Read Futuna-Aniwa MATHIUS, 8 Bible Online

MATHIUS, 8 - Futuna-Aniwa bible

MATHIUS, 8

¹NOPOGERA aia nifanifo iraro taora, tagata nalupai su niroro wamuri aia.

²Neicitia, tasi tatane leprose nimai ma nimori iateia, nokoutucua, Teriki sore, pe akoi acitiafakarafia, akoi tomatua penpena avau.

³Iesu nifakatonusia tshana rima, nitofia aia, nokoutucua, Avau acitiafakarafia; penpena akoi. Ma melowa tshana leprose neipenpena erefia.

⁴Iesu neitucage iateia, Fatshigeia akoi natshicina koutucua takou tasi, kaia fano tshou retu keitucage tatane tapu, ma kavatu takavari hepe Moses nifakairo iateia, keifakairo iacre.

⁵¶ Nopogera Iesu nifano Kaperneum, iai nimai iateia tasi Senturio, nogia mukei aia.

⁶Nokoutucua, Teriki sore, tshaku fitshicau nimoy watakoro komace o ta palse, aia komace sore.

⁷Iesu neitucage iateia, Avau kanatu keipenpena aia.

⁸Ta Senturio nifaso neitucage, Teriki avau jimra erefia pe akoi komai efare tshaku; kaia pe akoi koutucua tafasao ana, tshaku fiitshicau kapenpena.

⁹Ma avau tatane fakarogona afasao o aia ta sore, nokomna tagata kotaia tagata keifakarogona tshaku fasao, ma avau koutucua tatane nei Fano, ma aia kofano; ia tasi foci komai ma aia komai.

¹⁰Iai Iesu nifakarogona, tira, aia nimasaro, neitucage acre wamuri aia, Tamari avau koutucua iacowa, Avau secitia fakarogrogo sore hepera, jimra, jimra ia tagata o Isreil.

¹¹Avau katucua iacowa, Pe nalupai tagata kamai ia fanua itata tara konace ma kofanifo, ma acre kanofo ia Ebraham, ma Aisak, ma Jekob ia tavaka o taragi;

¹²Kaia erecriki o ta vaka fakarerece acre watafa ia apouri sore; iai acre katagi ma kamagiugio aniforea.

¹³Iesu neitucage ia ta senturio, Fano tshou retu; ma hepe akoi nifakarogrogo avau, ane kamai iatakoi. Ma tshana fitshicau neipenpena ia our tira.

¹⁴¶ Nopegera Iesu nimai efare o Pitrus, aia neicitia nana o tshana nanahune nimoi ma komace o mukaligi.

¹⁵Aia nitofia tshana norima ma tamace mukaligi nagke aia, ma aia nimasike fitshicau mare.

¹⁶¶ Iai fiafi nimai, acre niarafia iateia tagata nalupia agelo isa neinofo iacre, aia neisegeake agelo isa ia tshanafasao, ma neipenpena acre iotshi nimace.

¹⁷Anira nimai hepe neisereace ia Aisea ta proteta, nokoutucua aia ma niamo tshote ataru, ma fecetshia kace tshote amace.

¹⁸¶ Nopogera Iesu neicitia tagata nalupai su kofori aia, aia nifakairo keifeke koutina ia nofokagi.

¹⁹Tasi tatane nifakairo nimai, neitucage ia aia, Teriki avau kamurikatu akoi ia none iotshi akoi kafano iai.

²⁰Iesu neitucage iateia, Ta akuli eiro nakamo arua tshare, ma amanu o tagerakou nakamo afare manu tshare; kaia ta Nontariki o tagata seamo none wehe keinagi tshana nouru.

²¹Tasi foci o niana tagata aia nifakairo neitucage iateia, Teriki sore, erefia avau fano mokagi ma tanumea tshaku tata.

²²Kaia Iesu neitucage iateia, Komai muri avau, erefia tagata mate tanumea tshare tagata mate.

²³¶ Wamuri aia nisopokace ia tavaka, niana tagata aia nifakairo nisopokace wamuri aia.

²⁴Ma neicitia iai, tumtagi sore su nimai iai ia tatai, pe apiau nifatshikace ia tavaka; kaia aia nimero.

²⁵Niana tagata aia nifakairo nimai iateia, nifagona aia, nokoutucua, Teriki sore kapare acime, acitia kamate.

²⁶Aia neitucage iacre, Tiaha acowa kumtacu sore, acowa fakarogrogo sisi avau? Iai aia nimasike neiseciria atumtagia ma tatai; iai nimarino sore.

²⁷Kaia takou iai nimasaro, nokoutucua, Taha tatane tenei, pe tumtagi ma tatai nifakarogono tshan afasao!

²⁸¶ Nopogera aia nimai iai ia fanua o tagata Cercesia, iai nifapa aia erua tatane agelo isa neinofo iacrawa, acrawa niroce watafa tupunaga tanumea tagata iai, acrawa fakoko isa, tagatotshi seroro ia teretu tira.

²⁹Neicitia, acrawa nitapa fakapalo, nokoutucua, Taha acime neimna iatakoi, Iesu akoi Nontariki o Atua? Akoi komai icunei keitakaro iai acime mokagi taha nopoge iateia, mo jimra?

³⁰Papai iai ia acre apakasi nalupia su nokororo nokokai.

³¹Agelo isa nifakowia mukei aia, nokoutucua, Pe akoi kasigiake acime, erefia acime keiroro ia apakasi.

³²Aia neitucage iacre, Roro, Iai acre niroce watafa tatane, acre niroro ia apakasi, neicitia acreiotshi apakasi iai nifura milowa egosa ia tatai, nikero ia avai.

³³Acre niarafia acre apakasi iai nifura, niroro ia aretu tshare ia tumrai sore, neitucua ane iotshira, ma taha aia neimna ia acre agelo isa neinofo iateia.

³⁴Neicitia iai, tagatotshi o tumrai sore niromai watafa keitapa Iesu, iai acre neicitia aia, acre neinogia aia mukei keifeke watafa tshare afanua wateriari.