Read Futuna-Aniwa MATHIUS, 27 Bible Online

MATHIUS, 27 - Futuna-Aniwa bible

MATHIUS, 27

¹TA popo tira nimai iai, iotshi fatoriki o ta fare mori ma fakau sore o tagata nifakatamau macre ia fakainina ia Iesu keitshi aia keimate;

²Wamuri acre nifousia aia, acre niarafia aia efuafo, neitufwa aia ia Pontius Pailet ta teriki.

³¶ Iai Jutas, aia nifakareresia aia, wamuri aia neicitia acre neitucua katshi aia komate, neitagi tshana magane isa, ma amai foci iacre ta therte anopito selver ia fatoriki o ta fare mori ia fakau sore,

⁴Nokoutucua, Avau nimaganisa ia nifakareresia toto o aia semaganisa. Macre neitucage, Taha tira iacime? Tshou maganera.

⁵Aia nifakarerecea iraro iai anopito selver ia ta fare sore o Ihova, ma nifeke efuafo, nifano neinoutshia aia nimate.

⁶Fatoriki o ta fare mori niamo anopito selver, ma neitucage, Itapu nage acre ia tupurerakau o mune, ma acre nomata o toto.

⁷Acre nifakatamau iateia, ma nifakamata ia acre ta none o tagata neimna taganea o takere, keitanumea tagata o fanua papai iai.

⁸Ia anera ta none tira neitapa neigo iai, Ta none o toto, ia nopoge nei.

⁹Nopogera nimai iai anera hepe neitucage ia Jeremaia ta profeta, nokoutucua, Acre niamo ta therte anopito selver, ta nomata o aia acre neiioria, aia acre tagata o Isreil nefakairo, nomata iateia.

¹⁰Neitufwa acre nomata o none o tagata neimna taganea o takere; hepe Ihova nifakairo avau.

¹¹¶ Iesu nikotu emoa ta teriki, ma ta teriki nifakowia aia, nokoutucua, Akoi ta teriki o tagata o fanua Juteia, mo jimra? Iesu neitucage iateia, Akoi koutucua.

¹²Nifasosa iateia iai fatoriki o tafare mori ma fakau sore, aia sefasao.

¹³Pailet neitucage iateia, Fakarogona akoi, mo jimra, ane nalupai acre neitucua isa iatakoi?

¹⁴Aia sefasao aia ma; neimna teriki nimasaro sore iateia.

¹⁵Ia tacripogira magane o teriki eivetea ta vava o tasi tagata nifousia aia tafare mukei iacre, aia acre nifakowia.

¹⁶Neinofo ia tafare mukei tshare tasi tatane isa, neitapa neigo tshana Barabas.

¹⁷Ia ane nei acre nifetacina iai ia none tasi, Pailet neitucage iacre, Akai o acrawa acowa acitiafakarafia avau eivetea ta vava tshana keitufwa iacowa? Barabas mo Iesu neitapa tshana neigo Kristo?

¹⁸Ma aia nikeiro ia fakainina tshare acre neitufwa aia.

¹⁹¶ Iai aia neinofo ia tafata tsha fakairo ioria o maganisa, tshana nahune nikowna iateia, nokoutucua, Natshicina akoi asitu iauiai tatane maganerefisa ma totonu tira; ma kuroto nimy sore i ane nalupai iateia iraneia ia tamatshi.

²⁰Kaia fatoriki o tafare mori ma fakau sore nifakairo tagata nalupai nifetacina iai, pe acre nifakowia Barabas, ma takaroiai Iesu.

²¹Teriki nifasao neitucage iacre, Akai o acrawa avau eivetea ta vava tshana iacowa katufwa? Acre neitucage, Barabas.

²²Pailet neitucage iacre, Taha avau kamna ia Iesu neitapa neigo tshana Kristo? Acre iotshi neitucage iateia, Erefia tucia aia ia tererakau fakaravasia.

