Read Fulfulded 1 Samuyila 22 Bible Online

1 Samuyila 22 - Fulfulded bible

1 Samuyila 22

¹Daawuda doggi ton, wari haa lowol Adullam. Nde deerɗiraaɓe maako e luttuɓe saare baaba maako nani ɗum, ɓe ngari haa maako.

²Non boo yimɓe woɗɓe, ɓilliiɓe e tokkaaɓe nyamaale e haaɗa-ɓerɗe'en, ɓe fuu ɓe mooɓi haa Daawuda, ɓe ɗon baakin teemeɗɗe nayo. Daawuda laati ardiiɗo maɓɓe.

³Daawuda ummi ton, yehi Mispe[17] nder lesdi Mo'ab. O tori laamiiɗo Mo'abi'en: “Accu baaba am e daada am ngara haa ɗo, ɓe ngonda bee mooɗon, haa to mi anndi ko Allah nufani yam.”

⁴Bana nii o acciri saaro'en maako haa laamiiɗo Mo'abi'en. Ɓe njooɗi ton saa'i Daawuda ɗon nyukki nder gasol.

⁵Ammaa annabi Gada wi'i Daawuda: “Taa jooɗa haa ɗo nder gasol, hootu lesdi Yahuuda.” Ngam maajum Daawuda ummi, yehi laynde Heeret.

⁶Nyannde feere Sawulu nani habaru yimɓe woɗɓe ngi'i Daawuda e yimɓe muuɗum. Saa'i maajum Sawulu ɗon jooɗi les aslahi gonki haa towndiire haa Gibiya, labbo maako ɗon haa juŋngo maako. Saraaki'en maako fuu ɗon ndari, taari mo.

⁷O wi'i ɓe: “Naneeɗam, onon yimɓe Benyamin! Kadi on tammi ɓii Yessa hokkan on gese alkamaari e gese inabooje na? Malla o waɗan on mawɓe fuu dow honooɓe ujineere malla dow honooɓe teemerre?

⁸Ngam maajum on tuurtani yam. Walaa koo gooto nder mooɗon anndini yam alkawal ɓiyam bee ɓii Yessa oo. Walaa koo gooto mooɗon suklani yam, walaa mo faamtini yam haala ɓiyam mo ummini maccuɗo am ngam waaltanaago yam bana hannde.”

⁹Do'ek Edoomiijo ɗon dari ton caka yimɓe Sawulu. O wi'i: “Ndaa, mi yi'i ɓii Yessa nde o wari haa Noba, haa Ahimelek ɓii Ahitooba.

¹⁰Limanjo ƴami muuyo Jawmiraawo ngam maako, hokki mo njooɓaari, hokki mo kaafahi Goliyat Filistiijo boo.”

¹¹Laamiiɗo Sawulu neli ɗaɓɓugo Ahimelek ɓii Ahitooba, kaŋko e saare baaba maako fuu, waato liman'en wonɓe haa Noba fuu. Ɓe fuu ɓe ngari haa laamiiɗo.

¹²Sawulu wi'i: “Nan, ɓii Ahitooba!” Ahimelek jaabi: “Na'am, barkaama.”

¹³Sawulu wi'i mo: “Koni on tuurtani yam, an e ɓii Yessa? Koni ndokkuɗa mo tamseeje e kaafahi, ƴamɗa muuyo Allah ngam maako boo? Jonta o ummani yam ngam waaltanaago yam.”

¹⁴Ahimelek jaabi laamiiɗo: “Asee, naa Daawuda woni koolaaɗo ma ɓurɗo yimɓe ma fuu na? O esiraawo ma boo, o ardiiɗo doogari'en ma suɓaaɓe, koo moy haa saare ma ɗon teddina mo.

¹⁵Nonnon, naa hannde tan boo mi ƴami Allah ngam maako. Aa'a, barkaama, taa aybinam dow koo ɗume, taa aybin banndiraaɓe am boo. Mi anndaano koo ɗume nder haala maajum fuu.”

¹⁶Ammaa laamiiɗo wi'i: “Fakat, an Ahimelek, a maayan bee yimɓe saare ma fuu.”

¹⁷O umri aynooɓe dariiɓe ton: “Taare liman'en Jawmiraawo, mbare ɓe. Ɓe mballi Daawuda, ɓe anndi o doggi yam, ammaa ɓe ngeccaay yam.” Ammaa worɓe ɓe'e cali fortugo juuɗe muuɗum'en ngam mbarugo liman'en Jawmiraawo.

¹⁸Ngam maajum Sawulu wi'i Do'ek Edoomiijo: “An, war mbaru ɓe!” Do'ek mbari ɓe, liman'en cappanɗe njoweetato e njowo, ɓorniiɓe toggooje limanku.

¹⁹Nden Sawulu umri mbarugo jooɗiiɓe haa Noba, berniwol liman'en fuu, bee mbeldi kaafahi: Worɓe e rewɓe, derke'en e musinankoy, non boo na'i e bamɗe e dammooji fuu.

²⁰Ammaa gooto nder ɓiɓɓe Ahimelek daɗi. Innde maako Abiyatar. O doggi, o wari haa Daawuda,

²¹o yecci mo no Sawulu mbardi liman'en Jawmiraawo.

²²Daawuda wi'i Abiyatar: “Nde ngi'mi Do'ek Edoomiijo haa Noba naane, mi anndi o yeccan ɗum Sawulu. Maayde banndiraaɓe ma fuu ɗum aybe am.

²³Jooɗoda bee am, taa hul! Sawulu ɗon ɗaɓɓa mbarugo en en ɗiɗo fuu, ammaa haa am a heɓi jam.”