Read Fulfulded 1 Samuyila 2 Bible Online

1 Samuyila 2 - Fulfulded bible

1 Samuyila 2

¹Hanna waɗi do'a, wi'i: “Ɓernde am ɗon seyoro Jawmiraawo, ngam o ɓaŋgti yam. Mi ɗon jala konne'en am, mi ɗon heewi seyo ngam o walli yam.

²Jawmiraawo feere mum woni ceniiɗo, walaa nannduɗo bee maako, walaa aynoowo cemmbiɗɗo bana Allah men.

³Taa mawnite, acce juraago. Taa ɗuɗɗine bolle elewɗe. Ngam Allah Jawmiraawo anndi ko mbaɗoton, o hiitoto kuuɗe yimɓe fuu.

⁴O yewan lagaaje honooɓe semmbiɗɓe, ammaa o semmbiɗinan tampuɓe.

⁵Haarnooɓe coorran ko'e muuɗum'en ngam heɓugo nyaamdu, ammaa weelanooɓe ceyorto siwtaare. Debbo dimaro danyan ɓiɓɓe njoweeɗiɗo, ammaa marɗo ɓiɓɓe ɗuuɗɓe tampan.

⁶Jawmiraawo maaynan, yeeɗinan boo. O nastinan nder joonde maayɓe, o wurtinan boo.

⁷O talkiɗinan, o riskinan boo, o leestinan oo, o ɓaŋgtan oya.

⁸O ɓaŋgtan yawaaɓe nder mbulwuldi haa o teddina ɓe, o hawta ɓe bee laamiiɓe, o jo'ina ɓe dow joole tedduɗe. Ngam duniyaaru fuu Jawmiraawo jeyi, o jo'ini ndu dow caɓɓaaje ɗe ndimmbataako.

⁹Jawmiraawo ɗon ayna kosɗe hoolaaɓe mum, ammaa halluɓe majjan nder nyiɓre. ngam neɗɗo waawataa heɓugo jaalorgal bee semmbe muuɗum.

¹⁰Konne'en Jawmiraawo kalkan, jooɗiiɗo haa asama riggoto dow maɓɓe. Jawmiraawo hiitoto yimɓe duniyaaru haa yotto keeri maaru fuu, o ɓaŋgtan laamiiɗo mo o suɓi, o hokkan mo jaalorgal.”

¹¹Elkaana hooti haa Rama. Ammaa Samuyila, derkeejo jooɗi haa Silo ngam jagganaago Jawmiraawo les limanjo Eeli.

¹²Ammaa ɓiɓɓe Eeli ɓe meere'en, ɓe anndaa Jawmiraawo.

¹³Ndaa ko ɓe mbaɗi ummaatoore: Koo ndeye goɗɗo lii'ani Jawmiraawo kirseteeŋga, wakkati o ɗon defa kusel maaga, suka limanjo wara bee tufirɗum marɗum cinde tati.

¹⁴O tufa nder defruɗe malla payanɗe fuu, o hoo'a ngam limanjo ko tufirɗum wurtini fuu. Bana nii ɓe mbaɗata koo moy Isra'iilaajo garɗo haa Silo.

¹⁵Hiddeko ɓe ngula ɓellere dow hirsirde Jawmiraawo, suka limanjo wara, wi'a lii'otooɗo kirseteeŋga: “Hokku kusel ca'eteeŋgel[2]. Limanjo yiɗaa defaaŋgel, sey keccel.”

¹⁶To goɗɗo wi'i: “Accu ɓe ngula ɓellere tawon, nden koo'a ko ngiɗɗa”, suka jaabo mo: “Aa'a, hokkam ngel jonta. To a hokkaay, mi jaɓtan ngel bee semmbe.”

¹⁷Aybewol ɓiɓɓe Eeli ngo'ol mawni masin yeeso Jawmiraawo, ngam ɓe njawi kirsaaɗi ɗi yimɓe lii'ani mo.

¹⁸Wakkati maajum Samuyila ɗon huuwana Jawmiraawo. Koo nde o derkeejo tawon boo, o ɗon ɓorni toggoore limanku.

¹⁹Hitaande fuu daada maako waɗana mo ngapaleewol deydey darnde maako, waddana mo ngol yaake o wardi bee goriiko ngam lii'aago kirseteeŋga hitaande man fuu.

