Read Futuna-Aniwa MATHIUS, 2 Bible Online

MATHIUS, 2 - Futuna-Aniwa bible

MATHIUS, 2

¹NOPOGERA Iesu nifarere ia Bethlem o Jutaia i anopoge o Herot ta teriki, kowcitia, iai niromai fakou arapakau ia nuntafa fanua tara konace iai ia Jerusalem,

²Nokoutucua, Wehe aia kofarere ta Teriki o tagata o Juteia? Ma acime neicitia tshana tafatú ia nuntafa fanua tara konaci iai, ma acime niromai keimori aia.

³Nopogera Herot ta teriki nifakaragona niare fasao, tshana roto nimy iateia, ma iotshi tagata o Juteia ia aia.

⁴Nopogera aia nifetacina iotshi fatoriki o ta fare mori, ma iotshi fakou serea tatapuria ia tagata, aia nifakowia mukei acre wehe tumrai Kristo nifarere iai?

⁵Acre neitucua iateia, Ia Bethlem o ta fanua Juteia; ma hepra neisereace iateia ia tatapuria o aprofeta,

⁶Akoi Bethlem ia ta fanua o Juteia, akoi jimra ta sisi ia fatoriki o Juteia, ma tasi tshau kamai aia Teriki kafakairo tshaku tagata o Isreil.

⁷Nopogera iai Herat neitapa gusgusu ta fakou arapakua, nifakowia mukei acre nopogera enaia acre neicitia ta fatú.

⁸Aia nikowna acre ia Bethlem; aia neitucua, Roro ma fatshigeia mukei ta nuntama sisi, nopogera acowa kacitia aia, romai foci iatavua koutucua, pe avau foci kanatu mori aia.

⁹Iai acre nifakarogona ta fasao ta teriki, acre niroro; kowe, ta fatú acre neicitia ia nuntafa fanua tara konace iai, aia nifano mokagi acre iai, ma nikotu iluga none nuntama sisi iai.

¹⁰Iai acre neicitia ta fatú, acre nibisa ia bisa sore iai.

¹¹¶ Acre niromai efare acre neicitia ta tama sisi ia Mere tshana nana, acre nito fakafo nimori aia, iai acre niafogia akato o niare aneamane erefia, acre neitufwa aia anea; colt, ma ane libano, ma mura.

¹²Atua nifakairo acre ia ta mitshi tshare keinatshicina roro foci ia Herot, ma acre niroce ia tshore fanua ia teretu sece.

¹³Wamuri acre niroro, neicitia, ta agelo o Ihova nimai ia Josef ia ta mitshi tshana, nokoutucua, Masike amke ta tamasisi ma tshana nana, ma fura ia Ijipt, konofo akoi iai ia taha nopoge avau kamai fakairo akoi; ma Herot kasara ta tama sisi keitshi komate aia.

¹⁴Tupora aia nimasike milowa ma nitakoia ta tama sisi ma tshona nana ia tupo, niroro ia Ijipt;

¹⁵Aia neinofo iai ia nopogera wamuri Herot nimate, tira nimai hepe Ihova nifasao ia tatapuria o ta profeta, nokoutucua, Feke fanua Ijipt avau nakatapa tshaku nontariki.

¹⁶¶ Nopogera Herot neicitia fakou arapakau neiresia aia, aia nifakainina sore, nikowna iai, nitaia mate atamerecriki iotshi neinofo ia Bethlem, ma ia iotshi nuntafa fanua nifori aia, acre nifarere ia tau erua ma nuntafa o acrawa tau, hepe nei aia nifakowia mukei acre fakou arapakau iateia.

¹⁷Iai ane nimai hepe neitucua ia Jeremaia ta profeta, nokoutucua,

¹⁸Ia Rema neirogona ta noreo, o tagi ma kowe, ma nokomakuru tagi sore, Rejel nokotagi niana erecriki, ma segapu mana aroto nimy sore ianei acre nimate.

¹⁹¶ Kaia ia nopogera Herot nimate, ta agelo o Ihova nimai ia ta mitshi ia Josef ia fanua Ijipt,

²⁰Nokoutucua, Masike takoia ta tama sisi ma tshana nana, ma roro ia fanua o Isreil; ma acre nimate neicitiafakarafia takaroiai aniamouri o ta tama sisi,

²¹Aia nimasike nitakoia ta tama sisi ma tshana nana, niromai ia fanna o Isreil.

²²Kaia iai aia nifakarogona pe Arkileus neinofo teriki ia fanua Juteia kaiioria o tshana tamana Herot, aia nimtacu keifano iai hepe Atua nifakairo aia ia tamitshi, aia kuafe ia anuntafa o fanua Calili;

²³Aia nimai neinofo i tumrai sore neigo Nasareth; tira nimai hepe neitucua ia tatapuria o aprofeta, Katapa aia tatane o Nasareth.