²³Ta teriki neitucage, Tiaha taha ane isa aia neimna? Kaia acre nitapa fakasore foci ma foci, nokoutucua, Erefia tucia aia ia tererakau fakaravasia.

²⁴¶ Iai Pailet neicitia aia nitaru fakafecina arotorea, kaia acre hepe kofiatu, aia niamo tavai nifakafano tshana norima emoa acreiotshi nifetacina iai, nokoutucua, Avau seasitu rigia toto o tatane maganerefisa ma totonu tira; sara acowa iateia.

²⁵Tagatotshi iai nifasao, neitucage, Ioria o tshana toto konofo iacime ma tshome erecriki.

²⁶¶ Iai aia neivetea ta vava o Barabas neitufwa aia iacre; ma wamuri aia neitshi Iesu ia toura, aia neitufwa aia keitucia ia tererakau fakaravasia.

²⁷Wamuri tira fakau kotaia tagata tsha teriki niarafia Iesu ia nopito sore o tafare, nifetacina iateia iotshi fakau o acre nitaia tagata.

²⁸Acre niamke umiga ishana, nitaka aia ia tumiga sore ouroura.

²⁹¶ Iai acre raga topurau o tasoni, nitavisia aia ia tshanu nouru, ma nagi tagasao tasi ia norima matau tshana; macre nifakaturia enturi emoa aia, nifakamana aia, nokoutucua, Alofa, Teriki O tagata o Juteai!

³⁰Acre nisavari aia, niamo ta tomatshira ma neitshi aia ia tshana nouru.

³¹Wamuri acre nifakamana aia, acre niamke tumiga ouroura nitakaia aia iateia, nitakaia aia ia tumiga tshana, ma niarafia aia watafa keitucia aia ia tererakau fakaravasia.

³²Hepe acre niroro, watafa, acre neicitia tasi tatane o fanua Sairine, neitapa neigo tshana Saimona; acre nifakumtakutshia aia keitakoia tshana tererakau fakaravasia.

³³Acre niromai ia none nitapa neigo Colcotha, nokano o neigo tira, Ta none o noipu o tagata.

³⁴¶ Acre neitufwa aia venicar neirepua ia cal keinumea; aia neisopotshia aia, natshicina neinumea.

³⁵Acre neitucia aia ia tererakau fakaravasia, nitarowiai tshana miga, neimna aloti iateia; ane nei nimai hepe ta fasao o ta profeta, Acre nitarouiai tshaku miga iacre, ma ia tshaku miga iluga acre neimna aloti.

³⁶Acre nokonofo iraro, neiratshia aia iai;

³⁷Neitucia ia tererakau fakaravasia iluga tshana nouru, afasao ia tshana magane neisiria, TINEI IESU TA TERIKI O TAGATA O JUTEIA.

³⁸Iai erua tatane nitshigo, acre neitucia ia tererakau fakaravasia ia aia, tasi ia norima matau tshana, ma tasi foci ia norima masui tshana.

³⁹¶ Acre niroro secece neiseciria aia, nokotataia tshare anouru,

⁴⁰Nokoutucua, Akoi pe iauiai ta fare o Ihova, ma keimna tasi foci ia nopoge toru, kapare akoi. Pe akoi ta nontariki o Atua, fanifo ia tererakau fakaravasia.

⁴¹Hepra ma fatoriki o tafare mori nifakamana aia, ia fakau fakairo, ma fakau sore, neitucage.

⁴²Aia kapare tagata faruke; aia kotaru kapare aia. Pe aia teriki o tagata o Isreil, erefia aia milou fanifo ia tererakau fakaravasia, ma acime kafakarogrogo aia.

⁴³Aia nifakarogrogo Atua; erefia aia kapare aia milou pe aia acitiafakarafia aia; ma aia neitucage, Avau ta Nontariki o Atua.

