Read Fulfulded 1 Samuyila 26 Bible Online

1 Samuyila 26 - Fulfulded bible

1 Samuyila 26

¹Yimɓe Zif ngari haa Sawulu haa Gibiya. Ɓe mbi'i mo: “Daawuda ɗon nyukki haa hooseere Hakila haa fuunaaŋge harde Yahuuda.”

²Sawulu ummi, yehi haa ladde Zif ngam ɗaɓɓititgo Daawuda. Honooɓe Isra'iila suɓaaɓe ujine tato (3.000) njahdi bee maako.

³Nde ɓe njotti hooseere Hakila yeeso harde Yahuuda, ɓe caŋngini kommbi laawol. Saa'i maajum Daawuda ɗon haa harde tawon. O nani Sawulu wari ngam ɗaɓɓititgo mo,

⁴o neli horooɓe, o annditi fakat Sawulu wari.

⁵Nden o ummi bee hoore maako, o yehi, o tawi saŋngeere Sawulu. O laari haa Sawulu e Abineer ɓii Neer, mawɗo honooɓe maako ɗon mbaali. Sawulu ɗon haa caka saŋngeere, yimɓe fuu ɗon taari mo.

⁶Daawuda ƴami Ahimelek Hetiijo e Abisay ɓii Seruyatu, deerɗiraawo Yo'ab: “Moy yahdata bee am nder saŋngeere Sawulu?” Abisay jaabi: “Mi yahdan bee ma.”

⁷Wakkati jemma Daawuda e Abisay nasti saŋngeere. Ɓe caali worɓe taariiɓe Sawulu, ɓe caali Abineer boo, ɓe fuu ɓe ɗon ɗaani. Ɓe tawi Sawulu haa caka saŋngeere, o ɗon ɗaani. Labbo maako ɗon tiggi nder lesdi kommbi hoore maako.

⁸Abisay wi'i Daawuda: “Hannde Allah hokki konneejo ma haa juŋngo ma. Accu mi tigga mo bee labbo haa lesdi, nde woore tan, walaa haaje mi waɗa ɗum nde ɗiɗi.”

⁹Ammaa Daawuda wi'i: “Taa halku mo! Kaŋko woni laamiiɗo mo Jawmiraawo suɓi. Kadi Jawmiraawo hiitataako mo meemi cuɓaaɗo maako na?

¹⁰Fakat bana Jawmiraawo o geeto, kaŋko tan hiitoto Sawulu, koo o maaya non, koo o halka nder haɓre.

¹¹Jawmiraawo haɗammi meemugo laamiiɗo mo o suɓi. Ammaa hoocu labbo maako e jollooru maako, nden en ndillu!”

¹²Ɓe kooci labbo e jollooru, ɓe ndilli. Walaa gi'ɗo ɓe, walaa nanɗo ɓe, walaa pinɗo, ɓe ɗon ɗaani ɓe fuu, ngam Jawmiraawo ukki ɗoyŋgol lugguŋgol dow maɓɓe.

¹³Daawuda lori haa wakeere waadiwol feere, o wa'i hooseere haa o tiitotiri bee saŋngeere, daayiiɗum bee maare.

¹⁴Nden o hooli heedi ummaatoore e Abineer: “Abineer, a ɗon nanammi na?” Abineer jaabi: “Moy findinta laamiiɗo bee hoolo bana nii?”

¹⁵Daawuda wi'i: “Na a gorko? Moy nder Isra'iila foti haɓugo bee maaɗa? Kadi ngam ɗume a aynaay jaagorɗo ma laamiiɗo? Neeɓaay goɗɗo nasti saŋngeere ngam mbarugo mo.

¹⁶A waɗaay kuugal ma bana no fotti. Fakat bana Jawmiraawo o geeto, on fuu on ke'i kiita mbareego, ngam on aynaay jaagorɗo mon, laamiiɗo mo Jawmiraawo suɓi. Laar! Toy labbo laamiiɗo? Toy jollooru maako? Kuuje man ɗonno haa hoore maako.”

¹⁷Sawulu annditi sawtu Daawuda. O ƴami: “Ɗum an na, Daawuda, ɓiŋngel am?” Daawuda jaabi: “Ɗum min, barkaama.”

¹⁸Nden o ɓesdi wi'ugo: “Ngam ɗume a taasnatammi? Ko mbaɗmaami? Ɗume woni aybe am?

¹⁹Nanam, laamiiɗo am ko maccuɗo ma yiɗi wi'go: Moy ummini ma dow am? To ɗum Jawmiraawo kam, lii'anen mo kirseteeŋga. Ammaa to ɗum yimɓe, nden kam Jawmiraawo hiito ɓe. Ngam ɓe ndiiwi yam yaasi lesdi Jawmiraawo, ɓe ngiɗi doolugo yam mi rewa ɗowanteeɓe jananɓe.

²⁰Taa accu ɓe mbarammi haa lesdi ndaayiindi bee Jawmiraawo. Ngam ɗume a loohoto yam bana gerlal nder kooseeje? Laamiiɗo Isra'iila wurti ngam naŋngugo pilpilyel.”

²¹Sawulu wi'i: “Mi waɗi aybe. Lorta, ɓiŋngel am Daawuda, mi meetataa waɗugo ma kalluɗum. A samɗini yoŋki am hannde. Fakat, mi laatino paataaɗo, mi waɗi ma aybe masin.”

²²Daawuda jaabi mo: “Ndaa ɗo labbo ma, barkaama. Gooto nder yimɓe ma wara, hoo'a ngo.

²³Jawmiraawo warjoto koo moy fodde adilaaku e gooŋgaaku maako. Hannde o nastini ma juŋngo am, ammaa mi sali naawnugo laamiiɗo mo o suɓi.

²⁴Bana min mi samɗini yoŋki ma hannde, bana non Jawmiraawo samɗinirta yoŋki am boo, wurtintammi ɓillaaje fuu.”

²⁵Sawulu wi'i: “Allah barkiɗine, ɓiŋngel am Daawuda. A heɓan barka nder ko mbaɗata fuu.” Nden Daawuda tokki laawol mum, Sawulu boo hooti haa saare mum.