Read Futuna-Aniwa MARKUS, 1 Bible Online

MARKUS, 1 - Futuna-Aniwa bible

MARKUS, 1

¹TA nontafito o tafasao erefia o Iesu Kristo, ta Nontariki o Atua;

²Hepe neisiriace i tatapuria o ta aprofeta Kowcitia avau kowna fitshicou tshaku mokagi tshou foimata, aia kepenpena teretu tshou mokagi akoi.

³Ta norio o tasi nokotapa i tugogau, Penpena acowa ta teretu o ta Teriki, aiseria totonu tshana aretu.

⁴Joanes nibaptiso ia tugogau nifakairo ta baptiso o tagata keinatshicina ma feimagowa maganisa, ma keiamke nori amaganisa.

⁵Niroro iai iateia tagatotshi o fanua Juteia, ma acre o Jerusalem, aia nibaptiso acre iotshi, i tavai tafe Jortan, acre nokoutucua tshare maganisa.

⁶Joanes nitaka ia tumiga o nofouru o akamila, aia nitoutshi ia nokiri o ane; aia nikeina ase ma hune.

⁷Aia nifakairo tagata nokoutucua, Tasi komai wamuri avau aia tomatua sore, avau tomatua sisi, tavava ane fousia tshan avai avou serefia keifou ma vetea.

⁸Avau tamari nibaptiso acowa i tavai; kaia aia kabaptiso acowa ia Nokano Tapu.

⁹¶ Ane nei nimai ia nopogira, Iesu nifeke Nasareth o tafanua Calili, ma Joanes nibaptiso aia ia tavai tafe Jortan.

¹⁰Milowa nokonace nifeke tavai, aia neicitia taragi neitshicea, ma Nokano Tapu hepe tafoitu nokofanifo iluga aia;

¹¹Ta noreo o tasi nimai ia taragi, nokoutucua, Akoi tucutariki, nakacitiafakarafia akoi, Avau kabisa ia akoi.

¹²¶ Milowa ta Nokano Tapu sigiake aia ia tugogau.

¹³Aia neinofo iai ia tugogau nopoge forte, Satana neiresia aia; aiana neinofo iai ia aneiro; ma agelo niavere tshana.

¹⁴¶ Wamuri acre neinage Joanes i ta fare mukei, Iesu nimai ia Calili nokofakairo tafasao erefia o tavaka o Atua.

¹⁵Nokoutucua, ta nopoge komaice; tavaka o Atua koitata; kotafuri arotowa keinatshicina ma feimacowa maganisa, ma fakarogrogo tafasao erefia.

¹⁶¶ Iai aia nifano ia watai o Calili, aia neicitia Saimona, ma Antreus tsho noso nokotatuce takowpega ia tatai, ma acrawa tagata fagota.

¹⁷Iesu neitucage iacrawa, Romai wamouri avau akorua, avau kamna akorua keifagota tagata.

¹⁸Milowa acrawa natshicina akowpega tsharawa, niroro, wamuri aia.

¹⁹Aia nifano foci fakasisi iai, aia neicitia Jakobus ta nontariki o Sebeteius, ma Joanes tsho noso, acrawa ma neinofo ia tavaka nokoucia akowpegarawa.

²⁰Milowia aia nitapa acrawa; ma acrawa natshicina tamanarawa Sebeteius ia tavaka ia tshare afitshicou ma niroro wamuri aia.

²¹Acre niroro ia Kaperneum; ma milowa ia nopoge tapu aia nifano ia tafare mori nifakairo acre.

²²Acre nimasaro ia tshan afasao, ma aia nifakairo acre hepe tasi tomatua, ma jimra hepe tagata fakairo.

²³Tatane tasi iai ia tafare mori tshare, agelo isa neinofo ia aia, ma aia nitapa fakapalo.

²⁴Nokoutucua, Natshicina acime; ia taha acime acitiafakarafia akoi, Iesu o Nasareth? Akoi komai keitakaroiai acime mo jimra? Avau keiro akoi ta tane tapu erefia o Atua.

²⁵Iesu neiseciria aia, nokoutucua, Natshicina tshou afasao ma komai watafa aia.

²⁶Iai agelo isa neifasia aia, neitapa ia fakapalo norea ma nimai watafa aia.

²⁷Acreiotshi nimasaro, acre nifakowia acre, nokoutucua, Taha tenei? taha fou fakairo tenei? ma ia tomatua aia nikofasao agelo isa, ma acre fakarogona tshan afasao.

²⁸Milowa tafasao o tomatua tshana nifano kofori iotshi fanua o Calili.

²⁹¶ Milowa acre niromai efuafo tafare mori, acre niroro ia tafare o Saimona ma Antreus, ia Jakobus ma Joanes.

³⁰Kaia ta nana tsha nanahune o Saimona nimoi nimace o mukaligi, milowa acre neitucua, aia iateia.

³¹Aia nimai nipurutshia tshan orima, neitshicitshia aia; ma milowa ta maci mukaligi nagke aia, ma aia fitshicou mare.

³²¶ Ta tefiafi, tara takeifo, acre niarafia iatea tagatotshi nimace iai, ma tagata agelo isa nokonofo ia acre.

³³Tagatotshi ia tumrai sore iai nifetacina ia tafeitoca.

³⁴Aia neipenpena nalupai tagata nimace o amace nalupai sece ma sece, ma neisegiake agelo isa nalupai, neitucuasana agelo isa keifasao, ma acre nikeiro aia.

³⁵¶ Ia tapopo, ia tafeitiata, aia nimasike nifeke, nifano ia none tugogau, nimori iai.

³⁶Saimona ma acre foci iai ia aia niroro wamuri aia.

³⁷Acre neicitia aia iai, acre neitucua iateia, Tagatotshi nokosara akoi.

³⁸Aia neitucage iacre, Acitia kororo ia umrai iotshi itata, ma avau kova foci iai, ma avau nimy ia tavere nei.

³⁹Aia nifakairo acre ia tafare mori tshare ia tafanua iotshi o Calili, ma neisegiake agelo isa.

⁴⁰¶ Iai tatane leprose nimai iateia, nokofakowia mukei aia, nokofakaturia inturi iateia, ma nokoutucua iateia, Pe akoi acitiafakarafia, akoi tomatua penpena avau erefia.

⁴¹Iesu nikarafeina aia, nifakatonusia tshana norima, nitofia aia, neitucage iateia, avau acitiafakarafia; penpena akoi erefia.

⁴²Milowa hepe aia nifasao, ta leprose neinagke aia, aia neipenpena erefia.

⁴³Aia neitucuasana mukei aia, ma milowa nikownace aia;

⁴⁴Neitucage iateia, Fatshigeia akoi sefasao ia tane tasi; kaia fano tshou retu, tatane tapu kowcitia akoi, kavagi takavari ia penpena tshou amace, ane iotshi Moses nifakairo iateia, ma magane nei fakairo acre.

⁴⁵Kaia aia nifano efuafo, neikamata keifasao sore iateia, keitucage ia tagata papai ma ane nei, pe Iesu sefanomana foci ia tumrai sore imoa acre, kaia aia neinofo watafa ia tugogau; ma acre niromai iateia o fanua iotshi.