Read Futuna-Aniwa MATHIUS, 3 Bible Online

MATHIUS, 3 - Futuna-Aniwa bible

MATHIUS, 3

¹I ANOPOGERA nimai Joanes ta Baptiso nokofakairo ia tugogau o ta fanua Juteia,

²Nokoutucua, natshicina ma feimacowa maganisa, ma maganerefia; ma tavaki o taragi ko itata.

³Ma tira aia neitucua ta fasao iateia ia tatapuria o ta profeta Eisaia, nokoutucua, Ta norio o tasi nokotapa ia tugogau, Penpena acowa ta teretu o Ihova, penpena tshana aretu totonu.

⁴Joanes tira nitaka ia tumiga o nofouru o kamila, ma tshana toutshi nokiri ane, ma niana kai ase ma hune o tagarakau.

⁵¶ Nopogera niroro iateia tagata o Jerusalem, iotshi tagata o Juteia, ma o iotshi afanua iai kofori Jortan.

⁶Aia nibaptiso acre i tavai tafe Jortan, acre nokoutucua tshare amaganisa.

⁷¶ Nopogera aia neicitia nalupai o tagata Farasi, ma Satusi niromai ia tshana baptiso, aia neitucage iacre, Kai acowa tagata milownei hepe agatu magu, akai nifakairo acowa keifura ia ta fakainina nokomai?

⁸Amai anohua o maganerefia tshowa pe acowa natshicina ma feimacowa maganisa;

⁹Sekamentua acowa koutucua i arotowa, Ebraham tamenome; ma avau koutucua iacowa, pe Atua kotomatua o tira afatu keitufwa atamerecriki ia Ebraham.

¹⁰Milownei ma tatoci konofo ia nontafito o arerakau; ianei iotshi tererakau sefua nohua erefia, katoutshiace aia koto iraro, ma touwaki ia tiafi.

¹¹Avau tamari baptiso acowa ia tavai ia feimacowa ma natshicina maganisa, kaia aia kamai wamuri avau tomatua sore mokagi avau, avau isa keiamo tshana ashu; aia kabaptiso acowa ia Nokano Tapu, ma tiafi.

¹²Tshana teiri ko ia tshana norima, aia kapenpena erefia tshana none, ma fakatupuria tshana awit ia ta fare o awit; kaia aia katugia tapenu ia tiafi sematemana.

¹³¶ Nopogera Iesu nifeke Calili nimai Jortan, ia Joanes keiamo tshana baptiso.

¹⁴Kaia Joanes neitucuasana aia, nokoutucua, Erefia akoi baptiso avau, ma tiaha akoi komai iatavu?

¹⁵Iesu nikofasao neitucage iateia, Erefia akoi emna tinei milou; ma hepe nei erefia acitia keimna maganerefia iotshi. Wamuri nei aia neitucua erefia.

¹⁶Iesu, ia nopogera Joanes nibaptiso aia, neinace ia tavai, ma, taragi neitshicea iateia, ma aia neicitia ta Nokano a Atua nikofanifo hepe ta foitu, ma koike iluga aia;

¹⁷Ma neirogona ta norio o tasi ia taragi, nokoutucua, Tinei tucu Tariki nakacitiafakarafia aia, avau kabisa ia aia sore.