Read Futuna-Aniwa MATHIUS, 18 Bible Online

MATHIUS, 18 - Futuna-Aniwa bible

MATHIUS, 18

¹INOPOGERA tagata aia nifakairo nimai ia Iesu, nokoutucua, Akai aia ta sore ia tavaka o taragi?

²Iesu nitapa tamasisi iateia, ma neinage aia ia arotorea o acre.

³Neitucage, Tamari avau koutucua iacowa, Pe acowa secitiafakarafia Atua ia arotowa, ma magane tshowa hepe erecriki acowa sekaroro ia ta vaka o taragi.

⁴Akai o tagata pe aia nagi tshana roto iraro hepe tamasisi nei, aia ta sore ia ta vaka o taragi.

⁵Akai foci pe aia kamo tasi tamasisi hepe nei ia tshaku neigo aia kamo avau.

⁶Kaia akai pe aia takaroiai aroto o tasi o acre atamasisi ra fakarogrogo avau, erefia iathia pe tasi tafatu soroa ma penpena flou nitouria ko fori nupenwa tshana, ma aia kokero ia ta mana tatai.

⁷¶ Kowe ia tafanua wararonei ma takaroiai tshana! ma tamari ane takaroiai nalupai kamai taha nopoge, kaia kowe ia tatane nei amai ane takaroiai.

⁸Ia ane nei pe tshau norima mo tshau novai takaroiai akoi, toutshice acrawa, ma towaki acrawa; erefia iatakoi keitano ia aneamouri sape, mo nopito tshou notshino toutshice, isa keipurutshia erua norima mo erua novai keitowaki akoi iateia ia tiafi sore.

⁹Pe tshou foimata takaroia akoi keriace aia ma towaki aia, erefia akoi keifano taragi ia foimata tasi, isa keipurutshia erua foimata keitowaki akoi iateia ia tiafi sore.

¹⁰¶ Fatshigeia acowa pe acowa sefeimacowa tasi o acre erecriki; ma avau koutucua iacowa, Pe ia taragi tshare agelo tou ma tou kowcitia foimata o tshaku Tata nokonofo ia taragi.

¹¹Ma ta Nontariki o tagata komai fatshigeia ma kapare acre nito isa.

¹²Taha acowa kamintua? Pe tatane tasi nakamo wun huntrit asip, ma tasi o acre nifano ia teretu safi, aia natshicina ta nainte nain, ma fano ia aora kasara aia nitere.

¹³Pe aia kowcitia aia, tamari avau koutucua iacowa, Aia kabisa sore kage ia ta sip tira, mokagi acre ta nainte nain sefura.

¹⁴Hepra tshou Tamana ia taragi secitiafakarafia, pe tasi o erecriki tira takaroiai.

¹⁵¶ Foci, pe tshou noso iauiai tshou roto, fano keifasao aia iateia akoi ma aiana, pe aia kafakarogona, akoi kapare tshou noso.

¹⁶Kaia pe aia sefakarogona akoi, arafia tasi mo erua foci tagata nifakarogona ma keiro tamari tshou afasao totonu iateia.

¹⁷Pe aia sefakarogona acrawa, koutucua ane tira ia ta kalasia, kaia pe aia sefakarogona ta kalasia, erefia akoi natshicina aia hepe tatane o fanua pouri, mo tatane amo mune tsha teriki.

¹⁸Tamari avau koutucua iacowa, ane iotshi acowa kafousia ia fanua wararoni kafousia ia taragi; ma ane iotshi acowa kavetea ia fanua wararoni kavetea iu taragi,

¹⁹Foci avau koutucua iacowa, Pe erua o acowa arotowa tishana ia takere wararoni kanogia ane, ane nei katufwa acrawa ia tshaku Tata nokonofo ia taragi.

²⁰Ma none wehe erua mo toru tagata kafitacina ia tshaku neigo avau iai ia aroto o acre.

²¹¶ Iai Pitrus nimai iateia neitucage Teriki sore, tshici efia tshaku noso takaroiai kuroto, ma avau towaki tshaku fakainina iateia? Tshici fitu, mo jimra?

²²Iesu neitucage iateia, Avau sekoutucua iatakoi, Tshici fitu; Kaia, Ia sevente tshici fitu.

²³¶ Ia ane nei tavaka o taragi hepe tasi teriki aia acitiafakarafia keiro magane o tshana afitshicou

²⁴Nopogera aia neikamata keiro tshare magane, niarafia tasi iateia seioria mana ten miliun tolar.

²⁵Kaia ia ane nei tshana toutokogane ia fakamata jimra, tshana teriki nifakairo acre fakamata aia, ma tshana inahune, ma tshana erecriki, ma ane iatshi tshana, keiioria aia.

²⁶Ta fitshicou iai nito, nimori aia iateia, nokoutucua, Teriki natshicina avau nagimana, ma avau kaioria akoi ane iotshi.

²⁷Iai ta teriki o fitshicou tira karafeina aia, eivetea tshana vava, ma natshicina iotshi fakamata neinofo iateia.

²⁸Kaia ta fitshicou tira nifano watafa, aia neicitia tasi foci o afishicou tsha teriki tira, aia seioria aia feftin tolor; aia neipurutshia aia, neicumia tshana fatshigerio, nokoutucua, Ioria avau ane iotshi nofo iatakoi.

²⁹Niana foci fitshicou o teriki nito emoa tshan avai nifakowia mukei aia, nokoutucua, Natshicina avau nagimana ma avau kaioria akoi ane iotshi.

³⁰Kaia aia senatshicina; kaia nifano towaki aia ia tafare mukuei, ia taha nopoge aia kaioria ane iotshi.

³¹Niana foci afitshicou neicitia taha aia neimna, arotorea nimy sore iateia, acre niromai neitucua tshare teriki ane iotshi aia neimna.

³²Iai niana teriki wamuri aia neitapa aia, neituca iateia, Kowe akoi fitshicou isa ana, ava natshicina iotshi fakamata tshou, ia ane nei akoi neinogia avau iateia.

³³Tiaha akoi foci sekarafeina tshaku fitshicou foci, hepe tshaku nikarafeina iatakoi?

³⁴Tshana teriki nifakainina sore iateia, neitufwa aia ia tagata niratshia ta fare mukei, ia nagimana aia nakaioria tshana ane iotshi.

³⁵Hepra foci thsaku Tata ia taragi kamna ia cowa, pe acowa ia arotowa setowaki tasi ma tasi foci ioria o ane iotshi niawa noso iauiai aroto iateia.