Read Futuna-Aniwa MATHIUS, 26 Bible Online

MATHIUS, 26 - Futuna-Aniwa bible

MATHIUS, 26

¹ANE nei nimai, nopogera Iesu nifasaoce iotshi afasaora, aia neitucage ia niana tagata aia nifakairo,

²Acowa keiro wamuri nopoge erua komai tacripoga o ta paska, ma ta nontariki o tagata kofakareresia keitucia aia ia tererakau fakaravasia.

³Nopogera nifetacina fatoriki o tafare mori, ma fakau fakairo, ma fakau sore o tagata, ia tafare sore o teriki o tafare mori, neitapa neigo tshana Kaiafas,

⁴Nikotamau pe acre mapurutshia Iesu, ia karasia ma kotshi aia komate.

⁵Kaia acre neitucage, Jimra ia nopoge o tacripoga, ma acre nimatacu tagata iai nifiatu iateia.

⁶¶ Nopogera Iesu neinofo ia Bethane, ia ta fare o Saimona ta Leprose.

⁷Iai nimai iateia tasi fine nakamo taganea o alebaster kofonu o ane iamosia nomata sore su, ma neiregia aia ia tshana nouru, hepe aia neinofo ia takai.

⁸Kaia iai niana tagata aia nifakairo neicitia anera, acre nifakainina, nokoutucua, Tiaha aia iauiai anera?

⁹Ma anera iamosia, pe aia nifakamata keiamo nomata sore iateia, keitufwa acre niare ane jimra.

¹⁰Iai Iesu nikeiro anera, aia neitucage iacre, Tiaha acowa iauiai aroto o tafine? ma aia neimna vere erefia iatavau.

¹¹Ma tagata niare ane kojimra nokonofo iacowa atou ma tou, kaia avau sekonofo iacowa atou ma tou.

¹²Ma aia neirigia anera iamosia tshaku notshino, aia neimna anera ia tshaku tanumea.

¹³Tamari avau koutucua iacowa, Wehe ia fanua iotshi afasao erefia tinei kakova i afanua, iai foci, ane nei ta fine nei neimna, katucua keimentua aia iai.

¹⁴¶ Nopogera iai tasi o ta twelv, nitapa neigo Jutas ta tane o fanua Kariot, nifana ia fatoriki o tafare mori.

¹⁵Aia neitucage iacre, Taha acowa ioria avau, ma avau kafakareresia aia iacowa? Acre neitucua mukei iateia ma therte nopito mune o selver.

¹⁶Ma wamuri tira aia neisara pe aia kafakaresia aia iacre.

¹⁷¶ Iai nopogera mokagi o tacripoga tsha bret leven jimra iai tagata aia nifakairo nimai ia Iesu, nokoutucua iateia, Wehe akoi acitiafakarafia pe acime keipenpena ma akoi keina ta paska?

¹⁸Aia neitucage, Roro ia tumrai sore ia tatane tira iai, koutucua iateia, Ta Teriki koutucua, Tshaku nopoge koitata; Avau kakeina ta paska ia tshou fare ia tshaku tagata avau fakairo.

¹⁹Niana tagata aia nifakairo neimna vere iateia hepe Iesu nifakairo iacre, ma acre neipenpena erefia ta paska.

²⁰Iai ta fiafii nimai, aia neinofo ia ta twelv.

²¹Hepe acre nikeina, aia neitucage, Tamari avau koutucua iacowa, pe tasi o acowa kafakareresia avau.

²²Ma acre iai arotorea nimy sore iateia, ma nikamata tasi ma sece o acre iotshi keitucua iateia, Teriki, aia avau mo?

²³Aia nifasao neitucage, Aia kofua ia taganea iatavau, aia kafakareresia avau.

²⁴Ta Nontariki o tagata nokofano hepe neisereace o aia; kaia Kowe ia tatane tira kafakareresia ta Nontariki o tagata! erefia ia tagata tira pe nana sefarere aia.

²⁵Iai Jutas aia nifakareresia aia, nifasao neitucage, Teriki, aia avau mo? Aia neitucage iateia, Akoi nakatucua.

²⁶¶ Hepe acre nikeina, Iesu niamo aofa nimori iateia, neitufwa niana tagata aia nifakairo, ma neitucage, Amo, keina; tinei tshaku notshino.

