Read Futuna-Aniwa MATHIUS, 22 Bible Online

MATHIUS, 22 - Futuna-Aniwa bible

MATHIUS, 22

¹IESU nifasao neitucua acre foci ia afakatagasia, aia neitucage.

²Ta vaka o taragi aia hepe tasi teriki aia neimna tokotokoga ia tafine o tshana nontariki acrawa masike.

³Aia nikowna watafa tshana afitshicou keitapa acre koromai aia mokagi neitapa ia tokotokoga o tafene acrawa masike, kaia acre natshicina komai iateia.

⁴Foci aia nikowna watafa faru foci afitshicou, nokoutucua, Koutucua iacre mokagi nitapa, Kowcitia avau kapenpena tshaku kai; tshaku akurimatau kotshice ma ane pese iateia, ane iotshi ma komoa; koromai acowa ia tokokotoga o ta fine.

⁵Kaia acre kowkata iateia nifakamana, niroro ia tshare aretu, tasi ia tshana vere, foci ia tshana fakamata ane;

⁶Ma acre faru foci neinofo iai nipurutshia tshana afitshicou, nifakoko acre, nitataia mate acre.

⁷Kaia iai ta teriki nifakarogona, aia nifakainina sore, aia nikowna tshana tagata tsha tatowa, nitaia nimate acre tagata nitatia mate niana afitshicou, ma neitugiace tshare tumrai sore.

⁸Nopogera iai aia neitucage niana afitshicou, Avau neipenpena tokotokoga o ta fine, kaia acre neitapa iateia isa ana.

⁹Roro acowa ia aretu sore, ma acreiotshi acowa kowcitia iai, tapa acre koromai ia tokokotoga o ta fine.

¹⁰Hepra niana afitshicou niroro ia aritu sore, nifetacina acre iotshi neicitia iai, acre tagata isa ma erefia; tagata nalupai niromai ia tokotokoga o ta fine.

¹¹¶ Ta teriki nimai keicitia acre nifetacina iai iateia, ma aia neicitia iai tasi tane aia sekataka ia tumiga erefia iateia;

¹²Aia neitucage iateia, Neli, tiaha akoi komai efare nei ma natshicina tumiga o tokotokoga o ta fine? Ma tshan afasao nijimra.

¹³Iai teriki neitucage ia niana afitshicou, Fousia aia norima ma novai, amke aia, towaki aia ia apouri sore watafa; iai acre nokotagi sore ma mugiugio aniforea.

¹⁴Ma tagata nalupai nitapa, kaia toru ana karafia erefia.

¹⁵¶ Iai Afarasi niroro, nifasao ia tshare acitiafakarafia takaroiai aia i afasao,

¹⁶Acre nikowna iateia tagata acre nifakairo ma tagata o Herot, nokoutucua, Teriki acime keiro akoi ta mari, ma akoi fakairo ta retu o Atua, ma akoi sekumtacu tagata, ma akoi sekumtacu foimata o takau sore.

¹⁷Fakairo acime ane nei, Taha akoi kamintua? Mugaro keitufwa mune ia Sisar, mo jimra?

¹⁸Kaia Iesu nikeiro tshare finagaro isa, ma neitucage, Tiaha acowa acitiafakarafia keresia avau, arotowa erua?

¹⁹Amai avau kowcitia tase mune, acowa katufwa teriki, acre nimai iateia tasi pene.

²⁰Aia neitucage iacre, Tsha akai noata o tagata ma tatapuria tira?

²¹Acre neitucage iateia, tsha Sisar. Iai aia neitucage iacre, Keitufwa Sisar toutokogane tsha Sisar; ma ia Atua keitufwa toutokogane tsha Atua.

²²Iai acre nifakarogona afasao tira, acre nimasaro sore, natshicina aia niroro tshare retu.

²³¶ Nopogera niromai iateia, Asatusi, acre neitucua tagata komate semasike foci, acre nifakowia aia.

²⁴Nokoutucua Teriki, Moses neitucage, pe tatane tasi komate, ma niana ericriki kojimra, mugaro tshana noso karafia tshana nahune, ma amo erecriki ia tshana noso.

²⁵Milou neinofo iacime fitu anoso; aia tourumatua niavaga inahune tshana ma aia nimate, tshana erecriki jimra, ma tshana fine neinofo ia tshana noso;

²⁶Hepra foci magane o ta noso erua, ma o aia ta toru, ma acre iotshi efitu.

²⁷Wamuri acre iotshi ta fine ma nimate.

²⁸Ia anera, ia nopoge wamuri, acre nimate kamasike foci aia nahune tsha akai o acre efitu? ma acre iotshi niarafia aia.

²⁹Iesu nifasao neitucage iacre, Tshowa fasao safi, acowa puspusi tatapuria o Ihova, ma ta tomatua o Atua.

³⁰Ma ia ta kamasike o tagata nimate acre jimra karafia nahune, foci, acre jimra kavaga nahune, kaia acre hepe ta agelo o Atua ia taragi.

³¹Kaia tinei ia ta kamasike o tagata nimate, acowa tawa, mo jimra, taha Atua nifasao iacowa, nokoutucua.

³²Avau ta Atua o Ebraham, ma ta Atua o Aisak, ma ta Atua o Jekob? Atua kojimra ta Atua o acre nimate, kaia o acre komouri.

³³Acre iotshi tagata nalupai nifetacina iai nifakarogona anera, acre nimasaro sore ia tshana fakairo.

³⁴¶ Kaia nopogera Afarasi nifakarogona pe aia kotshice afasao o ta Asatusi, acre nifetacina iateia.

³⁵Tasi o acre fakau nifakairo nokano o afasao, nifakowia aia acitiafakarafia takaroiai aia, nokoutucua,

³⁶Teriki taha aia ta sore tafasao fakairo ane tapu, o afasao ane iotshi tapu o Ihova?

³⁷Iesu neitucage iateia, Akoi kacitiafakarafia ta Ihova tshou Atua ia iotshi tshou roto, ma ia iotshi tshou nokano, ma ia iotshi tshou fenagaro.

³⁸Tenei ta mokagi ma ta sore ta fasao fakairo tapu tsha Ihova.

³⁹Ta fakairo erua hepra aia, Akoi kacitiafaakrafia tagata konofo fakaliki akoi hepe akoi acitiafakarafia akoi.

⁴⁰Ia tira erua afasao fakairo tapu, kotau iotshi afasao fakairo tapu, ma afasao o aprofeta.

⁴¹¶ Iai Afarasi nifetacina iateia, Iesu nifakowia acre,

⁴²Nokoutucua, Taha acowa kamintua o Kristo? aia nontariki tsha akai? Acre neitucage iateia, Ta nontariki o Tevit.

⁴³Aia neitucage iacre, Tiaha Tevit ia nokano neitapa aia Teriki Sore, nokoutucua.

⁴⁴Ta Ihova neitucage ia tshaku Teriki Sore, Nofo akoi ia tshauk norima matau, ia taha nopoge avau kamna tagata feimacowa akoi moy iraro tshou novai?

⁴⁵Pe Tevit neitucua aia Teriki Sore, tiaha aia tshana nontariki?

⁴⁶Jimra tasi tane o acre tomatua keifasao aia tasi afasao iateia, foci jimra tasi tane o acre wamuri nopoge tira tomatua fokowia aia ane foci.