Read Fulfulded 1 Samuyila 10 Bible Online

1 Samuyila 10 - Fulfulded bible

1 Samuyila 10

¹Nden Samuyila hoo'i faandu nebbam rufi ɗam dow hoore Sawulu, hebbi mo, wi'i: “Bana nii Jawmiraawo darniri ma dow yimɓe muuɗum Isra'iila'en.

²To a dilli jonta, a fottan bee worɓe ɗiɗo haa yenaande Rahiilu kommbi Selsa nder lesdi Benyamin. Ɓe mbi'ete: Bamɗe debbe ɗe njahɗa ɗaɓɓititgo, keɓtaama. Haala maaje saklataa baaba ma. Ammaa o ɗon sakli jonta daliila ma, o ɗon ƴama: Ko mbaɗanmi ngam ɓiyam?

³Nden a tokkoto yeeso haa a yotto lekki makki bi'eteeki Taboora. Haa ton worɓe tato pottan bee maaɗa, ɓe ɗon njaha haa Baytila ngam ɓe lii'ano Allah dokkal. Gooto nder maɓɓe ɗon roondi njawkoy tatoy, ɗiɗaɓo tamseeje tati, tataɓo boo kanyakanyaawu[8] inaboojam.

⁴Ɓe ƴaman njamu maaɗa, ɓe ndokkete tamseeje ɗiɗi, jaɓ ɗe.

⁵Ɓaawo maajum a yottoto nokkuure wi'eteende Towndiire-Allah haa caŋngeeje aynooɓe Filisti'en ngoni. Haa nastirde berniwol a fottan bee mooɓre annabi'en waranɓe diga towndiire. Ɓe ɗon ngima bee moolooji e bawɗi e ciide e hooduuji, ɓe ɗon mbaɗa annabaaku boo.

⁶Nden Ruuhu Jawmiraawo jippoto dow maaɗa haa a waɗa annabaaku bana maɓɓe, a laato goɗɗo keso.

⁷To alaamaaji ɗi mbaŋgi yeeso maaɗa kam, waɗ ko warani ma fuu, ngam Allah ɗon wondi bee maaɗa.

⁸Aartam yahugo haa Gilgal, reenam ton nyalɗe joweeɗiɗi. Mi yahan ton haa mi lii'ano Jawmiraawo guleteeɗi e kirseteeɗi ngam kawtal yimɓe bee maako. Nden mi wi'e ko mbaɗata fuu.”

⁹Nde Sawulu wayliti, acci Samuyila, Jawmiraawo hokki mo ɓernde hesre. Ko Samuyila wi'i mo fuu, ɗum laati nyalaade maajum.

¹⁰Nde Sawulu e suka mum njotti Towndiire-Allah go, mooɓre annabi'en fotti bee maɓɓe. Ruuhu Jawmiraawo jippi dow Sawulu, o fuɗɗi waɗugo annabaaku caka maɓɓe.

¹¹Annduɓe mo diga ɓooyma fuu, nde ɓe ngi'i mo o ɗon waɗa annabaaku bee annabi'en, ɓe ƴamƴamtiri: “Ko waɗi ɓii Kis? Sawulu boo laati caka annabi'en na?”

¹²Goɗɗo jooɗiiɗo wuro man ƴami: “E moy woni baaba ɓeya?” Bana nii geccawol fuɗɗiri: “Sawulu boo laati caka annabi'en na?”

¹³Nde Sawulu timmini waɗugo annabaaku, o wa'i haa towndiire.

¹⁴Bappa maako yi'i mo, kaŋko e suka maako, ƴami ɓe: “Toy njahɗon?” O jaabi: “Ɗaɓɓititgo bamɗe. Nde min ngi'aay ɗe koo toy, min njehi ƴamugo Samuyila.”

¹⁵Bappa maako ƴami: “Ɗume o wi'i on?”

¹⁶Sawulu jaabi: “O yecci min bee laaɓɗum bamɗe keɓtaama.” Ammaa haala laamu ka Samuyila wolwanno mo, o yeccaay ka.

¹⁷Samuyila ewni Isra'iila'en haa ɓe ngara yeeso Jawmiraawo haa Mispa.

¹⁸O wi'i ɓe: “Ndaa nii Jawmiraawo, Allah Isra'iila wi'i: Mi wurtini on lesdi Misra. Mi hisni on juuɗe Misra'en e laamuuji konne'en woɗɓe fuu.

¹⁹Min woni Allah mon kisnuɗo on sarruuji e ɓillaaje fuu. Ammaa onon on ngudini yam hannde, on ɗaɓɓi mi hokka on laamiiɗo. Yoo booɗɗum! Ndare jonta yeeso Jawmiraawo fodde le'i mon e ci'e mon.”

²⁰Samuyila ɓaditini le'i Isra'iila fuu, lenyol Benyamin naŋngaama.

²¹O ɓaditini lenyol Benyamin fodde ci'e maagol, saare Matiri naŋngaama. Nder saare man boo Sawulu ɓii Kis naŋngaama. Ammaa nde ɓe ɗaɓɓiti mo, ɓe tawaay mo.

²²Ɓe ƴami Jawmiraawo: “Lutti goɗɗo feere na?” Ammaa Jawmiraawo wi'i: “Sawulu ɗon nyukki ɓaawo kuuje nder saŋngeere.”

²³Ɓe ndoggi, ɓe tawi mo ton, ɓe ngaddi mo. Nde o ɗon dari caka yimɓe, ndaa, hoore maako towti dow yimɓe fuu.

²⁴Samuyila wi'i ɓe: “Kaŋko woni cuɓaaɗo Jawmiraawo. Walaa nannduɗo bee maako nder ummaatoore fuu.” Yimɓe ngooki bee seyo, ɓe kooli: “Hayru laamiiɗo!”

²⁵Samuyila faamtini yimɓe umrooje laamu. O winndi ɗum nder deftere, o wallini nde yeeso Jawmiraawo. Nden o wi'i yimɓe fuu koota ci'e muuɗum'en.

²⁶Sawulu boo hooti saare mum haa Gibiya. Ɗuuɗɓe nder honooɓe tokki mo ngam Jawmiraawo meemi ɓerɗe maɓɓe.

²⁷Ammaa woɗɓe meere'en ƴami: “Noy kaŋko o hisnirta en?” Ɓe njawi mo, ɓe teddinaay mo bee dokke. Ammaa Sawulu dooli hoore mum jeeɗaago.