Read Fulfulded 1 Samuyila 19 Bible Online

1 Samuyila 19 - Fulfulded bible

1 Samuyila 19

¹Sawulu wi'i ɓiɗɗo muuɗum Yonatan e saraaki'en muuɗum o tammi mbarugo Daawuda. Ammaa Yonatan soobiri bee Daawuda masin.

²Ngam maajum o reentini[16] Daawuda, o wi'i: “Baaba am ɗon ɗaɓɓa mbarugo ma. Hakkil jaŋngo fajiri, suuɗa, nyukka.

³Min kam mi wurtoto, min bee baaba am, mi daro kommbi maako haa ngesa haa ngonɗa. Nden mi wolwana mo haala maaɗa, haa mi heɓta no ka wa'i. Ɓaawoɗon mi anndinte.”

⁴Yonatan mani Daawuda haa noppi baaba mum. O wi'i mo: “Barkaama, taa waɗan suka ma Daawuda aybe, ngam o waɗanaay ma aybe, ammaa o waɗi ko nafete masin,

⁵ngam o suklanaaki yoŋki maako nde o haɓi bee Goliyat, o mbari mo. Bee maako Jawmiraawo hisniri Isra'iila fuu. An boo a yi'i ɗum, a seyori ɗum. Ngam ɗume a yiɗi waɗugo aybe bee mbarugo goɗɗo mo waɗaay aybe? A walaa daliila sam.”

⁶Sawulu nanani Yonatan, o huni hunayeere, o wi'i: “Fakat mi ɗon hunoro Jawmiraawo geeto, Daawuda, o mbarataake.”

⁷Yonatan ewni Daawuda, yecci mo haala man fuu. Nden o yahri mo haa Sawulu, Daawuda boo jooɗi haa saare Sawulu bana naane.

⁸Haɓre bee Filisti'en fuɗɗiti. Daawuda yehi, haɓi bee maɓɓe, jaali ɓe jaalorgal maŋngal haa ɓe ndoggi.

⁹Nyannde feere, nde Daawuda ɗon fiya moolooru yeeso Sawulu, ruuhuwol kalluŋgol iwŋgol haa Jawmiraawo wari dow laamiiɗo fahin. O ɗon jooɗi haa suudu maako, labbo ɗon haa juŋngo maako.

¹⁰O ɗaɓɓi tiggugo Daawuda bee labbo haa mahol, ammaa Daawuda ruuɗi ngo, ngo tiggi haa mahol. Bee jemma Daawuda doggi, daɗi.

¹¹Sawulu neli nelaaɓe haa saare Daawuda, haa ɓe ayna mo, ɓe mbara mo jaŋngo maajum fajiri. Ammaa Mikal, debbo Daawuda wi'i gorum: “To a hisnaay yoŋki ma jemmaare nde'e, ɓe mbarete jaŋngo.”

¹²O jippini mo gal wurdere mahol, o wurti, o doggi, o daɗi.

¹³Nden Mikal hoo'i lawru saare, wallini ndu dow be'itte. Haa hoore maaru o waɗi tayre laral mbeewa bee gaasaaji. O suddi lawru bee limce.

¹⁴Nde Sawulu neli nelaaɓe ngam naŋngugo Daawuda, Mikal wi'i ɓe: “O nyawɗo.”

¹⁵Sawulu neli ɓe fahin, umri ɓe ɓe nasta suudu, ɓe ndaara Daawuda. O wi'i: “Ngadde mo bee be'itte maako fuu ngam haa mi mbara mo.”

¹⁶Nelaaɓe nasti suudu, tawaay Daawuda, sey lawru tan ɗon dow be'itte, bee gaasaaji mbeewa haa hoore maaru.

¹⁷Sawulu ƴami Mikal: “Koni mbaɗɗa mi rikici bee wallugo konneejo am haa o daɗi?” Mikal jaabi mo: “O wi'i o mbaratam to mi yoofaay mo.”

¹⁸Ammaa Daawuda daɗi, yehi Rama, haa Samuyila. O yecci mo ko Sawulu waɗi mo fuu. Nden o yahdi bee Samuyila haa Nayot.

¹⁹Nde Sawulu nani Daawuda ɗon ton,

²⁰o neli nelaaɓe ngam haa ɓe naŋnga mo. Wakkati ɓe njotti ton, jama'aare annabi'en ɗon waɗa annabaaku. Samuyila, ardiiɗo maɓɓe boo ɗon dari kommbi maɓɓe. Nde yimɓe Sawulu ngi'i ɗum, Ruuhu Allah wari dow maɓɓe, ɓe puɗɗi waɗugo annabaaku.

²¹Goɗɗo wi'i ɗum Sawulu. O neli nelaaɓe woɗɓe. Kamɓe boo ɓe puɗɗi waɗugo annabaaku. Fahin Sawulu neli nelaaɓe, ammaa kamɓe boo ɓe mbaɗi annabaaku.

²²Nden Sawulu bee hoore mum yehi Rama. Nde o yotti waawru mawndu haa Seku, o ƴami haa o tawata Samuyila e Daawuda. Ɓe njaabi mo: “Ɓe ɗon haa Nayot haa Rama.”

²³Saa'i o ɗon yaha ton, Ruuhu Allah wari dow maako kaŋko boo, o ɗon tokko laawol maako, o ɗon waɗa annabaaku haa o yotti Nayot haa Rama.

²⁴O ɓorti limce maako, o waɗi annabaaku yeeso Samuyila haa o somi, o do'i. Luttuɗum nyalawmaare maajum e jemmaare maajum fuu o ɗon waali haa lesdi o temmbo. Bana nii geccawol fuɗɗiri: Sawulu boo ɗon caka annabi'en na?