²⁷Aia niamo taganea kup, nimori iateia, neitufwa iacre nokoutucua, Numea faru o aia acowa iotshi;

²⁸Ma tinei tshaku toto o tafasao fou, aia korigia nomata o tagata nalupai, ma ioria amaganisa tshare.

²⁹Kaia avau koutucua iacowa, Avau senumea foci o tavai tira nohua avaini, ia taha nopoge avau kanumea aia fau ia acowa ia tavaka o tshaku Tata.

³⁰Wamuri acre nifeke tagoro tasi, acre niroro watafa ia ta ora Olivet.

³¹Iai Iesu neitucage iacre, Acowa iotshi arotowa kamy iatavau tupo nei; ma aia neisereace, Avau katshi tatane karafia ta sip, ma ta sip o fakatapuria kafura papai.

³²Kaia wamuri avau kamasike foci, avau kafano mokagi acowa ia fanua Calili.

³³Pitrus nifasao neitucage iateia, Pe arota o tagatotshi kamy ma kanatshicina akoi, avau senatshicina akoi.

³⁴Iesu neitucage iateia, Tamari avau koutucua iatakoi, Pe tupo nei, mokagi ta moa koko, akoi kafeiva toru akoi puspusi avau.

³⁵Pitrus neitucage iateia, Pe avau komate iatakoi, avau sekatucua avau puspusi akoi. Hepera foci ma acre iotshi aia nifakairo neitucua.

³⁶¶ Tupora Iesu niarafia acre ia none neitapa neigo Cethsemene, ma neitucage ia niana tagata aia nifakairo, Nofo iraro acowa, icunei, tari avao fano mori ecora.

³⁷Aia niarafia iateia Pitrus ma eruan tariki o Sebeteius, ma neikamata tshana roto keimy sore ma mafa ana.

³⁸Iai aia neitucage iacratau, Tshaku nokano komy sore su, ia ta mate; tari acoutou icunei fatshigeia, iatavau.

³⁹Aia nifano fakasisi foci iai, nito ia tshana foimata, nimori, nokoutucua, Alofa tshaku Tata, pe akoi acitiafakarafia erefia taganea kup tenei natshicina avau; kaia jimra hepe avau acitiafakarafia, kaia erefia hepe akoi acitiafakarafia.

⁴⁰Aia nimai ia tagata aia nifakairo, neicitia acre nokomero iai, ma neitucage ia Pitrus, Taha acoutou kotaru fatshigeia iatavau tasi our.

⁴¹Fatshigeia ma mori, pe acoutou sefanomana ia ane isa; nokano tamari keicitiafakarafia, kaia ta notshino kotaru.

⁴²Aia nifano foci fakarua, nimori iai, nokoutucua, Alofa tshaku Tata, pe taganea kup tenei senatshicina avau, kaia avau numea aia, erefia hepe akoi acitiafakarafia.

⁴³Aia nimai neicitia acratou neimero foci; ma tshare foimata mafa keifeimero.

⁴⁴Aia natshicina acratou, ma nifano foci, nimori fakatoru, nokoutucua afasaora foci.

⁴⁵Iai aia nimai ia niana tagata aia nifakairo neitucage iacre, Mero palo acowa milou, ma amo tshowa kogapu; kowcitia, ta our koitata, ma ta Nontariki o tagata kofakareresia ia anorima o tagata isa.

⁴⁶Masike erefia acitia nokororo kowcitia, aia koitata kofakareresia avau.

⁴⁷¶ Iai hepe aia nifasaora, kowe, Jutas tasi o acre ta twelv, nimai, ma ia aia tagata nalupai su ia amatshira palo ma ia arakau, ia fatoriki o tafare mori ma fakau sore o tagata.

⁴⁸Iai aia fakareresia aia neitucage iacre, nokoutucua, Aia avau kasogi, aia tamari, apurutshia aia mukei.

⁴⁹Milowa aia nimai ia Iesu, neitucage, Alofa Teriki; ma neisogia aia.

⁵⁰Iesu neitucage iateia, Neli, tiaha akoi komai? Iai acre niromai, ma nipurutshia Iesu, niarafia aia.

⁵¹Neicitia, tasi o acre ia Iesu nifakatonusia norima tshana, nitorotshia tshana tomatshira palo, ma neitshi tasi fitshicou o teriki o tafare mori, nisawace tshana nontariga.

⁵²Iai Iesu neitucage iateia, Fakafecina tshou tomatshira palo ia tshana takato, ma acre iotshi kamo tomatshira palo, kasawace acre ia tomatshira palo.

