Read Fulfulded 1 Samuyila 30 Bible Online

1 Samuyila 30 - Fulfulded bible

1 Samuyila 30

¹Nyannde tataɓre, nde Daawuda e yimɓe mum njotti haa Cikilak, ɓe tawi berniwol maɓɓe wulaama. Amaleki'en kippi Lesdi Fombina e Cikilak, ɓe nguli e ɓe mbili Cikilak.

²Ɓe mbaraay koo gooto, ammaa ɓe ndahi rewɓe e ɓikkoy.

³Nde Daawuda e worɓe mum ngarti, ɓe ngi'i ko waɗi, ɓe mboyi haa ɓuri semmbe.

⁵Rewɓe Daawuda ɗiɗo boo ndahaama, Ahino'am mo Yisre'el e Abigayel mo Karmel, laatinooɗo debbo Nabal.

⁶Daawuda sakli masin, ngam yimɓe maako ngiɗno fiɗugo mo bee kaa'e, ɓerɗe maɓɓe naawi ngam daheeki[21] ɓiɓɓe maɓɓe worɓe e rewɓe. Ammaa Daawuda saatiti ngam o ɗon hooli Allah Jawmiraawo maako.

⁷O umri Abiyatar ɓii Ahimelek, limanjo: “Waddu ɗanciki limanku bee jiiba wiɓɓere.” Abiyatar waddani mo ɗum.

⁸Daawuda ƴami Jawmiraawo: “Mi taasna hippooɓe ɓe'e na? Mi jokkoto ɓe na?” Jawmiraawo jaabi mo: “Taasnu ɓe, fakat a jokkoto ɓe, a hisna naŋngaaɓe.”

⁹Saa'i man nden ɓe ndilli, Daawuda e worɓe mum teemeɗɗe njoweego (600). Nde ɓe njotti maayo Besor, Daawuda acci ton worɓe teemeɗɗe ɗiɗo, ngam ɓe somɓe, ɓe mbaawaay eeraago maayo. Bee luttuɓe teemeɗɗe nayo o tokki taasnugo Amaleki'en.

¹¹Ɓe tawi Misraajo suka mo heɓaay nyaamdu e njaram nyalɗe tati. Ɓe njahri mo haa Daawuda, ɓe ndokki mo tamseere e ndiyam, ɓe ndokki mo tayre tamre ibbe joorɗe e tame inabooje joorɗe boo ɗiɗi. Nde o nyaami ɗum, o heɓti semmbe maako.

¹³Daawuda ƴami mo: “Toy iwɗaa? Moy mari ma?” O jaabi: “Mi Misraajo, mi maccuɗo goɗɗo Amalekiijo. Jaagorɗo am acci yam haa ɗo diga heeciti keenya, ngam mi nyawɗo.

¹⁴Min kippino Lesdi Fombina, lesdi Kereti'en e Lesdi Fombina, ndi Yahuudu'en e haa ndi asŋgol Kaaleb ɗon jooɗi. Min nguli Cikilak bee yiite.”

¹⁵Daawuda ƴami mo: “A yahratam haa mooɓre hippooɓe ɓe'e na?” Maccuɗo wi'i: “Hunoranam bee Allah a mbarataa yam, a hokkataa yam haa juŋngo jawmam boo. Nden kam mi yahrete haa maɓɓe.”

¹⁶Ɓe njehi, ɓe tawi Amaleki'en ɗon caŋkiti haa nokkuure man fuu, ɓe ɗon nyaama, ɓe ɗon njara, ɓe ɗon ngama ngam daliila keɓal ɗuuɗŋgal ngal ɓe njaɓtuno haa lesdi Filisti'en e lesdi Yahuuda.

¹⁷Jaŋngo maajum nde weeti Daawuda ukkani ɓe, haɓi bee maɓɓe haa kiikiiɗe waɗi. Worɓe Daawuda mbari Amaleki'en fuu, sey suka'en teemeɗɗe nayo wa'iiɓe geelooɗi ndaɗi.

¹⁸Daawuda hisni ko ɓe koocuno fuu, o hisni rewɓe maako ɗiɗo boo.

¹⁹Walaa ko majji, diga ɓikkoy haa ndotti'en koo moy heɓti ɓikkoy mum e ko Amaleki'en njaɓtuno fuu. Daawuda wartiri ɗum fuu.

²⁰Dammooji e na'i maɓɓe, Daawuda hoo'i ɗi fuu bee hoore mum. Yimɓe maako coggi ɗi yeeso dabbaaji luttuɗi, ɓe mbi'i: “Kanjum woni keɓal Daawuda.”

²¹Nde ɓe ɓadi maayo Besor, worɓe teemeɗɗe ɗiɗo somnooɓe haa ɓe mbaawaayno tokkaago Daawuda go ngari, potti bee maɓɓe. Daawuda ɓaditi ɓe, hoofni ɓe, ƴami njamu maɓɓe.

²²Ammaa nder yahduɓe bee Daawuda woodi woɗɓe halluɓe e meere'en. Kamɓe ɓe mbi'i: “Ɓe njahdaay bee meeɗen nder haɓre, ngam maajum ɓe ngalaa geɗal haa keɓal konu. Koo moy heɓtan debbo mum e ɓikkoy mum tan, ɓe koo'a ɓe, ɓe ndilla.”

²³Ammaa Daawuda wi'i: “Deerɗiraaɓe am, fotaay on mbaɗa bana nii bee ko Jawmiraawo hokki en. Kaŋko ayni en, o hokki en jaalorgal dow mooɓre hippooɓe ɓe'e.

²⁴Walaa mo yerdoto ko mbi'ɗon. Ndaa ko foti: Jahɗo konu e aynuɗo kuuje saŋngeere cenndan keɓal konu kal-kal.”

²⁵Daawuda laatini ɗum umroore nder Isra'iila diga nyalaade maajum haa wargo hannde.

²⁶Nde Daawuda warti Cikilak, o hoo'i geɗe haa keɓal konu, o neldi ɗe haa sooba'en maako ndotti'en Yahuuda. O wi'i: “Ndaa geɗal mooɗon nder keɓal konu ngal keɓɗen diga konne'en Jawmiraawo.”

²⁷O neldi dokke man haa Baytila e Ramot nder Lesdi Fombina e Yattir,

²⁸haa Aro'er e Sifmot e Estemo'a,

²⁹haa Rakal e berniiji Yerahameeli'en e berniiji Keni'en,

³⁰haa Horma e Bor-Asan e Atak,

³¹haa Heburuun e nokkuuje fuu haa Daawuda e worɓe mum keɓno hisrude.