Read Futuna-Aniwa MATHIUS, 19 Bible Online

MATHIUS, 19 - Futuna-Aniwa bible

MATHIUS, 19

¹NOPOGERA Iesu kurava iotshi afasao tira, aia nifeke ia Calili, ma nimai ia watai o Juteia nofokagi Jortan.

²Tagata nalupai su niroro wamuri aia; ma aia neipenena acre iai.

³¶ Afarasi foci nimai iateia, nokotogofia aia, nokoutcua iateia, Mugaro tatane towaki tshana nahuna ia magane iotshi, mo jimra?

⁴Aia nifasao neitucage iacre, Tiaha acowa setawa mana, pe aia neimna acrawa ia nontafito, neimna acrawa tatane ma tafine,

⁵Neitucage, Ma ane nei, tatane kanatshicina tshana tamana ma nana, ma kanofo fakiliki ia tshana nahune, ma acrawa hepe tishana notshino.

⁶Ia ane nei wamuri nei acrawa jimra erua, kaia hepe tishana notshino, Akai hepra Atua nifousia hepe tishana, itapu tagata eivetea.

⁷Acre neitucage iateia, Tiaha Moses nifakairo keitufwa aia tatapuria neisiria iateia, ma keisigiake aia?

⁸Aia neitucage iacre, Moses ia ane nei arotowa mukei nifakairo acowa keitowaki tshowa nahune, kaia ia ta nontafito aia jimra hepra.

⁹Avau koutucua iacowa, Pe tatane tasi katowaki tshana nahune, kaia ma nitshigo tatane ana, ma pe aia karafia sece nahune, aia kotshigo ta fine tsha faruke; ma pe tatane tasi foci arafia tafine aia nitowaki, aia kotshigo tafine tsha faruke.

¹⁰¶ Tagata aia nifakairo neitucage iateia, Pe magane o tatane ia tshana nahune hepra, isa keiarafia nahune.

¹¹Kaia aia neitucage iacre, Tagatotshi sekeiromana afasao tira, kaia iacre keitufwa keiro.

¹²Ma faru tatane iunuka, nana nifarere acre hepra, ma faru iunuka, tagata neimna acre iunuka, ma faru iunuka, acre ana neimna acre iunuka ma tshare acitiafakarafia o tavaka o taragi. Aia arapakau keiro anera, erefia aia kiero.

¹³¶ Nopogera iai acre niarafia iateia erecriki, pe aia fecitshia tshana norima iluga acre, ma mori; tagata aia nifakairo neisaciria acre iateia.

¹⁴Kaia Iesu neitucage, Arafia, erecriki, ma jimra neitucuasana acre, koromai iatavau; ma o acre hepra ko ta vaka o taragi.

¹⁵Aia nefecitshia tshana norima iluga acre, ma nifeke iai.

¹⁶Neicitia, tasi nimai neitucage iateia, Teriki Erefia, taha ane erefisa avau kamna, pe avau kamo anea mouri tou ma tou?

¹⁷Aia neitucage aia, Tiaha akoi neitucua avau erefisa? Jimra tasi erefia kaia tasi ana Atua; kaia pe akoi acitiafakarafia keifano ia anea mouri, maganerefia hepe fakairo o afasao tapu.

¹⁸Aia neitucage iateia, Akai o acre afasao tapu? Iesu neitucage, Akoi kanatshicina kotaia tagata, Akoi kanatshicina tshigo fafine tsha faruke, Akoi kanatshicina tshigofia iotshi, Akoi kanatshicina keiresia tagata.

¹⁹Maganerefia ia tamau ma nau; ma Akoi kacitiafakarafia tagata konofo fakaliki hepe akoi acitiafakarafia akoi.

²⁰Ta atumtane neitucage iateia, Ane iotshira avau nakamna ia nopoge avau tamasisi, milownei ma; taha avau semaganerefia iateia?

²¹Iesu neitucage iateia, Pe akoi acitiafakarafia maganerefia iotshi, fano fakamata toutokogane tshau, ma keitufwa acre niare ane jimra, ma tshau fakamata katufwa ia taragi; ma komai wamuri avau.

²²Kaia wamuri atamtane nifakarogona afasao tira, aia nifano tshana retu tshana roto nimy iateia, ma niana toutokogane nalupai su.

²³Iai Iesu neitucage niana tagata aia nifakairo, Tamari avau koutucua iacowa, Pe tatane tasi toutokogane nalupai tshana mukei aia fano ia tavaka o taragi.

²⁴Foci avau koutucua iacowa, Aia komeru ta kamela keifano ia fakafotu o ta suci, mukei tatane toutokogane tshana nalupai fano ia tavaka o Atua.

²⁵Iai niana tagata aia nifakairo nifakarogona tira, acre nimasaro sore su, nokoutucua, Akai o tagata kafano taragi, mo?

²⁶Kaia Iesu neicitia, ma neitucage iacre, Ia tagata tira mukei, kaia ia Atua ane iotshi meru.

²⁷¶ Iai Pitrus nifasao neitucage iateia, Kowcitia acime natshicina ane iotshi, ma niromai wamuri akoi; taha katufwa acime iateia?

²⁸Iesu neitucage iacre, Tamari avau koutucua iacowa, Pe acowa niromai wamuri avau, ia maganerefia, ia taha nopoge ta Nontariki o tagata kanofo ia ta fata (thron) i ta vaka o tshana nokobisa, acowa foci kanafo ia twelv afata, nokoioria ta twelv afoga o tagata o Isreil.

²⁹Ma iotshi tagata natshicina afare, mo anoso, mo akave, mo tamana, mo nana, mo nanahune, mo erecriki, mo afanua, ma tshana acitiafakarafia ia tshaku neigo, katufwa aia tshici wun huntret, ma kamo anea mouri tau ma tau.

³⁰Kaia nalupai nitapa acre mokagi, acre kamuri; ma acre wamuri kamokagi.