Read Futuna-Aniwa MATHIUS, 24 Bible Online

MATHIUS, 24 - Futuna-Aniwa bible

MATHIUS, 24

¹IESU nifano efuafo, nifeke ta fare sore o Ihova; niana tagata aia nifakairo niromai iateia, niarafia aia nakamata afare iotshi o ta fare sore tsha Ihova.

²Iesu neitucage iacre, Secitiamana acowa iotshi anera? Tamari avau koutucua iacowa, Sekonofo icunei tasi fatu iluga tasi foci, pe katowaki iraro iotshi afatu.

³¶ Hepe aia neinofo ia ta ora o Olivet, niana tagata aia nifakairo niromai acre ana iateia, nokoutucua, Fakairo acime roaia ane iotshira karomai? ma taha ta ane kacitia kafakairo akoi nokomai, ma o ta nopoge wamuri?

⁴Iesu nifasao neitucage iacre, Fatshigeia acowa pe tasi takau jimra karasia acowa.

⁵Ma nalupai fakau kamai ia tshaku neigo, nokoutucua, Avau ta Kristo; acre karesia tagata nalupai.

⁶Acowa kafakarogona o atowa ma afasao o atowa; fatshigeia ma natshicina kumtacu acowa; ma ane iotshira tamari karomai kaia nopoge wamuri sekomai milou.

⁷Ma ta fanua kamasike kotaia foci fanua, ma ta vaka kamasike kotaia foci ta vaka, ma tagata tshitogi sore takai kojimra, ma amace sore isa, ma amahuke ia none nalupai.

⁸Ane iotshira neikamata o ane isa nalupai iauiai aroto o tagata.

⁹Ia taha nopoge acre katufwa acowa keitakaroiai acowa, ma kataia acowa komate; ma acre kafeimacowa acowa i afanua iotshi ianei acowa acitiafakarafia tshaku neigo.

¹⁰Ia taha nopoge tagata nalupai kataru iatavau, ma acre kafakareresia macre, ma acre kafeimacowa macre.

¹¹Nalupai tagata aprofeta karesia kamasike, ma karesia tagata nalupai.

¹²Ia ane nei maganisa sore kanofo, acitiafakarafia tsha nalupai tagata mori kafakasisi.

¹³Kaia aia kamaganerefia ia nopoge wamuri, aia kafano taragi.

¹⁴Tenei fasao erefia o ta vaka kakova i afanua iotshi, ma kafakairo tagata i afanua iotshi; wamuri tira ta nopoge wamuri kamai.

¹⁵Taha nopoge acowa kacitia, ane isa takaroiai ane iotshi, nifasao iateia ia tatapuria o Taneil ta profeta, kotu ia none tapu (erefia aia tawa tatapuria, keiro erefia;)

¹⁶Taha nopoge komai erefia acre kanofo ia fanua Juteia kofura ia aora;

¹⁷Erefia aia kanofo ia tatahufu o ta fare jimra kamai iraro keiamke ane efare tshana.

¹⁸Foci erefia aia kanofo ia ta vere jimra komai foci keiamke tshana umega.

¹⁹Kowe ia acre fafine kafoinai, ma fafine kafakoumia nagatama i anopoge iateia.

²⁰Kaia mori acowa pe tshowa kafura semai ia nopoge mukaligi, mo ia nopoge tapu;

²¹I taha nopoge karomai sore su ta my aroto o tagata, jimra hepe i anopoge mokagi ia neikamata o iafanua iotshi ia nopoge nei ma, jimra ma sekamai wamuri hepe tau ma tau.

²²Ma pe jimra kamna fakapotpotu anapoge iateia, jimra tasi tagata konofo wamuri; kaia ma acre Atua acitifakarafia mokagi taha anopoge iateia kamna potpoto.

²³Taha nopoge iateia pe takau tasi katucua iacowa, kowcitia Kristo icunei, mo icona; natshicina fakarogrogo aia.

²⁴Ma Akristo karesia karomai, ma aprofeta karesia karomai, acre kamna ane sore nalupai ma ane kamna tagata kamasara iateia; pe acre tomatua iateia, acre karesia foci ma tagata Atua mokagi acitiafakarafia.

