Read Futuna-Aniwa MATHIUS, 25 Bible Online

MATHIUS, 25 - Futuna-Aniwa bible

MATHIUS, 25

¹TAHA nopoge ta vaka o taragi hepe tumtagahuru atamafine, acre niamo tshare alampe ma niroro watafa keifapa tatane nifakavageina ta fine.

²Erima o acre keiro arapakau ma erima puspusi arapakau.

³Acre puspusi arapakau niamo tshare alampe, ma nigaro vainiu iateia,

⁴Kaia acre nikeiro arapakau niamo vainiu i aganea tsha alampe tshare.

⁵Ia tupo acre tari tatane nifakavageina, acreiotshi kofimero ma nimero.

⁶Ia tara tupo tasi nitapa, Kowcitia, tatane fakavageina nokomai; roro watafa acowa keifapa aia.

⁷Iai acreiotshi atamafine sisi nimasike, neipenpena niare alampe.

⁸Acre puspusi arapakou neitucage iacre arapakou, Tufwa acime faru tshau avainiu; ma tshome alampe komate.

⁹Kaia acre arapakau nifasao, nokoutucua, Jimra, pe jimra nalupai iacime ma iacowa; kaia erefia roro acowa iacre fakamata, keifakamata faru foci tshowa.

¹⁰Iai acre niroro keifakamata avainiu, tatane nifakavageina nimai; ma acre neipenpena erefia iateia niroro ia aia ia tokotokoga o ta fine; ma tafeitoca nipofna iai.

¹¹Wamuri niromai atamafine sisi foci, nokoutucua, Teriki Teriki, tshiki iacime tafeitoca.

¹²Kaia aia nifasao neitucage, Tamari avau koutucua iacowa avau puspusi acowa.

¹³Fatshigeia acowa ma acowa puspusi taha nopoge ma taha our ta Nontariki o tagata nokomai.

¹⁴¶ Ma ta vaka o taragi hepe tatane nokofano ia fanua papai su, aia neitapa niana afitshicau, ma neinage iacre tshana toutokogane.

¹⁵Ia tasi aia neitufwa erima atalent (mune), ia tasi foci erua, ia tasi foci tasi; ia tasi ma tasi foci iotshi hepe tshana arapakau ma tomatua iateia; ma nifano tshana retu.

¹⁶Nopogera aia erima atalent neitufwa iateia nifano nifakamata aneamane ia acre, neimna acre atalent erima foci.

¹⁷Hepra foci aia neitufwa erua iateia, aia ma neimna atalent erua foci.

¹⁸Kaia aia tasi neitufwa iateia, nifano nikeria takere nifuna mune tsha tshana teriki iai.

¹⁹Wamuri toufi nalupai ta teriki o afitshicowra nimai, neiioria amagane tshare ia amune,

²⁰Hepe aia erima atalent neitufwa iateia nimai niamomai erima foci atalent, nokoutucua, Teriki akoi neitufwa avau erima atalent; kowcitia, avau fakamata aneamane neimna erima foci atalent.

²¹Tshana teriki neitucage iateia, Erefia, akoi fitshicau erefia ma maganerefia; tshou magane totonu ia ane toru ana, avau kamna akoi teriki o ane nalupai; komai akoi ia kabisa o tshou teriki.

²²Aia erua atalent neitufwa iateia nimai, neitucua, Teriki akoi neitufwa avau erua atalent; kowcitia, avau fakamata anea mane neimna acrawa erua foci atalent.

²³Tshana teriki neitucage iateia, Erefia, akoi fetshicau erefia ma maganerefia; tshou magane totonu ia ane toru ana, Avau kamna akoi teriki o ane nalupai; komai akoi ia kabisa o tshou teriki.

²⁴Wamuri tira aia tasi talent neitufwa iateia nimai, neitucua, Teriki, avau keiro akoi tatane aroto mukei, nokosawace nohua akoi seipesia, ma nokofakatapuria anea mane akoi sefakareresia.

²⁵Ma avau nimtacu, ma nifano nifuna tshou talent ia takere; kowcitia, iai akoi amo tshau ane.

