Read Futuna-Aniwa MATHIUS, 7 Bible Online

MATHIUS, 7 - Futuna-Aniwa bible

MATHIUS, 7

¹NATSHICINA acowa koutucua Ioria pe aia seioria acowa.

²Ma hepe acowa ioria, aia kaioria acowa; ma hepe acowa kotufwa anea, aia katufwa foci iacowa.

³Tiaha akoi kowcitia ane isa sisi ia foimata o tshou noso, kaia sectiamana ane isa sore konofo ia tshou foimata?

⁴Mo tiaha akoi koutucua ia tshou noso, Erefia avau kamke ane isa sisi konofo ia tshou foimata; ma sectiamana ane isa sore konofo ia tshou foimata?

⁵Akoi aroto erua, mokagi amke ane isa sore watafa tshou foimata; ma wamuri ia akoi kowcitia erefia keiamke ane isa sisi watafa foimata o tshou noso.

⁶¶ Sekatufwa ane tapu ia akuli, foci jimra nagi aperl tshowa emoa apakasi, mo acre takamia acre iraro novai tshare, ma tafuri komai foci eifasia acowa.

⁷¶ Nogia, ma aia katufwa iacowa; sara, ma acowa kamo; tuctucia, ma aia katshike iacowa.

⁸Ma iotshi tagata kanogia, katufwa iacre; aia kasara aia kamo; ma ia aia katuctucia aia katshicea.

⁹Mo wehe tasi tatane o acowa, pe tshana nontariki nogia aia keitufwa aofa, ma aia katufwa aia ta fatu?

¹⁰Mo pe aia kanogia eika, tiaha katufwa aia agata?

¹¹Pe acowa tagata isa, keiro keitufwa ane erefia ia erecriki tshowa, sore kagi acowa Tamanowa ia taragi katufwa ane iotshi erefia ia acre kanogia aia iateia.

¹²Ia ane nei ane iotshi acowa acitiafakarafia tagata keimna iacowa, erefia acowa magane hepra iacre; ma tinei kafakairo o tafasao tapu ma o aprofeta.

¹³¶ Roro acowa ia tafeitoca kivi; ma sore tafeitoca, ma sore ta teretu, fano ia ta karoiai, ma tagata nalupai kororo ia aia.

¹⁴Ia ane nei kivi tafeitoca, ma kivi ta teretu, fano ia aneamouri, ma tagata toru ana kacitia ma roro iai.

¹⁵¶ Fatshigeia acowa ma natshicina aprofeta korefu, acre koromai iacowa ia umega o ta sip, kaia arotorea iauiai ane hepe akuli eiro.

¹⁶Acowa keiro acre ia magane tshare. Tiaha tagata kaitoria veini o asoni, mo tsharupe o tereakau matatara?

¹⁷Hepra iotshi foirerakau erefia amo nuhua erefia, kaia foirerakau isa kofua nohua isa.

¹⁸Ta foirerakau erefia sekofua nohua isa, hepe ma ta foirakau isa puspusi kofua nohua erefia,

¹⁹Iotshi foirakau sekofua nohua erefia kotoutshiace, ma kofakarerecea ia tiafi,

²⁰Ia tshare nohua acowa keiro acre.

²¹¶ Jimra iotshi tagata koutucua iatavau, Teriki sore, karoro ia ta vaka o taragi; kaia aia maganerefia hepe ta fakairo o tshaku Tata ko ia taragi.

²²Nalupia tagata katucua iatavau ia taha nopoge, Teriki sore, acime nifasao ia neigo tshou, mo? ma ia neigo tshou acime segeake agelo isa mo? ma ia neigo tshou acime neimna ane sore nalupia mo?

²³Ia taha nopoge tira avau katucua iacra, Avau sekeiro acowa; roro acowa natshicina avau, acowa tagata maganisa.

²⁴¶ Ia ane nei, aia nifakarogona afasao tira tshaku, ma maganerefia iateia, avau katucua aia hepe tatane arapaku, aia nifakaturia tafare tshana iluga tafatu sore;

²⁵Towa nito, tavai tafe nitafe sore, tumtagi sore ma nisau, ma tafare sekoto ma aia nikeria tshana tave fare iluga tafatu sore.

²⁶Acre iotshi tane fakarogono afasao tira tshaku, ma semaganerefia iateia, katucua aia hepe tatane tano nifakaturia tshana fare iluga tawne;

²⁷Towa nito, tavai tafe sore iateia, ma tumtagi nisau, nipuria tafare; aia nito, ma neifasia aia isa.

²⁸¶ Ane nei nimai, wamuri Iesu neitucua iotshi afasao tira, tagata iai nimasaro ia tshana fakairo;

²⁹Ma aia nifakairo acre hepe tasi niamo tomatua, ma jimra hepe tagata serea tatapuria nifakairo.