Read Fulfulded 1 Samuyila 12 Bible Online

1 Samuyila 12 - Fulfulded bible

1 Samuyila 12

¹Nden Samuyila wi'i Isra'iila'en fuu: “Ndaa, mi waɗi ko on tori yam, mi waɗani on laamiiɗo.

²Ndaa mo jonta yeeso mooɗon ngam o ardo on. Min kam mi ndottiijo, marɗo dandanndi. Ɓiɓɓe am ɗon ngondi bee mooɗon. Mi huuwi yeeso mooɗon diga nderkaaku am haa wargo hannde.

³Ndaa yam ɗo. Ceedaneeɗam yeeso Jawmiraawo e laamiiɗo mo o suɓi to mi waɗi aybewol koo ngole. Nagge moy koocumi? Malla wamnde moy koocumi? Moy mbaɗmi rikici? Moy toonyiimi? Haa juŋngo moy njaɓmi ceede ngam sottingo gooŋga? Mbi'e ɗum jonta, haa mi hokkita on.”

⁴Isra'iila'en mbi'i: “A waɗaay min rikici, a toonyaay min, a jaɓaay koo ɗume haa juŋngo koo moy.”

⁵Samuyila wi'i ɓe: “Jawmiraawo e laamiiɗo mo o suɓi laati seedooɓe, on tawaay aybewol koo ngole haa am.” Ɓe fuu ɓe mbi'i: “Nonnon nii!”

⁶Samuyila wi'i ɓe: “To non kam, sey mi wullo on yeeso Jawmiraawo. Sey mi siftinora on kuuɗe booɗɗe ɗe Jawmiraawo huuwani on, onon e kaakiraaɓe mon. Nde Yaakubu e yimɓe saare mum ngari haa Misra, nde kaakiraaɓe mon tori Jawmiraawo ballal, saa'i maajum o nelani ɓe Muusa e Haruna. Bee juuɗe worɓe ɗiɗo ɓe'e o wurtiniri ɓe lesdi Misra, o hokki ɓe joonde nder lesdi ndi'i.

⁹Ammaa kamɓe ɓe ngejjiti ko Allah Jawmiraawo waɗani ɓe, ɓe acci mo. Ngam maajum o hokki ɓe haa juuɗe Filisti'en e laamiiɗo Mo'abi'en e Sisera, mawɗo honooɓe berniwol Hacoor. Ɓe fuu ɓe kaɓi bee kaakiraaɓe mon, ɓe njaali ɓe.

¹⁰Ɓe tori Jawmiraawo ballal, ɓe mbi'i: Min mbaɗi hakke, yaa Jawmiraawo, ngam min ngudini ma, min ndewi suuraaji Ba'al e Astarot. Ammaa jonta hisnu min juuɗe konne'en amin, nden kam min njagganto ma an feere ma.

¹¹Jawmiraawo nelani on Yerub-Ba'al, Bedan, Yefta e Samuyila. O hisni on juuɗe konne'en mon taariiɓe on fuu, haa on njooɗo bee jam e de'ere.

¹²Ammaa nde ngi'ɗon Nahas, laamiiɗo Ammooni'en ɗon wara ngam haɓugo bee mooɗon, on mbi'i yam: Sey min keɓa laamiiɗo. On ngejjiti Allah Jawmiraawo mon woni laamiiɗo mon.

¹³Ndaa laamiiɗo mo ɗaɓɓuɗon, mo cuɓɗon, Jawmiraawo darni mo dow mooɗon.

¹⁴Kadi, teddine Jawmiraawo, njaggane mo, ɗowtane umrooje maako, taa luute ɗe sam, tokke mo, onon e laamiiɗo mon fuu. Nden kam on njooɗoto jam.

¹⁵Ammaa to on nananaay Jawmiraawo, to on ɗowtanaaki umrooje maako, nden kam o honan on bana o honno kaakiraaɓe mon.

¹⁶Jonta kam ndare booɗɗum, ndaare kaayeefiwol ngol Jawmiraawo waɗata yeeso mooɗon.

¹⁷Naa jonta ɗum wakkati codol alkamaari na? Bee non fuu mi toroto Jawmiraawo, kaŋko boo o neldan diggaali e iyeende. To ɗum waɗi, on anndan no kaɓɓotiral mooɗon ɗaɓɓugo laamiiɗo halliri yeeso Jawmiraawo.”

¹⁸Nden Samuyila tori Jawmiraawo. Nyalaade maajum Jawmiraawo neldi diggaali e iyeende. Yimɓe fuu kuli Jawmiraawo e Samuyila masin.

¹⁹Ɓe mbi'i Samuyila: “Useni, torana min Allah Jawmiraawo ma, ngam taa min maaya. Fakat min marɓe hakke, dow maajum fuu min ɓesdi halleende bee ɗaɓɓugo laamiiɗo.”

²⁰Samuyila jaabi ɓe: “Taa kule. On mbaɗi aybe fakat, ammaa tokke Jawmiraawo jonta, njaggane mo bee ɓernde woore.

²¹Taa ndewe labbi, ngam kanji ɗi meereeji, ɗi nafataa, ɗi kisnataa on boo.

²²Ammaa Jawmiraawo, ngam daliila innde mum mawnde, accataa yimɓe mum. Ɗum fottani mo o waɗa on ummaatoore maako.

²³Min boo, taa mi waɗa aybe dow Jawmiraawo, mi acca do'anaago on. Koo yeeso boo mi anndinan on ko foti, ko wooɗi.

²⁴Sey on teddina Jawmiraawo, on ɗowtano mo bee gooŋga e ɓernde woore. Ciftore kuuɗe mawɗe ɗe o huuwani on.

²⁵Ammaa to on tokkake waɗugo halleende, nden kam on kalkan, onon e laamiiɗo mon fuu.”