²⁰Eeli barkiɗini Elkaana e Hanna, wi'i Elkaana: “Jawmiraawo hokke ɓikkoy feere bee debbo oo, mbattudi ɓiŋngel ngel ndokkititɗon Jawmiraawo.” Ɓaawo maajum ɓe kooti.

²¹Jawmiraawo barkiɗini Hanna, hokki mo ɓiɓɓe worɓe tato e ɓiɓɓe rewɓe ɗiɗo. Samuyila derkeejo boo mawni haa suudu Jawmiraawo.

²²Eeli ndottidi masin. O nani ko ɓiɓɓe maako mbaɗani Isra'iila'en fuu, ɓe mbaɗi boo njeenu bee rewɓe huuwanɓe haa dammugal laymaaru hawtirde.

²³O wi'i ɓe: “Koni mbaɗoton kuuje ɗe'e? Mi ɗon nana haala kuuɗe mon kalluɗe haa yimɓe fuu.

²⁴Acce ɗum, ɓikkoy am! Ko nanmi haa yimɓe Jawmiraawo, wooɗaay sam.

²⁵To goɗɗo waɗi aybe dow neɗɗo, Allah seettoto mo. Ammaa to goɗɗo waɗi aybe dow Jawmiraawo, moy seetata mo?” Ammaa ɓe nananaay baaba maɓɓe, ngam Jawmiraawo yiɗino halkugo ɓe.

²⁶Samuyila kam ɓesdi mawnugo, ɓesdi heɓugo yerduye boo haa Jawmiraawo e yimɓe fuu.

²⁷Nyannde feere goɗɗo Allah wari haa Eeli, wi'i mo: “Ndaa nii Jawmiraawo wi'i: Zamanu kaaka ma e saare mum laati maccuɓe Firawna, laamiiɗo Misra, naa mi waŋgani mo!

²⁸Nder le'i Isra'iila fuu mi suɓi mo, kaŋko e asŋgol maako, haa ɓe laato liman'en am, ɓe lii'o kirsaaɗi dow hirsirde am, ɓe ngula uurle, ɓe ɓorno limce limanku yeeso am boo. Mi yeɗi ɓe geɗal kirsaaɗi guleteeɗi dow hirsirde fuu.

²⁹Kadi ngam ɗume ndaaroton bee suuno heedi kirseteeɗi e dokke nyaamdu ɗe umrumi Isra'iila'en? An boo, Eeli, koni ɓurata teddingo ɓiɓɓe ma dow am haa on tekkina ɓalli mon bee ko ɓuri wooɗugo haa dokke ɗe yimɓe am lii'anto yam?

³⁰Gooŋga, ɓooyma mi wi'no asŋgol mon huuwantam kuugal limanku haa foroy. Ammaa jonta ɗum haaɗi ngam mi teddinan teddinooɓe yam, ammaa mi wudinan yawotooɓe yam, min Allah Jawmiraawo Isra'iila wi'i ɗum!

³¹Anndu, nyalɗe ngaran mi mbaran suka'en fuu nder asŋgol ma. Walaa koo gooto maɓɓe naywata.

³²A laaran konneejo ma haa saare ma e barkaaji ɗi ngaɗanmi Isra'iila. Ammaa saare ma meetataa nayeejo haa foroy.

³³Gorko gooto tan accanmi haa o huuwanammi kuugal limanku, luttuɓe fuu maayan saa'i ɓe suka'en. Kanjum ɗum tampinan gite ma, ɗum torran ɓernde ma boo.

³⁴To ɓiɓɓe ma Hofni e Pinehas maayi ɓe ɗiɗo fuu nder nyalaade woore, nden kam a anndan ko mbi'mi fuu laatoto.

³⁵Mi suɓanan hoore am goɗɗo koolaaɗo haa o laato limanjo am. Kaŋko o waɗan ko fottantammi fuu. Mi hokkan mo danygol, kamɓe ɓe kuuwan kuugal limanku yeeso laamiiɗo mo mi suɓi. Bana nii ɗum laatorto haa foroy.

³⁶To goɗɗo saare ma lutti saa'i man, o yahan haa limanjo oo, o sujida yeeso maako haa o heɓa suleyre cardi malla tamseere, o wi'a: Accu mi walle huuwugo kuugal limanku haa mi heɓa ko mi ƴakka.”