Read Futuna-Aniwa MARKUS, 10 Bible Online

MARKUS, 10 - Futuna-Aniwa bible

MARKUS, 10

¹AIA nimaske nifeke iai, nimai ia watai o afannua Juteia ia nofo kagi o nuntafa Jortan; tagata nifetacina foci iateia; hepe tshana magane aia nifakairo acre foci.

²¶ Tagata Afarasi niromai iateia, nifakowia aia, Itapu tatane keitowaki nanahune tshana, mo jimra? keitakaroiai aia.

³Aia nifasao neitucage iacre, Taha Moses nifakairo acowa iateia.

⁴Acre neitucua Moses nifakairo aiseria tatapuria iateia, ma wamuri tira keisigiake aia.

⁵Iesu nifasao neitucage iacre, Ma arotowa mukei ai neiseria tafasao nei iacowa.

⁶Kaia ia neikamata o nontafito o ane iotshi, Atua neimna acrawa tatane ma tafine.

⁷Ma ane nei tatane kanatshicina tshana tamana ma nana, ma acitiafakarafia keinofo mukei ia tshana nanahune.

⁸Acrawa hepe notshino tishana; wamuri nei acrawa jimra erua foci, kaia hepe tishana notshino.

⁹Acre hepe tira, Atua nifousia acrawa hepe tishana, itapu tagata eivetea acrawa.

¹⁰Efare niana tagata aia nifakairo nifakowia aia foci o ane tira.

¹¹Aia neitucage iacre, Pe tatane tasi katowaki tshana nanahune, ma karafia tasi foci, aia kotshigo fafine tsha faruke iateia.

¹²Pe ta fine kakownace tatane nunwane tshana, ma keiarafia tatane foci tshana, aia kotshigo tatane tsha faruke.

¹³¶ Acre niarafia erecriki iateia, pe aia tofia acre, niana tagata aia nifakairo neiseciria acre niarafia erecriki.

¹⁴Kaia iai Iesu neicitia tira, aia nifakainina sore, neitucage iacre, Arafia erecriki sisi iatavou, ma seneitucuasona acre; ma hepe o acre ko tavaka o Atua.

¹⁵Tamari avau koutucua iacowa, Pe tagata natshicina kamo tavaka o Atua hepe erecriki sisi, aia jimra kafano ia aia.

¹⁶Ma aia nitakoia acre ia tshana norima, nifecetshia norima iluga acre, nifasao erefia acre.

¹⁷Nopogera aia nifano watafa ia teretu, iai tasi tatane nimai nitere ifakaturia inturi iateia, nifakowia aia, Teriki Erefia, taha avau kamna pe avau kamo ania mouri taragi atau ma tau?

¹⁸Iesu neitucage iateia, Tiaha akoi koutucua avau erefia? jimra tasi erefia, kaia tasi, Atua.

¹⁹Akoi keiro tafasao tapu o Atua, Natshicina tshigo fafine tsha faruke, Natshicina kotaia tagata, Natshicina tshigofia, Natshicina korefu keiresia tagata, Natshicina acitiafakarafia ane tsha faruke, Maganerefia ia tamau ma nau.

²⁰Aia nifasao neitucage iateia, Teriki ane iotshi tira avau nakamna ituai avau tamasisi milownei ma.

²¹Iesu nokowcitia aia neicitiafakarafia aia, neitucage iateia, Ane tasi tshou kojimra; fano tshou teretu, fakamata ania mane tshou, eitufwa nomata ia tagata ane tshare kojimra, ma nomata erefisa tshou konofo ia taragi; ma komai, amo ta fakaravasia, mai mamuri avau.

²²Kaia tafasao tira neimna niana roto nimy sore, aia nifano ia nimy sore iateia; ma tshana afanua ania mane ma nalupai su.

²³Iesu neisara kofori, neitucage niana tagata aia nifakairo, Ane mukei tagata nakamo ma fakarogrogo mune mo ania mane keiroro ia tavaka o Atua!

²⁴Niana tagata aia nifakairo nimasaro sore ia tshana fasao. Kaia Iesu nifasao foci, neitucage iacre, Erecriki, ane mukei ma tagata fakarogrogo mune ma toutokogane keiroro ia tavaka o Atua!

²⁵Aia komeru ta kamila keifano ia foimata o ta suce, kaia ane mukei tatane nakamo mune toutokogane ma keiroro ia tavaka o Atua.

²⁶Acre nimasaro sore su iateia, nokoutucua iacre ana, Akai fano ia tumrai taragi?

²⁷Iesu nokosara ia acre, neitucage, Ia tagata ane mukei, kaia jimra ia Atua; ma ia Atua ane iotshi komeru.

²⁸¶ Iai Pitrus neikamata keitucage iateia, Kowcitia, acime natshicina ane iotshi ma nakaroro wamuri akoi.

