Read Futuna-Aniwa MATHIUS, 4 Bible Online

MATHIUS, 4 - Futuna-Aniwa bible

MATHIUS, 4

¹NOPOGERA Nokano Tapu niarafia Iesu ilugia ia tugogau Tiapolo keiresia aia iai.

²Iai aia nipari nopoge forte ma tupo forte, aia wamuri nitshetogi.

³Nopogera aia karesia nimai iatei, aia neitucage, Pe akoi ta nontariki o Atua koutucua afatu tira kofuri ia ta bret.

⁴Kaia aia nifasao neitucage, Aia neisereace, Tatane, jimra kamouri ia bret ana, kaia ia iotshi tafasao komai watafa nofafa o Atua.

⁵Wamuri tira Tiapolo niarafia aia iluga ia tumrai sore erefia, ma nifecetshia aia ia nopito iluga ana o tafare tsha Ihova.

⁶Neitucage iateia, Pe akoi ta Nontariki o Atua, akoi koto iraro, ma aia neisereace, aia kafakairo niana agelo iatakoi; i arimore acre katakoia akoi pe akoi jimra koupesia tshow novai ia ta fatu.

⁷Jesu neitucage aia, Aia neisereace foci, Akoi kanatshicina togafia Ihova tshou Atua.

⁸Foci Tiapolo nikarafiakace aia ia ta ora tasi iluga ana neikeimata aia iotshi avaka o iafanua wararonei aniamane tshare ma;

⁹Neitucage iateia, Ane iotshi tira avau katufwa akoi, pe akoi koto ma mori iatavau.

¹⁰Iai Iesu neitucage iateia, Fano natshicina avau Satana; ma aia neisereace, Akoi kamori Ihova tshow Atua, ma aia ana akoi kavere iateia.

¹¹Nopogera Tiapolo feke natschicina aia, ma agelo niromai iai nivere mana iateia,

¹²Wamuri Iesu nifakarogona pe acre nagi Joanes ia tafare mukei, aia nifano ia fanua Calili.

¹³Nokofeke Nasareth, aia nimai neinofo ia Kaperneum tumrai tira watai, ia nuntafa Sebulon ma Naftalai;

¹⁴Tira nimai hepe tafasao neitucua ia ta profeta Aiseia nokoutucua,

¹⁵Ta fauna o Sebulon, ma ta fauna o Naftalai, ia teretu o tatai, nofokagi Jortan, ta fanua Calili o tagata pouri;

¹⁶Tagata neinofo ia tapouri neicitia merama sore; ma ia acre neinofo ia tafanua noata o ta mate merama konace.

¹⁷¶ Wamuri anapogera Iesu neikamata keifakairo ma keitucua Natshicina ma feimacowa amaganisa; ma ta vaka o Atua koitata.

¹⁸¶ Iesu nikatakaro itata tatai o Calili, neicitia erua noso, Saimona neitapa neigo Pitrus, ma Antrius tsho noso, nokofakarerece takowpiga ia tatai, ma acrawa tagata fagota.

¹⁹Aia neitucage iacrawa, Romai ma muri avau, ma avau kamna akorua fagota tagata.

²⁰Milowa acrawa natshicina takowpigarawa, ma niroro wamuri aia.

²¹Niteke nokotakaro foci iai, aia neicitia erua noso foci, Jacobus ta nontarika o Sebetaius, ma Joanes tsho noso ia tavaka ia Sebetaius tamanarawa, nokowcia niare takowpiga; ma aia nitapa acrawa.

²²Milowa acrawa natshicina ta vaka ma ta manarawa, ma niroro wamuri aia,

²³¶ Iesu nifano kofori iotshi fanua o Calili, nokofakairo ia tafare mori tshare, nokova tafasao erefia o ta vaka o Atua, nokopenpena iotshi amace, ma iotshi amy o tagata.

²⁴Afasao ia tshana vere nifano kofori iotshi ta fanua o Siria; acre niarafia iateia iotshi tagata nimace o amace iotshi ma ane isa takaroiai tagata, acre ma agelo isa neinofo ia acre, ma acre kokali, acre ma niamo ta palse; ma aia neipenpena acre.

²⁵Niroro wamuri aia tagata nalupia su niroce Calili, ma Tikapolis, ma Jerusalem, ma Juteia, ma ia nofakagi Jortan.