²⁵Kowcitia, avau koutucua iacowa mokagi.

²⁶Ia ane nei pe acre katucua iacowa, Kowcitia aia ia tugogau; Natshicina acowa roro watafa iateia; kowcitia, aia ia akesi efare; sefakarogrogo aia.

²⁷Ma hepe tuptupeia komai ia nontafa itata tara konace, ma merama fano ia nuntafa tara takeifo iai; hepe ana ta nokomai o ta Nontariki o tagata.

²⁸Ma ia none wehe ta noaga konofo, iai aicel kafetacina iateia.

²⁹¶ Milowa wamuri amy sore o taha anopoge iateia, tara kamna pouri, ma tumrama kanatshicina katufwa tshana merama, afatu kamerigi ma taragi, ma atomatua o taragi karuruia.

³⁰I taha nopoge nei ane sore o Nontariki o tagata kamai keicitia ia apa o taragi; i taha nopoge iateia tagatotshi i iafanua iotshi katagi iateia, ma acre kacitia ta Nontariki o tagata nokomai ia apa o taragi, ia tomatua ma merama sore su.

³¹Aia kakowna tshana agelo ia norio palo o tupu, acre kafitacina niana tagata aia mokagi acitiafakarafia ia tumtagi efa o taragi, ma ia tasi nopito o taragi ia tasi foci.

³²Milow fakarogona ta fakatagasia o ta tsharupe; Pe tshana nora kotuptupu keiforasia noraw, acowa keiro koitata umrama ane otshi somo;

³³Hepra acowa, pe acowa taha nopoge kacitia ane otshira, keiro acowa pe aia koitata, efuafo afitoca.

³⁴Tamari avau koutucua iacowa, tagata konofo milownei sekafano, mokagi acowa kacitia ane otshira komaice.

³⁵Taragi ma iafanua wararoni kafano, kaia tshaku fasao kanatshicina kafano.

³⁶¶ Kaia o taha nopogi ma our iateia jimra tatane tasi keiro, agelo o taragi sekeiro, kaia tshaku Tata ana.

³⁷Kaia hepe anopogera o Noa, hepra ta nokomai o ta Nontariki o tagata.

³⁸Ma hepe i anopogera mokagi tavai tafe sore neinofo acre tagata nikokai ma neinumea, nifakavageina ma niavage afine, ia nopogera Noa nifano ia ta vaka sore,

³⁹Acre sekeiro ia nopogera tavai tafe nimai, ma niamke acre otshi; hepra ma nokamai o ta Nontariki o tagata.

⁴⁰Ia taha nopoge iateia erua tagata konofo ia tavere, kamo tasi ma natshicina tasi.

⁴¹Erua fafine kasoro fakaliki ia taganea; tasi kamke, ma natshicina tasi foci.

⁴²Kuara kasara anera, ma acowa puspusi taha our tshowa teriki kamai.

⁴³Kaia keiro tinei, pe tatane sore o tafare nikeiro, ia taha karatshia tagata tshigo nokomai, aia makaratshia, ma neitucuasana aia iauiai tshana fare.

⁴⁴I anera erefia penapena acowa foci iateia; ma ia our acowa sekamintua ta Nontariki o tagata kamai.

⁴⁵Aia akai fitshicou mari ma arapakau, aia tshana teriki neimna ta teriki keifatshigeia erefia ane iotshi efare tshano, keitufwa acre iai akai ia nontafa nopoge erefia iateia?

⁴⁶Kosececesa ta fitshicou tira, pe ia taha nopoge tshana teriki komai kacitia aia maganerefia hepra.

⁴⁷Tamari avau koutucua iacowa, Pe aia kamna aia teriki o ane otshi tshana.

⁴⁸Kaia pe fitshicou tiru isa ma katucua ia niana roto, Tshaku teriki semai mana;

⁴⁹Ma aia nekeimata kataia anoso afitshicau, ma keina ma meinu ia acre tagata meinu makona;

⁵⁰Ta teriki o tira fitshicau kamai ia taha nopoge aia setari mana aia, ia our ma aia puspusi iateia,

⁵¹Aia kasawace aia erua, ma ioria aia tshana fakamata ia acre arotorea erua; iai acre nokatage ma kamagiugio aneforea.