Read Futuna-Aniwa MATHIUS, 16 Bible Online

MATHIUS, 16 - Futuna-Aniwa bible

MATHIUS, 16

¹AFARASI ia Asatusi niromai nokafakarogeina, nogia aia pe acre kacitia aia keimna tasi vere sore o taragi.

²Aia nifasao neitucage iacre, Pe fiafi komai acowa koutucua, kamasana aratu; ma taragi ouroura.

³Ma ia tapopo, Towa koto iranei; ma taragi ouroura matoru. Kowe acowa tagata aroto erua, acowa arapakau keicitia magane o taragi; kaia acowa sekeiro nokano o avere sore anopoge milownei, mo?

⁴Tagata milownei isa ma tshigo afine nokofakowia keicitia ane sore o taragi; ma jimra kavagi acre ane sore o taragi, kaia ane sore o ta profita Jona. Aia natshicina acre, nifeke iai.

⁵¶ Nopegera niana tagata aia nifakairo niromai ia nofokagi, acre nigaro keiamo aofa.

⁶Iai Iesu neitucage iacre, Fatshigeia ma natshicina acowa ta leven o tagata Afarasi, ma o tagata Asatusi.

⁷Acre nifasao macre, nokoutucua, Ia ane nei acime nigaro keiamo aofa.

⁸Iai Iesu nikeiro tira, aia neitucage iacre, Kowe acowa fakarogrogo sisi, tiaha acowa kofasao iacowa ia ane nei, acowa seamo aofo?

⁹Sekeiromana acowa, foci sekamintua acowa ta aofa erima o ta faiv thousant, ma wamuri efia akato sore acowa nefau nifonu?

¹⁰Foci jimra ta fitu aofa o ta for thousant, ma wamuri efiia akato sore nifau nifonu?

¹¹Tiaha acowa sekeiromana pe avau sefasao acowa o aofa, kaia pe acowa fatshigeia ma natshicina ta leven o Afarasi ma o Asatusi?

¹²Wamuri tira acre nikeiro aia nifakairo acre jimra natshicina leven o aofa, kaia ta leven afaikairo o tagata Afarasi ma o tagata Asatusi.

¹³¶ Nopogera Iesu nimai ia watai o fanua o Sisaria Filipai, aia nifakowia niana tagata aia nifakairo, nokoutucua, Tagata koutucua avau ta Nontariki o tagata akai?

¹⁴Acre neitucage, Faru koutucua pe akoi Joanes ta Baptiso, faru Eleija, ma faru Jeremaia, mo tasi o acre aprofeta ituai.

¹⁵Aia neitucage iacre, Kaia acowa koutucua avau akai?

¹⁶Saimona Pitrus nifasao neitucage, Akoi ta Kristo, ta nontariki o o Atua komouri.

¹⁷Iesu nifasao neitucage iateia, Erefia akoi, Saimona ta nontariki o Jona; ma tagata sefakairo akoi tira, kaia tshaku Tata aia konofo ia taragi.

¹⁸Avau koutucua foci iatakoi, Pe akoi Pitrus, ma iluga tafatu nei, avau kafakaturia tshaku ta Kalasia ma atomatua o tumrai isa setaroce aia.

¹⁹Avau katufwa akoi aki o tavaka o taragi; tagata akai akoi kafousia ia afanua wararoni, kafousia ia taragi, ma akai tagata akoi eivetea ia afanua wararoni kavetea foci aia ia taragi.

²⁰Iai aia neitucuasana niana tagata aia nifakairo, pe acre sekoutucua tatane tasi aia Iesu ta Kristo.

²¹¶ Wamuri nopoge tira Iesu neikamata keifakairo niana tagata aia nifakairo, pe taha nopoge aia kafano ia Jerusalem, ma nimy o ane nalupai o tagata sore, ma o tagata fatoriki o tafare mori, ma o tagata fakairo, ma kataia aia komate, ma ia nopoge toru wamuri aia kamasike kamouri foci.

²²Iai Pitrus niamo aia, neikamata keisaciria aia, nokoutucua, anera kanofo papai iatakoi Teriki sore; anera sekamai iatakoi.

²³Kaia aia nitafuri ma neitucage ia Pitrus, Fano akoi wamuri avau Satana; akoi takaroiai avau; ma akoi sectiafakarafia ane o Atua, kaia anea o tagata.

²⁴¶ Iai Iesu neitucage niana tagata aia nifakairo, Pe tatane tasi kamai wamuri avau, erefia aia natshicina anea aia acitiafakarafia, ma amo tshana fakaravasia ma komai wamuri avau.

²⁵Ma pe tasi tagata kapurutshia tshana aniamouri, aia kaiauiai aia, ma pe tasi tagata kaiauiai tshana aneamouri iatavau aia kamo aia.

²⁶Ma taha erefia tasi ia tatane, pe aia kamo iafanua iotshi ma iauiai tshana nokano iateia? mo taha tatane katufwa keiioria tshana nokano?

²⁷Ma ta Nontariki o tagata kamai ia tomatua o Tamana ia niana agelo, i nopoge tira aia kaioria tagatotshi hepe tshare avere.

²⁸Tamari avau koutucua iacowa, Faru tagata nokotu icunei acre semate mana mokagi acre kaucitia ta Nontariki o tagata nokomai ia tshana vaka.