹⁴Sawtu go wolwani malaa'ikaajo njoweegoojo jogiiɗo luwal, wi'i: “Fiistu malaa'ika'en nayo haɓɓaaɓe haa Efratis, maayo maŋngo!”

¹⁵Ɓe piisti malaa'ika'en nayo taaskiiɓe ngam saa'iire e nyalaade e lewru e hitaande man ngam ɓe mbara yimɓe yeɓre woore nder tati.

¹⁶Mi nani limgal wa'iiɓe pucci konu, ɓe miliyoŋji teemeɗɗe ɗiɗo (200.000.000).

¹⁷Nder wahayu am mi yi'i pucci e wa'iiɓe ɗi. Ɓe ngoodi sulkeeji boɗeeji coy bana yiite, deenooji bana yasente, ooli bana baruudu[12]. Ko'e pucci maɓɓe nanndi bee ko'e barooɗe, nder kunnduɗe maaji yiite e cuurɗe e baruudu ngurti.

¹⁸Yiite e cuurɗe e baruudu ngurti kunnduɗe pucci go, kanjum woni masiibooji tati. Ɗum mbari yeɓre yimɓe woore nder tati.

¹⁹Ngam baawɗe pucci man ɗon nder kunnduɗe e nder bicce maaji. Bicce maaji nanndi bee boɗɗe, ɗe ngoodi ko'e. Bee maaje ɗi ɗon naawna yimɓe.

²⁰Bee non fuu yimɓe luttuɓe ɓe masiibooji ɗi'i mbaraay, tuubaay dow kuuɗe muuɗum'en. Ɓe accaay sujidango ginnaaji e labbi kuuwraaɗi bee kaŋŋeeri e cardi e njamndi mboɗeeri e kaa'e e leɗɗe, ɗi mbaawataa laarugo koo nanugo e yahugo.

²¹Yimɓe ɓe'e tuubaay, ɓe accaay waɗugo mbar-hoore e hiila e daakaareeku e nguyka.