⁵³Kamentua akoi pe avau taru mori milou ia tshaku Tata, ma aia milowa katufwa avau twelv lijon o agelo ma faru foci?

⁵⁴Kaia tiaha kamna ane neiseri ia tatapuria o Ihova, pe ane iotshi hepe nei tamari komai?

⁵⁵I our tira Iesu neitucage ia tagata nifetacina iai, Tiaha acowa koromai hepe keipurutshia tagata tshigo ia tomatshira palo ma atokotoko keipurutshia avau? Avau neinofo iacowa nopoge ma nopoge nokofakairo acowa ia tafare sore o Ihova, ma acowa sepurutshia avau.

⁵⁶Kaia ane iotshira nimai hepe neiseriace ia tatapuria o aprofita iateia. Iai acre iotshi tagata aia nifakairo natshicina aia, ma nifura.

⁵⁷¶ Acre neipurutshia Iesu niarafia aia ia Kaiafas ta teriki o ta fare mori, iai fakau fakairo ma fakau sore nifetacina.

⁵⁸Kaia Pitrus nifano wamuri aia papai ia tafare sore o teriki o ta fare mori, nifano efare, ma neinofo ia acre afitshicou, keicitia taha komai wamuri.

⁵⁹Iai ta fatoriki o ta fare mori, fakau sore, ma iotshi fakau arapakau keifasao, neisara tagata korefu ia magane o Iesu, keitshi aia komate iateia;

⁶⁰Kaia acre secitia mana tasi; keini, ma iai tagata korefu nalupai niromai keifasao, acre secitia mana tasi. Wamuri erua tagata korefu niromai.

⁶¹Neitucage, Ta tane tira neitucage, avau tomatua takaroiai ta fare sore o Atua, ma keimna tasi foci ia nopoge toru.

⁶²Ta Teriki o tafare mori nimasike, neitucage iateia, Akoi sefasao mo? taha acre fasosa iatakoi?

⁶³Kaia Iesu sefasao, Ma ta teriki o tafare mori nifasao neitucage iateia, Avau fakowia mukei akoi ia neigo o Atua mouri, pe akoi Koutucua acime, pe akoi ta Kristo, ta Nontariki o Atua.

⁶⁴Iesu neitucage iateia, Akoi neitucage aia; ma avau koutucua iacowa, Wamuri nei acowa kacitia ta Nontariki o tagata nokonofo ia norima matau o tomatua, ma nokomai ia apa o taragi.

⁶⁵Iai ta teriki o ta fare mori neifasia tshana miga, nokoutucua, Aia nakafasao isa ana ma tapu; tiaha acime fatshigeia faru foci afasao iateia? kowcitia, milou acowa nifakarogona tshana fasosa tapu.

⁶⁶Taha acowa kamintua? Acre nifasao neitucage, Erefia kotshi aia komate iateia.

⁶⁷Iai acre nisavari ia tshana foimata nitacritshia aia, ma faru foci niferpacia aia ia arimore.

⁶⁸Nokoutucua, Fakairo acime, akoi Kristo, Akai aia neitshi akoi?

⁶⁹¶ Iai Pitrus neinofo efuafo ia ta fare sore; ma tasi fine sisi nimai iateia nokoutucua, Akoi ma neinofo ia Iesu o Calili.

⁷⁰Kaia aia nifeiva emoa acre iotshi, nokoutucua, Avau puspusi taha akoi koutucua.

⁷¹Iai wamuri aia nifano efuafo ia nopito fare efuafo tafeitoca, tasi foci fine sisi neicitia aia, ma neitucage iacre nokonofo iai, Tatane tenei ma neinofo ia Iesu o Nasareth.

⁷²Foci aia nirefu ia tasi fasao tapu, Avau puspusi tatane.

⁷³Nagimana iai niromai iateia acre tagata nikotu fakaliki, neitucage ia Pitrus, Tamari akoi ma tasi o acre; ma tshou afasao fakareresia akoi.

⁷⁴Iai wamuri tira aia neikamata keifasosa tapu ma keifasosa isa tapu, nokoutucua, Avau puspusi tatane tira. Milowa ta moa nikoko.

⁷⁵Pitrus iai nimentua ta fasao o Iesu, aia neitucage iateia, Mokagi ta moa koko, akoi kafeiva akoi puspusi avau fakatoru. Ma aia nifano efuafo neitagi sore iateia.