Read Fulfulded 1 Samuyila 23 Bible Online

1 Samuyila 23 - Fulfulded bible

1 Samuyila 23

¹Daawuda nani habaru Filisti'en ɗon ukkano Ke'ila, ɓe ɗon njaɓta gawri haa laarɗe[18].

²Daawuda ƴami Jawmiraawo: “Mi yaha haɓugo bee Filisti'en na?” Jawmiraawo jaabi mo: “Yah, ukkana Filisti'en, hisnu Ke'ila.”

³Ammaa yimɓe maako mbi'i mo: “Koo haa ɗo nder lesdi Yahuuda boo en ɗon bee kulol, sakkomaa to en ndilli haɓugo bee caffuuji Filisti'en.”

⁴Daawuda ƴami Jawmiraawo fahin. Jawmiraawo jaabi mo: “Umma, yah haa Ke'ila. Mi hokkete Filisti'en haa juŋngo ma.”

⁵Daawuda yehi Ke'ila, kaŋko e yimɓe muuɗum. Ɓe ukkani Filisti'en, ɓe mbari ɗuuɗɓe nder maɓɓe, ɓe koo'i dabbaaji maɓɓe. Bana nii Daawuda hisniri jooɗiiɓe berniwol Ke'ila.

⁶Haa ton Abiyatar ɓii Ahimelek warino haa Daawuda, wakkati o doggi Sawulu. Limce limanku ɗon haa juŋngo maako.

⁷Nde Sawulu nani Daawuda wari haa Ke'ila, o wi'i: “Yowwa, jonta Allah hokki mo haa juŋngo am. Daawuda do'ake nder tuuforgol, ngam o maɓɓi hoore maako nder berniwol bee dammuɗe e jamɗe palduɗe.”

⁸Sawulu ewni honooɓe Isra'iila'en fuu, ngam haa ɓe njahda bee muuɗum haa Ke'ila, ɓe taaro berniwol ngam honugo Daawuda e worɓe mum.

⁹Daawuda faami Sawulu ɗon waɗa dabare honugo mo. Ngam maajum o umri Abiyatar, limanjo: “Waddu limce limanku.”

¹⁰Nden o wi'i: “Yaa Jawmiraawo, Allah Isra'iila, mi anndi Sawulu waɗi anniya wargo haa Ke'ila, haa o halka berniwol ngam daliila am.

¹¹Yimɓe Ke'ila ndokkatam haa juŋngo maako na? Sawulu waran na? Mi ɗon toro ma, yaa Jawmiraawo, Allah Isra'iila, anndinam ɗum.” Jawmiraawo jaabi mo: “O waran.”

¹²Daawuda ƴami: “Yimɓe Ke'ila ndokkatam, min e yimɓe am, haa juŋngo maako na?” Jawmiraawo jaabi: “Ɓe ndokkan.”

¹³Ngam maajum Daawuda ummi, kaŋko e yimɓe muuɗum, baakin worɓe teemeɗɗe njoweego. Ɓe ngurti Ke'ila, ɓe njehi haa ɓe mbaawi yahugo fuu. Nde Sawulu nani Daawuda wurti Ke'ila, daɗi, o acci taasnugo mo.

¹⁴Daawuda faɓɓi nder gasi dow kooseeje nder ladde Zif haa Horeesa. Sawulu ɗaɓɓiti mo wakkati man fuu, ammaa Allah hokkaay Daawuda haa juŋngo Sawulu.

¹⁵Daawuda anndi laaɓɗum Sawulu yiɗi mbarugo mo. Saa'i maajum Daawuda ɗon jooɗi haa Horeesa nder ladde Zif.

¹⁶Yonatan ɓii Sawulu yehi, tawi mo ton. O semmbiɗini hoolaare Daawuda bee Allah,

¹⁷o wi'i mo: “Taa hul! Juŋngo baaba am heɓataa naawnugo ma. An a laatoto laamiiɗo Isra'iila, min boo mi ɗiɗaɓo maaɗa. Kanjum, baaba am anndi ɗum booɗɗum.”

¹⁸Ɓe ɗiɗo fuu ɓe kaɓɓi alkawal soobaaku yeeso Jawmiraawo. Nden Yonatan hooti saare mum, ammaa Daawuda tokki jooɗaago haa Horeesa.

¹⁹Yimɓe Zif ngari haa Sawulu haa Gibiya. Ɓe mbi'i mo: “Daawuda ɗon nyukki haa lesdi amin, nder gasi haa Horeesa dow hooseere Hakila, haa fombina harde Yahuuda.

²⁰War, waɗ ko ngiɗɗa barkaama. Minin kam min nastinan mo nder juuɗe ma.”

²¹Sawulu wi'i ɓe: “Jawmiraawo barkiɗin on, ngam on enɗi yam.

²²Njehe, tefe fahin, ndaare nokkuure haa o woni, keɓte giiɗo mo ton. Mi meeɗi nanugo o ƴoyɗo masin.

²³Mbiɗite nokkuuje fuu haa o waawi nyukkaago. To on anndi koo ɗume fuu bee laaɓɗum, lorte haa am. Nden mi yahda bee mooɗon. To o wurtaaki lesdi tawon, mi heɓtan mo, koo to doole mi tefa mo nder le'i Yahuuda fuu.”

²⁴Kamɓe ɓe aarti Sawulu hootugo haa Zif. Ammaa Daawuda e worɓe mum njahno ladde hamaadaare Ma'on, ɓe nasti haa luggol haa fombina harde Yahuuda.

²⁵Sawulu e worɓe mum njehi ngam haa ɓe ɗaɓɓita mo ton. Nde Daawuda nani ɗum, o wa'i tapaare feere nder ladde hamaadaare Ma'on. Sawulu nani ɗum, o taasni mo.

²⁶Sawulu e worɓe mum njehi haa wuttudu hooseere ndu'u, Daawuda e worɓe mum boo haa wuttudu maare nduya. Daawuda haɓdi doggugo taasnooɓe ɗum, ammaa Sawulu e worɓe mum ɓadi taaraago mo e yimɓe maako ngam naŋngugo ɓe.

²⁷Ɗon nii nelaaɗo wari haa Sawulu, wi'i mo: “War law, wallu min, Filisti'en kippake lesdi meeɗen.”

²⁸Sawulu acci taasnugo Daawuda, o yehi haɓoygo bee Filisti'en. Ngam maajum nokkuure man wi'aama Tapaare-cennduki.