Read Fulfulded 1 Samuyila 31 Bible Online

1 Samuyila 31 - Fulfulded bible

1 Samuyila 31

¹Filisti'en kaɓi bee Isra'iila'en haa hooseere Gilbo'a. Isra'iila'en ɗuuɗɓe mbaraama ton, luttuɓe boo ndoggi.

²Filisti'en taasni Sawulu e ɓiɓɓe mum. Ɓe mbari Yonatan e Abinadabu e Malkisu'a, ɓiɓɓe Sawulu.

³Haɓre saati dow Sawulu. Nde fiɗooɓe kuri keɓti mo, o hultori masin.

⁴Sawulu wi'i doondoowo balmi mum: “Los kaafahi ma, yuwam, ngam taa saadooni'en ɓe'e ngara, njuwammi, pijirammi.” Ammaa doondoowo balmi maako sali, ngam o huli masin. Ngam maajum Sawulu hoo'i kaafahi mum, do'i dow maaki.

⁵Nde doondoowo balmi go yi'i Sawulu maayi, o losi kaafahi maako, kaŋko boo o do'i dow maaki, o maaydi bee laamiiɗo.

⁶Bana nii Sawulu e ɓiɓɓe mum e doondoowo balmi mum e worɓe mum fuu maaydi nyalaade man.

⁷Isra'iila'en wonɓe gaɗa waadiwol e gaɗa Urdun, nde ɓe ngi'i jama'aare konu Isra'iila doggi, Sawulu e ɓiɓɓe mum boo maayi, ɓe acci berniiji maɓɓe, ɓe ndoggi. Filisti'en ngari, njooɗi nder berniiji man.

⁸Jaŋngo maajum Filisti'en ngari ngam ɓoftugo kuuje mbaraaɓe. Ɓe tawi Sawulu e ɓiɓɓe mum tato ɗon mbaali dow hooseere Gilbo'a.

⁹Ɓe ta'i hoore Sawulu, ɓe ɓorti mo balmi maako. Nden ɓe neldi ɗi koo toy nder lesdi Filisti'en ngam yahrugo habaru jaalorgal haa cuuɗi labbi maɓɓe e haa yimɓe fuu.

¹⁰Ɓe ndesi balmi Sawulu nder suudu Astarot, lawru maɓɓe rewru. Ɓe ɓili ɓanndu maako haa mahol taariiŋgol Baytisaanu.

¹¹Yimɓe wonɓe haa Yaabes nder lesdi Gile'at nani ko Filisti'en mbaɗi Sawulu.

¹²Worɓe maɓɓe semmbiɗɓe fuu ummi, njehi jemmaare man fuu. Ɓe ɓilti ɓanndu Sawulu e ɓalli ɓiɓɓe mum haa mahol Baytisaanu, ɓe njahri ɗi haa Yaabes, ɓe nguli ɗi ton.

¹³Nden ɓe koo'i i'e maɓɓe, ɓe uwi ɗe les lekki aslahi haa Yaabes, ɓe cuumi nyalɗe joweeɗiɗi.