Read Futuna-Aniwa MATHIUS, 20 Bible Online

MATHIUS, 20 - Futuna-Aniwa bible

MATHIUS, 20

¹Ma tavaka o tarage ko hepe tatane konofo ia tshana fare, aia nifano watafa i tafeitiata tapopo keiarafia tagata vere o avaini.

²Aia neitucage iacre, keifako acre vere tasi pene mune ia tasi nopoge, wamuri tira aia nikowna acre ia tshana vere a avaini.

³Aia nifano watafa wamuri tara neinace our toru, neicitia faru foci tagata nokotu ia emrai severe.

⁴Aia neitucage iacre, Roro acowa foci ia ta vere o avaini, ma taha fakamata totonu avau katufwa acowa, Acre niroro.

⁵Foci aia nifano watafa ia our ono ma ia our eva, neimna hepra mokagi

⁶Ma itata our eleven aia nifano watafa foci ia emrai neicitia faru foci tagata nokotu iai severe, aia neitucage iacre, Tiaha acowa kotu icunei iotshi nopoge severe?

⁷Acre neitucage iateia, Jimra tatane tasi arafia acime. Aia neitucage iacre, Roro acowa foci ia ta vere o avaini, ma taha fakamata totonu katufwa acowa.

⁸Fiafii nimai, teriki o ta vere o avaini neitucage ia tshana fitshicau sore nifatshigeia tshana aneamane, Tapa acreiotshi tagata vere, keifako acre, neikamata ia acre koromai wamuri, ia acre mokagi.

⁹Acre niromai aia niarafia itata our eleven aia neifako acre iotshi tasi pene.

¹⁰Kaia acre niromai niroro vere mokagi, acre nimentua aia kafako acre faru foci, acre foci ma nifako tasi pene.

¹¹Iai acre niamo tshare fakamata, acre nimusia ia tatane o tafare tira.

¹²Nokoutucua, Acre wamuri vere sisi i our tasi, ma akoi fako acre hepe acime, ma acime nivere iotshi nopoge nitshiga tara.

¹³Kaia aia nifasao tasi o acre neitucage, Neli avau semagane safiatakoi; tiaha akoi neitucua mokagi fako tshou vere tasi pene?

¹⁴Amke tshou fako ma fano tshou retu, avau katufwa tinei wamuri, hepe avau neitufwa akoi.

¹⁵Tiaha jimra mugaro pe avau katufwa tshaku ane hepe avau acitiafakarafia, mo? Tshou foimata kosa iatavau maganerefia, mo jimra?

¹⁶Hepra aia wamuri, aia mokagi ma aia mokagi wamuri, ma nitapa nalupai tagata, kaia karafia toru ana.

¹⁷¶ Hepe Iesu nifitshi ia Jerusalem; aia niamo ana ia teretu ta twelv tagata aia nifakairo ma neitucage iacre.

¹⁸Kowcitia acitia fitshikace ia Jerusalem; ta Nontariki o tagata kafakareresia aia ia fatoriki o tafare mori, ma ia fakau fakairo, ma acre kafasao kotshi aia komate.

¹⁹Acre katufa aia ia tagata o fanua pouri keifakamana aia, ma keitshi aia ia toura, ma keitucua aia ia tererakau fakaravasia; ma ia nopoge toru wamuri aia kamasike foci.

²⁰¶ Iai nimai iateia ta nana o erecriki o Sebeteius ia eruantariki, nokomori aia, ma nifakowia aia keitufwa aia ane tasi.

²¹Aia neitucage iateia, Taha akoi acitifakarafia? Aia neitucage iateia, Keitufwa pe eruantariki tshaku konofo tasi ia tshou norima matau, ma sece ia tshou norima masui ia tavaka tshou,

²²Kaia Iesu nifasao neitucage, Acoutou puspusi taha acoutou nogia. Akorua tomatua keinumia o ta kup avau kanumia o aia, ma keiamo ta baptiso neibaptiso avau iateia, mo jimra? Acrawa neitucage aia, Acimawa tomatua.

²³Aia neitucage iacrawa, Akorua kanumia tamari o tshaku kup, ma kabaptiso akorua i ta kaptisao nibaptiso avau iateia; kaia konofo ia tshaku norima matau ma ia tshaku norima masui, kojimra tshaku keitufwa, kaia ia acre neimna iateia ia tshaku Tata.

²⁴Nopogera ta ten nifakarogona tira, acre nifakainina sore acrawa noso.

²⁵Kaia Iesu nitapa acre iateia ma neitucage, Ta fatoriki o tagata o fanua pouri kafasao iacre, acre sore ma kafasao mukei acre.

²⁶Kaia acowa jimra kamna magane hepra, kaia aia tasi kasore o acowa, erefia aia kafitshicau tshowa;

²⁷Aia tasi o acowa acitiafakarafia aia teriki o acowa, erefia aia kavere o fitshicau tshowa;

²⁸Hepe ta Nontariki o tagata nimai sekeiamo vere o afishicau iateia, kaia keimna avere o fitshicou, ma keitufwa tshana aniamouri kaioria o tagata nalupai.

²⁹¶ Hepe, acre nirocea Jerico, tagata nalupai su niroro wamuri aia.

³⁰Neicitia erua tatane foimata pouri neinofo ia tafaretu iai, acrawa neirogona pe Iesu kofano acrawa nitapa fakapalo nokoutucua, Kowcitiafakarafia acimawa, Teriki sore, akoi Nontariki o Tevit!

³¹Tagata nifetacina niroro iai, neitucuasana acrawa, ia anera pe acrawa natshicina kotapa; kaia acrawa nitapa foci fakapola sore, nokoutucua kowcitiafakarafia acimawa Teriki sore, akoi Nontariki o Tevit!

³²Iesu nikotu iai, nitapa acrawa, neitucage, Taha akorua acitiafakarafia avau kamna ia iakorua?

³³Acrawa neitucage iateia, Teriki sore, pe foimatamawa kuara.

³⁴Iesu nikarafeina acrawa, ma nitofia tsharawa foimata, ma milowa foimatarawa nikuara merama, ma acrawa niroro wamuri aia.