Read Fulfulded Ruut 4 Bible Online

Ruut 4 - Fulfulded bible

Ruut 4

¹Bo'es yehi haa dammugal berniwol, o jooɗi ton. Nden coottoowo mo Bo'es wolwuno dow muuɗum go, ɗon saalo ton. Bo'es ewni mo: “Wayne, war gaa'e, jooɗa ɗo.” O seli, o jooɗi.

²Nden Bo'es ewni worɓe sappo nder ndotti'en berniwol, wi'i ɓe: “Njooɗe ɗo.” Kamɓe boo ɓe njooɗi,

³o wi'i coottoowo go: “A anndi Na'omi warti diga lesdi Mo'ab. O yiɗi soorrugo ngesa ka Elimelek, banndiraawo men marno.

⁴Min, mi numi faamtingo ma haala ka, mi wi'e: Soodu ngesa ka yeeso ndotti'en ummaatoore am e jooɗiiɓe haa ɗo fuu. Yeccam to a yiɗi soottugo ka malla a yiɗaa. Enen ɗiɗo tan mari baawɗe soottugo ka, walaa goɗɗo feere, an woni arano, min boo mi ɗiɗaɓo.” Nden o jaabi: “Mi soottan ka.”

⁵Bo'es wi'i mo: “Saa'i a soodata ngesa ka diga Na'omi, a sootta boo Ruut, Mo'abiijo, debbo jurumɗo, o laatoto debbo ma haa innde maayɗo tabita dow maral mum.”

⁶O jaabi: “To non kam, mi waawataa soottugo ka, ngam taa mi waɗa asar dow maral am. Mi hokkiti ma baawɗe coottuki man. An, soottu ka, min kam mi waawataa.”

⁷Nden coottoowo go wi'i Bo'es: “Soottu ka ngam maaɗa.” Nden o faɗɗiti faɗo maako, o hokki ngo Bo'es. Ɓooyma haa Isra'iila, goɗɗo ɗon faɗɗito faɗo mum, hokka ngo oya ngam tabitingo haalaaji seedamku coottuki malla cannjuki maral fuu.

⁹Nden Bo'es wi'i ndotti'en e yimɓe wonɓe ton fuu: “Onon on seedooɓe hannde. Mi sootti maral Elimelek e Kiliyon e Mahalon fuu diga Na'omi.

¹⁰Non boo Ruut Mo'abiijo, debbo Mahalon, mi sootti mo haa o laato debbo am, ngam tabitingo innde maayɗo dow maral mum, ngam taa nde wile caka banndiraaɓe maako e nder dawriinde berniwol maako. Onon hannde on seedooɓe.”

¹¹Ndotti'en e yimɓe wonɓe ton fuu mbi'i: “Nonnon, min seedooɓe. Jawmiraawo wartira debbo garanɗo nder saare ma bana Rahiilu e Leya laatiiɓe kaakiraaɓe Isra'iila'en fuu. An boo laata baawɗo haa Efrata, innde ma tedda nder Baytilaama.

¹²Ngam daliila danygol ngol Jawmiraawo hokkete bee Ruut, derkeejo oo, saare ma laato teddunde bana saare Peres mo Tamar danyani Yahuuda.”

¹³Bana nii Bo'es te'ri bee Ruut. Bo'es hawti bee debbo mum. Jawmiraawo mo'ani mo o reedi, o danyi ɓiɗɗo gorko.

¹⁴Rewɓe mbi'i Na'omi: “Yettoore laatano Jawmiraawo! O hokki ma hannde coottoowo. Innde taaniraawo oo laato teddunde nder Isra'iila.

¹⁵O de'itinte. To a naywi, o wuurnete ngam o ɓii esiraawo ma giɗɗo ma. Ngam ma, esiraawo oo ɓuri ɓiɓɓe worɓe njoweeɗiɗo.”

¹⁶Na'omi hoo'i ngel, suklani ngel, mawnini ngel.

¹⁷Heeddiɗɗiraaɓe maako mbi'i: Na'omi heɓi ɓiŋngel, ɓe inndi ngel: Obet. Kaŋko woni baaba Yessa laatiiɗo baaba Daawuda.

¹⁸Ndaa danygol Peres: Peres danyi Hesruunu,

¹⁹Hesruunu danyi Ram, Ram danyi Amminadabu,

²⁰Amminadabu danyi Nahasunu, Nahasunu danyi Salmuuna,

²¹Salmuuna danyi Bo'es, Bo'es danyi Obet,

²²Obet danyi Yessa, Yessa danyi Daawuda.