Read Futuna-Aniwa MATHIUS, 10 Bible Online

MATHIUS, 10 - Futuna-Aniwa bible

MATHIUS, 10

¹NOPOGERA aia nitapa iateia niana twelv tagata aia nifakairo, aia neitufwa acre tomatua keisegeake agelo isa, ma keipenpena iotshi amace ma amy o tagata.

²Aneigo o acre ta twelv apostolo hepra; Aia mokagi Saimona, nitapa neigo tshana Pitrus, ma Antreus tsho noso; Jacobus ta nontariki o Sebeteius, ma Joanes tsho noso;

³Filipos ma Bartholomius; ma Mathius tatane niamo mune neitufwa teriki; Jakobus ta nontariki o Alfius, ma Lebius, nitapa neigo tshana mokagi Thatius;

⁴Saimona tatane o fanua Selotai, ma Jutas tatane o kariot, aia nifakareresia aia.

⁵¶ Acrera twelve Iesu nikowna watafa, ma neitucage iacre, nokoutucua; Natshicina kororo acowa ia teretu o tagata o fanua pouri, ma ia tumrai tasi o tagata o fanua Sameria natshicina acowa roro iai.

⁶Kaia karoro acowa ia sip nimuni o tafare o tagata Isreil.

⁷Hepe acowa roro, nokova, nokoutucua, Tavaka o taragi koitata.

⁸Penpena acowa tagata komace, penpena koma acre amace o leprose, keimna masike tagata nimate, segeake agelo isa; Avau eitufwa ana acowa anera, acowa eitufwa ana tagatotshi.

⁹Natshicina acowa kamo colt, mo selver, mo bras ia takato tshowa iateia.

¹⁰Natshicina kamo akato sore ia kororo tshowa, ma jimra kot erua, ma jimra ashu, ma jimra atokotoko; ma erefia tagata vere fakeina acreiotshi iateia.

¹¹Ia tumrai sore mo sisi acowa kororo iai, kafakowia iai akai erefia arafia acowa ia niana fare; ma kanofo iai ia taha nopoge acowa karoce iai.

¹²Pe acowa nikaromai efare tasi, karofa aia.

¹³Pe tafare tira erefia iateia, nagi tshou karofa ia aia, kaia pe aia isa, erefia tshou karofa komai foci iacowa.

¹⁴Ma pe faru natshicina arafia acowa, ma natshicina fakarogona tshowa afasao, taha nopoge acowa karocea tafare tira mo tumrai tira, tuctuciace tefu takere o tshow avai.

¹⁵Tamari avau koutucua iacowa Fakamata o Sotom, ma o tagata o Comora fakasisi ia nopogi wamuri, kaia fakamata sore kagi o tumrai tira.

¹⁶¶ Kowcitia, Avau kowna acowa hepe asip arotorea o akuli eiro; ia ane tira erefia acowa arapakau hepe agata, ma seiauiai ane hepe magane o afoitu.

¹⁷Kaia fakasara tagata acowa; ma acre karafia acowa ia tagata arapakou kofasao, ma acre katacritshia acowa ia afare mori tshare;

¹⁸Acre karafia acowa ma mokagi fakau sore ma fateriki ma tshowa acitiafakarafia iatavu, ma keitucuasana magane o acre ma tagata o fanua pouri.

¹⁹Kaia ia taha nopoge acre karifia katufwa acowa iacre, natshicina acowa kamintua taha afasao acowa katucua; ma aia katufwa iacowa ia taha our tira afasao acowo katucua.

²⁰Ma jimra acowa ana fasao, kaia ta Nokano o Tamanowa nokofasao i arotowa.

²¹Ta noso katufwa acre ta noso ia ta mate, ma ta mana ta nuntama; ma erecriki kamasike feimacowa ta mana ma nana, fakataia acre komate.

²²Tagatotshi ma kafeimacowa acowa ma tshowa acitiafakarafia tshaku neigo; kaia aia kacitiafakarafia mukei avau ia taha nopoge wamuri aia kafano taragi.

²³Kaia taha nopoge acre fakoko acowa ia tumrai sore tenei, kafura acowa ia tumrai tasi foci; ma tamari avau koutucua iacowa, Acowa sekororo ia umrai sore iotshi o Isreil, mokagi ta Nontariki o tagata komai.

²⁴Tagata fakarogona fakairo jimra sore mokagi aia fakairo aia, mo tafitshicou sore mokagi tshana teriki.

²⁵Erefia pe aia fakarogona tafasao konofo hepe aia fakairo aia, ma ta fitshicou hepe tshana teriki. Pe acre neitapa neigo o ta teriki o ta fare Belsebub, foci acre katapa sore isa acre o tshana fare, mo?

²⁶Natshicina acowa kumtacu acre anira, ma jimra ane tasi niapotshia, kaia tagata kacitia aia; mo nifuna, kaia aia kafakairo aia.

²⁷Taha avau fasao iacowa ia apouri, koutucua acowa ia merama; ma taha acowa fakarogona ia teregowa, tira acowa kova, ia tupo afare ilugia.

²⁸Natshicina acowa kumtacu acre kotshi komate notshino, kaia acre kotaru kotaia komate ta nokano; kaia erefia acowa kumtacu aia tomatua takaroiai ta nokano ma ta notshino ia tiafi sore.

²⁹Erua amanu sisi fakamata tasi farthig, mo jimra? mo tasi o acrawa sekoto ia takere ma Tamanowa puspusi.

³⁰Kaia kobune tawa iotshi auru o tshou nouru.

³¹Natshicina acowa kumtacu anira, fakamata o acowa sore su mokagi amanu sisi nalupai.

³²Aia akai katucua avau emoa tagata, aia foci avau katucua emoa tshaku tata aia konofo ia taragi.

³³Kaia aia kafeiva puspusi avau emoa tagata, aia avau foci kapuspusi aia emoa tshaku Tata aia konofo ia taragi.

³⁴Natshicina kamintua acowa avau komai keifakamoi iafanua wararoni; avau semai keikowna fakamoi wararoni, kaia ta tomatshira palo.

³⁵Ma avau komai keimna tatane kofiatu tshana mana, ma ta nofine kofiatu tshana nana, ma tufugona kofiatu tshana nanogovai.

³⁶Ma tagata feimacowa tatane acre konofo ia tshana fare.

³⁷Aia acitiafakarafia ta mana mo nana sore kagi avau, aia isa iatavau; ma aia acitiafakaraia tshana nontariki mo tshana nofine sore kagi avau, aia isa iatavau.

³⁸Aia foci sepurutshia tshana fakaravasia ma komai muri iatavau, aia isa iatavau.

³⁹Aia kapurutshia tshana ania amouri, katowaki aia iateia; ma aia tshana ania mouri kamerigi iatavau aia kamo aia.

⁴⁰Aia kamo acowa kamo avau, ma aia kamo avau, kamo foci aia nikowna avau.

⁴¹Aia amo tasi aprofeta ia ta neigo o aprofeta, aia kamo ta fakamata o ta profeta, ma aia amo ta tane maganerefia, ia neigo o ta tane maganerefia, aia kamo fakamata o ta tane maganerefia.

⁴²Aia ma katufwa keinumea ia tasi o erecriki tira ta kup o tavai mukaligi ia neigo o tagata avau fakairo, tamari avau kautucua iacowa, tshana fakamata sekamerigi.