Read Futuna-Aniwa MATHIUS, 11 Bible Online

MATHIUS, 11 - Futuna-Aniwa bible

MATHIUS, 11

¹ANE nei nimai iai, nibune afasao o Iesu ia niana tagata aia nifakairo ta twelv, aia nifeke none iai keifakairo ma keikova ia umrai sore tshare.

²¶ Iai Joanes nifakarogona ia tafare mukei avere o Kristo, aia nikowna erua o niana tagata aia nifakairo.

³Neitucage iateia, Akoi aia erefia komai mo acime katari ia tasi foci?

⁴Iesu nifasao neitucage iacrawa, Roro akorua ma fakairo Joanes foci ane iotshi akorua fakarogona ma kowcitia;

⁵Acre afoimata pouri nakamo foimata merama, ta sape roro erefia, ta leprose penpena erefia, ta tarega tuturi fakarogona erefia, tagata mate kamasike, ia acre konofo ana nokova afasao erefia.

⁶Ma erefia aia kanatshicina aroto feimacowa avau.

⁷¶ Hepe acrawa niroro Iesu neikamata keifasao ia amotu tagata afasao ia Joanes, Taha acowa niroro watafa ia tugogau keicitia? Tagasao nigarue ia tumtagi?

⁸Kaia taha acowa niroro watafa keicitia? Tatane nitaka ia tumega meruru? Kowcitia acre kataka ia tumega meruru konofo efare o fateriki.

⁹Kaia taha acowa niroro watafa keicitia? Ta profeta? Keini, avau kautucua iacowa aia, ma aia sore kagi ta profeta.

¹⁰Ma tenei aia, neisereace o aia, Kowcitia, Avau kawna tshaku fitshicou emoa tshou foimata, aia kapenpena tshow aretu emoa akoi.

¹¹Tamari avau koutucua iacowa, Ia acre nifarere o afine jimra tasi sore kagi Joanes ta Baptiso; kaia aia ta sisi ia tavaka o taragi aia sore kagi aia.

¹²Ma wamuri anopogera o Joanes ta Baptiso ia nopoge nei ma ta vaka o taragi kofere, ma acre tomatua amo aia ia tomatua tshare.

¹³Ma iotshi aprofeta ma afasao tapu nifakairo ane komai ia anopogera o Joanes,

¹⁴Pe acowa kafarogona tenei ko ta Elaija, acre neitucua aia kamai.

¹⁵Aia tshana nontarega keifakarogona, erefia aia fakarogona.

¹⁶¶ Kaia ia taha avau katucua fakatagasia o tagata konofo milownei? Acre hepe atamerecriki nokonofo ia merai, ma nokotapa tshare anele.

¹⁷Nokoutucua, Acime nifagosia iacowa, ma acowa sekomako iateia, acime nitagi iacowa, ma acowa semakuru mana.

¹⁸Ma Joanes nimai sekeina mana ma senumeia mana, ma cre neitucua, Aia niamo tasi agelo isa.

¹⁹Ta Nontariki o tagata nimai nokokai ma nokoinumea ma acre koutucua, Kowcitia tatane nokokia fakasore takai, ma nokoinumea fakasore aweina, ta nele o acre niamo mune tsha teriki, ma o tagata isa. Kaia Arapakau kowcitia maganerefia ia niana erecriki.

²⁰¶ Nopogera aia neikamata kaiseciria umrai sore iai ia acre aia neimna nalupai vere sore tshana, ia ane nei, acre sefeimacowa ma senatshicina maganisa tshare;

²¹Kawe iatakoi Koresin! Kawe iatakoi Bethseta! ma pe avere sore neimna ia akorua milow, neimna ia Tairus ma Saiton acrawa nifeimacowa ma neinatshicina tsharawa maganisa ituai; ma nitagi iateia ia umega mukei ma nokamopaku.

²²Kaia avau koutucua iacowa, Fakamata fakasisi o Tairus ma Saiton ia nopoge wamuri, fakamata tshowa sorekagi.

²³Akoi ma Kaperneum kosore iluga ia taragi, kateifo akoi iraro ia tiafi sore; ma pe avere sore neimna i akoi, nikeima ia Sotom, aia nokonofo ia nopoge nei.

²⁴Kaia avau koutucua iacowa, Pe fakamata o fanua Sotom fakasisi ia nopoge wamuri, fakamata tshou fakasore.

²⁵¶ Ia nopogera Iesu nifasao neitucage, Avau kabisa iatakoi Tata, Teriki sore o taragi ifanua wararonei, ia ane nei akoi nakafuna anera ia tagata arapakau ma nifakairo, ma akoi nifakairo anera ia atamerecriki.

²⁶Erefia tira Tata, ma akoi neicitiafakarafia keicitia hepra.

²⁷Ane iotshi neitufwa avau ia tshaku Tata, ma jimra tatane tasi nakeiro ta Nontariki kaia Tamana ana; foci jimra tasi tatane nakeiro Tamana kaia ta Nontariki ana, ma aia foci ta Nontariki kafakairo aia.

²⁸¶ Komai iatavau acowa iotshi vere sore keitomea ma amoga, ma avau katufwa acowa kogapu.

²⁹Amo acowa tshaku tererakou amoga, etoutari avau; ma avau kuroto mugaro ma totonu, ma acowa kamo kogapu ia nokano tshowa.

³⁰Ma tshaku tererakou amoga komeru, ma tshaku amoga komama.