²⁹Iesu nifasao, neitucage, Tamari avau koutucua, iacowa, Jimra tatane tasi natshicina tafare, mo anoso, mo anokave, mo afatamana, mo fanana, mo nanahune, mo erecriki, mo afanua, ma tshana acitiafakarafia iatavau, ma tshaku fasao erefia,

³⁰Kaia katufwa aia fakamata foci wun huntret ia nopoge nei, afare, ma anoso, ma anokave, ma fanana, ma erecriki, ma afanua, ia kosewa iatavau, ma i fanua keimai wamuri nei ania mouri atau ma tau.

³¹Kaia tagata nalupai mokagi nopogera taha nopoge acre wamuri, ma acre wamuri taha nopoge acre mokagi.

³²¶ Nopogera acre ia teretu nokororo ia Jerusalem; Iesu nifano mokagi acre; ma acre nimasaro, ma hepe acre niroro wamuri, acre nimtacu iai. Aia niamo foci tagata ta twelv, neikamata keitucage iacre ane iotshi karomai iateia,

³³Nokoutucua, Kowcitia, acitia kororo ia Jerusalem; iai ma ta Nontariki o tagata kavagi ia fatoriki o tafare mori, ma ia fakou aiseria tatapuria, acre kafasosa iateia katshi aia komate ma kavagi, aia ai tagata arotorea pouri.

³⁴Acre kafakamana aia, katshi aia ia ta toura, kasavari aia, katshi aia komate, ma ia nopoge toru aia kamasike foci.

³⁵¶ Jakobus ma Joanes, ruantariki o Sebeteius, niromai iateia, nokoutucua, Teriki acimawa acitifakarafia akoi keitufwa acimawa ane acimawa kacitiafakarafia keinogia akoi iateia.

³⁶Aia neitucage iacrawa, Taha akorua acitiafakarafia avau kamna iakorua?

³⁷Acrawa neitucua iateia, Eitufwa acimawa pe acimawa keinofo tasi ia norima matau, ma tasi foci ia norima masui, ia ta sore kabisa tshou.

³⁸Kaia Iesu neitucage iacrawa, Akorua puspusi taha akorua fakowia, akorua tomatua keinumia o ta kup tira avau kanumia o aia, mo jimra? ma keiamo ta baptiso tira neibaptiso avau ia aia, mo jimra?

³⁹Acrawa neitucua iateia, Acimawa tomatua. Iesu neitucage iacrawa, Akorua tamari kanumia o ta kup tira avau numia o aia, ma ia ta baptiso, tira baptiso avau ia aia, ia iotshira kabaptiso akorua.

⁴⁰Kaia keinofo ia tshaku norima matou, ma ia tshaku norima masui kojimra tshaku keitufwa, kaia iacre aia neimna mokagi iateia.

⁴¹Nopogera ta ten nifakaragona tira acre neikamata keifakainina sore ia Jakobus ma Joanes.

⁴²Kaia Iesu nitapa acre iateia, neitucage iacre, Acowa keiro acre takou sore o tagata arotorea pouri iafanua, emna magane o niare fateriki iacre; ma fateriki tshare arafia acre ia vere tshare.

⁴³Kaia acowa jimra kamna magane hepe iacre; kaia aia kacitiafakarafia aia ta sore o acowa, aia kafetshicou tshowa;

⁴⁴Ma pe tasi o acowa acitiafakarafia aia teriki tshowa, aia kafetshicou o acowa iotshi.

⁴⁵Ma ta Nontariki o tagata jimra nimai keiamo fetshicou nulupai, kaia keimna vere o fetshicou, ma keitufwa tshana ania mouri fakamata o amagane tsha tagata nalupai.

⁴⁶¶ Acre niromai ia Jeriko; hepe aia nifeke watafa Jeriko ia niana tagata aia nifakairo, ma tagata nalupai su wamuri aia, Bartimius niana foimata pouri, ta nontariki o Timius, neinofo iai ia nuntafa teretu nokofakowia ane o acre niroro ia teretu.

⁴⁷Nopogera iai aia nifakarogona aia ta Iesu o Nasareth, aia neikamata keitapa palo, neitucage, Iesu, Nontariki o Tevit, sara fakarafia ia avau.

⁴⁸Nalupai tagata neitucuasana aia keifasao, Kaia aia neitapa foci nalupai, Akoi Nontariki o Tevit sara fakarafia avau.

⁴⁹Iesu nikotu ana iai, neitucage iacre iai keitapa aia. Acre nitapa ta tane tshana foimata pouri, Nokoutucua, Kabisa akoi, masike; aia kotapa akoi.

⁵⁰Aia nitowaki tshana miga iluga, nimasike, nimai ia Iesu.

⁵¹Iesu nifaso neitucage iateia, Taha akoi acitiafakarafia avau kamna iatakoi? Tatane foimata pouri neitucage iateia, Teriki pe avau kowcitia fakarafia.

⁵²Iesu neitucage iateia, Fano tshou teretu; tshou fakarogrogo nakeimna akoi erefia, Milowa tshana foimata merama neicitia erefia, aia nifano wamuri Iesu ia teretu.