Read Futuna-Aniwa MATHIUS, 9 Bible Online

MATHIUS, 9 - Futuna-Aniwa bible

MATHIUS, 9

¹AIA nisopocea ta vaka, nisua nofokagi, nimai ia tumrai sore tshana.

²Neicitia iai acre nimai iateia ta tane tasi nimace o ta palse, aia nokomoy ia ta potu; Iesu nokocitia tshare fakarogrogo aia, neitucage ia aia nimace o ta palse, Tucutariki kabisa akoi, nori tshou maganisa keiamke.

³Neicitia, faru o acre fakou nifakairo neitucage ia arotorea, Tatane nei nifasosa.

⁴Iesu nikeiro tshare fenagaro, neitucage, Tiaha acowa mentua ane isa ia arotowa?

⁵Ma komeru keitucua, Nori tshou maganisa keiamke; mo keitucua, Masike, ma fano?

⁶Kaia pe acowa keiro pe ta Nontariki o tagata tomatua ia takere wararoni keiamke nori o maganisa, iai aia neitucage ia tamace o ta palse, Masike, avake tshou apotu, ma fano tshou efare.

⁷Aia nimasike, nifano ia tshana fare.

⁸Kaia iai tagata nalupia su nifetacina neicitia anera, acre nimasaro, nibisa ia Atua, aia neitufwa fakasore tomatua tira ia tagata.

⁹¶ Hepe Iesu nifeke nifano iai, aia neicitia tasi tatane neigo Mathius, nokonofo none iai acre neitufwa mune tsha teriki iai; aia neitucage iateia, Komai wamuri avau. Aia nimasike, nifano wamuri aia.

¹⁰Ane nei nimai, hepe Iesu neinofo nokokai efare, neicitia nalupia tagata niamo mune tsha ma tagata isa niromai neinofo ia aia ma niana tagata aia nifakairo.

¹¹¶ Iai fakou Farasi neicitia tira, acre neitucage ia niana tagata aia nifakairo, Tiaha tshowa teriki nokokai ia tagata niamo mune tsha teriki ma tagata isa?

¹²Kaia Iesu nifakarogona tira, aia neitucage iacre, Acre komouri secitiafakarafia keicitia tagata keiro amace, kaia acre komace.

¹³Kaia roro acowa ma keiro nokano o afasao tira, Avau kacitiafakarafia maganerefia o tagata; ma jimra takavari, ma avau semai keitapa tagata maganerefia, kai tagata isa, keinatshicina ma femacowa maganisa tshare.

¹⁴¶ Nopogera nimai iateia fakou Joanes nifakairo, nokoutucua, Tiaha acime ma tagata Farasi kopari, kaia tagata akoi fakairo sekopari mana?

¹⁵Iesu neitucage, iacre, Tiaha erecriki o tafare arafia ta fine kotagi, nopoge iotshi ta tane fakavegeina tshana fine konofo iacre, mo? kaia taha nopoge kamai, tatane karafia tshana fine, kanatshicina acre, taha nopoge tira acre kapari.

¹⁶Jimra ta tane tasi suciapofna nopito tumaga fou ia tumiga ituai, ma nopito suciapofna tafotu eifasia tumiga ituai, ma eifasia sore su iateai.

¹⁷Foci jimra tagata regea weina fou ia avai toga ituai, mo avaitoga eifasia, ma ta weina komarigi, avai toga isa ana; kaia acre keitifia weina fou ia avai toga fou, ma acrawa nofo erefia.

¹⁸¶ Hepe aia nifasao ane iotshi ra iacre, neicitia, tasi tereki nimai iateia nimori aia, nokoutucua, Tshaku nofine milou tamari nimate, kaia komai fecetshia tshou norima ilugia aia, ma aia kamouri.

¹⁹Iesu nimasike nifano wamuri aia, foci ma niana tagata aia nifakairo wamuri aia.

²⁰¶ Neicitia iai, tasi tafine, nimace tshana toto nimaregi iateia toufi twelv, aia nimai wamuri aia, nitofia nuntafa o tshana tumiga;

²¹Ma aia neitucua ia tshana roto, Pe avau tofia ana tshana tumiga, Avau kamouri.

²²Kaia Iesu nitafuri, iai aia neicitia aia, aia neitucage, Tucufine kabisa akoi; tshou fakarogrogo avau neipenpena tshou notshino. Ta fine neimna komouri ia our tira.

²³¶ Nopogera Iesu nimai efare o ta teriki, ma neicitia acre nimakuru ma nikotagi.

²⁴Aia neitucage iacre, Fakasara; ma tafine sisi tira sematiamana, kaia aia nokomero ana, Acre nikata nifakasega aia.

²⁵Kaia iai wamuri nitaroce acre iotshi efuafo, aia nifano efare, nipurutshia tshan orima, ma ta fine sisi nimasike.

²⁶Afasao ia nimasaro sore iateia nifano kofori iotshi ta fanua tira.

²⁷¶ Nopogera Iesu nifeke none iai, erua tagata foimata pouri niroro wamuri aia, nokhtapa, ma nokoutucua, Akoi Nontariki o Tevit kowcitiafakarafia acimawa.

²⁸Aia nimai efare iai, erua takou foimata pouri nimai iateia; Iesu nifakouia acrawa, Akorua fakarogrogo avau pe avau tomatua penpena iakouri, mo jimra? Acrawa neitucage iateia, Keini, Teriki sore.

²⁹Iai aia nitofia tsharawa foimata nokoutucua, hepe fakarogrogo o akorua keimna erefia iakorua.

³⁰Tsharawa foimata kuara nimerama, Iesu neitucuasana mukei acrawa nokoutucua, seitucua tagata tasi.

³¹Kaia acrawa niroro, neitucua fakasore ia tshana tomatua ia iotshi fanua tira.

³²¶ Hepe acre niroro efuafo, neicitia, acre niarafia iateia tatane tano, agelo isa neinofo iateia.

³³Iai ta agelo isa neisegeake, ta tane tano nifasao, ma tagatotshi nifetacina iai nimasaro, nokoutucua, secitia mana hepra ia fanua o Isreil.

³⁴Kaia Afarasi neitucua, aia segiake agelo isa ia teriki o agelo isa.

³⁵¶ Iesu nifano nifori umrai sore iotshi ma umrai sisi iotshi, nokofakairo acre i afare mori tshare, nikova afasao erefia o tavaka, ma neipenpena amaci iotshi, ma iotshi amy, o tagatotshi iai.

³⁶¶ Kaia iai aia neicitia tagata nalupia su nifetacina, tshana roto karafeina acre, ia ane nei, acre nimatese, ma neinofo, kofori papai, hepe sip takou seiratshia acre.

³⁷Iai aia neitucage ia niana tagata aia nifakairo, tagata fakatupu keifakarogona afasao, kaia tagata vere keifakairo acre toru ana.

³⁸Mori acowa ia Teriki o tavare tira, pe aia kakowna faru foci tagata kavere ia tshana vere.