²⁶Tshana teriki nifasao neitucage iateia, Akoi isa ma taru fitshicou, akoi nikeiro avau sawace wehe avau seipesia, ma fakatapuria anea mane avau sefakareresia;

²⁷Pe akoi maganerefia iateia, erefia Akoi neitufwa tshaku mune iacre fakamata ioria aia, ma avau nakamai avau nakamo tshaku mune ma nomata iateia.

²⁸Ia ane nei, amke ta talent o aia, ma keitufwa ia aia nakamo tumuaghuru atalent.

²⁹Kaia iacre iotshi nakamo faru katufwa faru foci iacre, ma tshana nalupai; kaia ma aia tshana jimra kamkece ane sisi konofo iateia.

³⁰Towaki acowa ta fitshicou isa ia apouri watafa; iai acre katagi ma kamagiugio aniforea.

³¹¶ Taha nopoge ta Nontariki o tagata kamai ia kabisa tshana, ma iotshi agelo erefisa iateia, aia kanofo ia tafata o kabisa tshana.

³²Emoa aia kafetacina tagata o iafanua iotshi wararoni; ma aia kavaia acre tasi ia tasi foci hepe tatane fatshigeia sip, kavaia asip ia anane.

³³Aia kanagi asip ia tshana norima matau, kaia anane ia norima masui.

³⁴Iai ta teriki katucua iacre ia tshana norima matau, Koromai acowa tagata erefia o tshaku Tata, konofo ia tavaka neipenpena iacowa ia ta tave o ta neikamata o afanua wararoni;

³⁵Ma avau nitshitogi, ma acowa neitufwa avau akai; Avau nimate tavai, ma acowa neitufwa avau keinumea; Avau tatane o fanua sece, ma acowa niarafia avau iatacowa;

³⁶Tshaku miga nijimra, ma acowa nitakaia avau; Avau nimace, ma acowa niromai fatshigeia avau, avau neinofo ia tafare mukei ma acowa niromai iatavau.

³⁷Iai tagata erefia kafasao iateia, nokoutucua, Teriki enaia acime neicitia akoi nitshitogi, ma nifotshia akoi? mo nimate tavai, ma neitufwa akoi tavai?

³⁸Enaia acime neicitia akoi tatane o fanua papai, ma niarafia akoi efare tshome? mo umiga tshou nijimra, ma nitakaia akoi?

³⁹Mo enaia acime neicitia akoi nimace, mo ia tafere mukei, ma niromai iatakoi?

⁴⁰Ma ta Teriki kafasao ma koutucua iacre, Tamari avau koutucua iacowa, Ia ane nei acowa neimna maganera ia tasi ta sisi o acre akuso, acowa neimna maganera iatavau.

⁴¹Taha nopoge iai ma aia kafasao iacre foci ia norima masui, Feke avau, Roro acowa tagata isa ana ia tiafi nimouri tou ma tou, neimna ma Tiapolo ma tshana agelo isa;

⁴²Ma avau nitshitogi, ma acowa setufwa avau akai; Avau nimate tavai, ma acowa setufwa avau ane tasi keinumea;

⁴³Avau tasi o fanua papai, ma acowa searafia avau efare tshowa; tshaku miga nijimra, ma acowa setakaia avau; nimace, ma ia tafare mukei, ma acowa seromai iatavau.

⁴⁴Iai acre foci nifasao iateia, nokoutucua, Teriki, enaia acime neicitia akoi nitshitogi, mo nimate tavai, mo tasi o fanua papai, mo umiga nijimra, mo nimace, mo ia tafare mukei, ma jimra fitshicou mau?

⁴⁵Iai aia kafasao iacre, nokoutucua, Tamari avau koutucua iacowa, Ia ane nei acowa seneimna maganera ia tasi sece o acre iai acowa seneimna maganera iatavau.

⁴⁶Ma acre tagata isa karoro ia ioria o maganisa tau ma tau; kaia acre tagata erefia ia aneamouri tau ma tau.