⁴⁴Tagata tshigo ma acre neitucia ia tererakou fakaravasia ia aia nifasosa iateia hepra.

⁴⁵¶ Ia our ono apouri neinofo ia iotshi fanua ia our eva.

⁴⁶Itata our eva Iesu nitapa ia norio fakapolo, nokoutucua ELI, ELI, LAMA SABAKTHANI? nokano tafasao tira, Tshaku Atua, tshaku Atua, tiaha akoi natshicina avau?

⁴⁷Faru o acre nikotu iai neirogona afasaora, neitucage, tatane tinei nakatapa Elaija.

⁴⁸Milowa tasi o acre nitere, niamo taremremu nifuia aia nifonu iai venecar, neisucia aia ia tomatshira, neitufwa aia keinumea.

⁴⁹Faruke iai neitucage, Natshicina aia, Erefia acitia kacitia pe Elaija kamai kapare aia.

⁵⁰¶ Iesu wamuri aia neitapa foci ia noreo palo neitufwa iluga tshana nokano.

⁵¹Ma neicitia, tumiga touria pofna nuntafa tapu o tafare tsha Ihova neifasia fakarua iluga ma fanifo iraro; afanua tamahuke, afatu sore ma neifasia;

⁵²Arua neitanumea tagata iai nifakamama; ma nalupai noaga o tagata erefisa nimero iai nimasike.

⁵³Nimai watafa arua neitanumea acre iai wamuri aia nimasike ia nimate, niroro ia tumrai erefisa, tagata nalupai neicitia acre.

⁵⁴¶ Wamuri ta senturio, ma acre ia aia iai, naratshia Iesu, neicitia tumahuke ma ane iotshi neimna iateia, acre nimtacu sore su, nokoutucua, Tamari aia ta Nontariki o Atua.

⁵⁵Nalupai afine iai neinofo papai neicitia, acre niroro wamuri Iesu ia Calili, nifitshicou mare iateia;

⁵⁶Tasi o acre Mere o fanua o Mactala ma Mere ta nana o Jakobus ma Joses, ma nana o erecriki o Sebeteius.

⁵⁷Fiafi nimai iai, nimai tasi tatane o Aramathia tshana mune nalupai su, nitapa neigo Josef, aia ma tasi Iesu nifakairo;

⁵⁸Aia nifano ia Pailet, neinogia ta noaga o Iesu. Iai Pailet nifakairo mukei keitufwa ta noaga iateia.

⁵⁹Wamuri Josef amweifo ta noaga, aia nitakaia aia ia tumiga ema o lenen,

⁶⁰Ma neinagi aia ia tshana tapunaga fou tsha noaga o nimate, tira aia nesawa ia aroto o tafatu sore; ma aia nifurusia tafatu sore tasi tafeitoca o tapunaga, ma nifano.

⁶¹Iai Mere o fanua Mactala, ma sece Mere, nokonofo itata ta tapunaga.

⁶²¶ Milou ia nopoge wamuri nopogera neipenpena ta paska, fatoriki o tafare mori ma Afarasi nifetacina niromai ia Pailet,

⁶³Nokoutucua, Teriki, acime kamentua tatane tira neiresia tagata neitucage, ia nopogera aia nimouri, Wamuri nopoge toru avau kamasike foci.

⁶⁴Koutucua akoi keimna tapunaga mukei ia nopoge toru komaice, pe niana tagata aia nifakairo semai ia tupo ma tshigo tshana noaga, ma koutucua ia tagata, Aia nimasike ia tagata nimate; ma korefu tira isa sore, sisi isa aia mokagi.

⁶⁵Pailet neitucage iacre, Tagata fatshigeia konofo iacowa; roro tshowa retu, acowa kapare aia fakamukei.

⁶⁶Hepra acre niroro neipofna fakamukei ta tapunaga, nokofakarogeina ta fatu, ma neinagi iateia tagata keifatshigeia aia.