Read Futuna-Aniwa MATHIUS, 14 Bible Online

MATHIUS, 14 - Futuna-Aniwa bible

MATHIUS, 14

¹NOPOGERA Herot ta teriki nifakarogona afasao o avere o Iesu.

²Aia neitucage ia niana afitshicau. Tira Joanes ta Baptiso; aia komasike ia acre nimate, ia ane nei aia neimna avere sore.

³¶ Ma Herot neipurutshia Joanes, nifousia aia ia ta fare mukei, feimacowa aia, ma Herotaius inahune o tshana noso Filipus.

⁴Ma Joanes neitucage iateia, Itapu akoi arafia aia tshou inahune.

⁵Nopogera aia acitiafakarafia neitshi aia keimate, aia nimtacu tagatotshi, ma acre neitucua aia ta profeta.

⁶Kaia ia nopogera acre nibisa iateia, nana o Herot nifarere aia iai, ta atamafine o Herotaius nimako emoa acre, ma Herot nibisa iateia.

⁷Iai aia neitucua tafasao tapu mukei keitufwa aia taha aia nogia.

⁸Ma tshana, nana mokagi nifakairo aia iateia, neitucage, Eitufwa avau icunei ta nouru o Joanes ta Baptiso ia taganea.

⁹Noroto o tereki nimai iateia, kaia ianenei niana tafasao tapu mukei iateia, ma acre neinofo ia takai iateia, aia neitucua keitufwa ta nouru ia aia.

¹⁰Aia nikowna ma nitoutshiace nouru o Joanes ia tafare mukei,

¹¹Niamai tshana nouru ia taganea neitufwa aia ia atamafine; ma aia nimai aia ia tshana nana.

¹²Niana tagata aia nifakairo niromai, niamke ta noaga ma tanumea aia, ma niroro neitucage Iesu.

¹³¶ Iai Iesu nifakarogona tira, aia nefeke iai nisua ia ta vaka ia none tugogau; nopogera tagata nifakarogona tira, acre niroro wamuri i avai tshare niroce umrai.

¹⁴Iesu nifano watafa, neicitia tagata nalupai su nifetacina iai tshana roto karofa iacre, ma aia neipenpena tshare amace.

¹⁵¶ Tefiafi nimai iai niana tagata aia nifakairo niromai iateia, nokoutucua, None nei tugogau, ma nopoge itata fiafi; kownace tagata nalupai su nifetagina icunei, pe acre kororo ia umrai sisi keifakamata tshare akai.

¹⁶Kaia Iesu neitucage iacre, Natshicina acre kororo, Acowa katufwa iacre akai kakeina.

¹⁷Acre neitucage iateia, Acime niamo icunei erima ana aofa, ma erua eika.

¹⁸Aia neitucage, Amai acre iatavau.

¹⁹Aia neitucua tagatotshi nifetacina iai keinofo ia tagaferi, ma aia niamo erima aofa, ma erua eika, nokofakatariaga ia taragi aia nimori iateia, neitoututshia aofa neitufwa niana tagata aia nifakairo, ma tagata aia nifakairo neitufwa tagatotshi nifetacina iai.

²⁰Acreiotshi iai nikeina, nimakona; acre nifetacina nopitopito nokonofo iai wamuri nifau twelf akato sore nifonu.

²¹Acre nikeina iai hepe faiv thousant tatane; afine ma erecriki foci iai setawamana.

²²¶ Milowa Iesu neitucua mukei niana tagata aia nifakairo keisopo ia ta vaka, keisua mokagi aia ia nofokagi tatai, kaia aia neinofo nikownace tagatotshi nifetacina iai.

²³Wamuri aia nikownace tagatotshi, aia nifano iluga aora tasi keimori iai; tefiafi nimai, aiana neinofo iai.

²⁴Kaia tavaka neinofo ia tamana fakatulele ia apiau, ma tumtagi isa.

²⁵Ia nopito tupa efa Iesu nifano iacre, nitakaro ia tatai.

²⁶Niana tagata aia nifakairo neicitia aia nitakaro ia tatai, acre nimtacu nokoutucua, Aia tetua; acre nitagi iai nimtacu.

²⁷Kaia milowa Iesu nifasao iacre. nokoutucua, Kabisa acowa, aia avau; natshicina kumtacu acowa.

²⁸Pitrus nifasao iateia, neitucage, Teriki sore, pe akoi iai, nogia avau komai iatakoi ia tavai,

²⁹Aia neitucage, Komai. Iai Pitrus nimai nisopocea ta vaka, aia nifano iluga tatai, keifano ia Iesu.

³⁰Kaia iai aia neicitia tumtagi sore isa, aia nimtacu; neikamata keikero, aia nitapa, nokoutucua, Teriki sore kapare avau.

³¹Milowa Iesu nifakatonusia tshan orima, nipurutshia aia, neitucage iateia, Kowe akoi fakarogrogo sisi, tiaha akoi nimtacu?

³²Iai acrawa niromai ia ta vaka, tumtagi nijimra.

³³Iai acre neinofo ia ta vaka niromai nimori aia, nokoutucua, Tamari akoi Ta Nontariki o Atua.

³⁴¶ Acre nisuace, nofokagi iai, acre niromai ia fanua Jenesaret.

³⁵Nopogera tagata o fanua iai nifakarogona o aia, acre nikowna kofori iotshi fanua iai, ma niarafia iateia iotshi tagata nimace;

³⁶Ma nogia aia pe acre tofia ana nuntafa tshan umiga; ma acreiotshi pe neitofia neipenpena erefisa ana.