Read Futuna-Aniwa MARKUS, 11 Bible Online

MARKUS, 11 - Futuna-Aniwa bible

MARKUS, 11

¹Ma nopogera acre, niromai itata Jerusalem ia Bethfej ma Bethane ia taora Olivet, aia nikowna erua o niana tagata aia nifakairo.

²Neitucage iacrawa, Roro tsharua retu ia tumrai iai mokagi akorua; milowa wamuri akorua nakaroro ia tumrai, akorua kacitia tentama o ta as ninoutshia iai, ia tshana nopua tagata senofo mokagi, eivetea tshana vava, ma arafia aia iatavau.

³Pe tatane tasi fakowia akorua, Tiaha akorua neimna nei? akorua koutucua, ta Teriki acitiafakarafia aia, ma milowa aia kownace aia icunei.

⁴Acrawa niroro tsharawa teretu, niecitia tentama neinoutshia itata tafeitoca efuafo ia nuntafa iai wehe erua teretu maga; acrawa neivetea aia.

⁵Faru o acre nikotu iai neitucua iacrawa, Tiaha akorua nokovetea ta tentama?

⁶Acrawa neitucua iacre hepe Iesu nifakairo acrawa, ma acre nikownace acrawa.

⁷Acrawa niarafia tentama o ta as ia Iesu, acre nifirecea tshare umiga iluga aia, ma Iesu nikoike ia tshana nopua.

⁸Nalupai tagata nifirecea umiga tshare ia teretu, faru foci tagata neitoutshiace anora o tererakou nifirecea acre ia teretu.

⁹Acre niroro mokagi aia, ma acre wamuri, nitapa nokoutucua Hosana! Erefia aia komai ia neigo o ta Teriki sore!

¹⁰Erefia tavaka o tamanome Tevit, tira komai ia neigo o ta Teriki sore! Hosanah ia taragi iluga!

¹¹Iesu nifano ia Jerusalem, ia tafare mori; iai aia neicitia kofori ane iotshi, milowa tefiafi nimai, aia nifanoce ia Bethane, ia niana tagata ta twelv.

¹²¶ Ia aratou acre niromai nifeke Bethane, aia nitshitogi,

¹³Nokosara tasi tsharupe papai norau tshana iai, aia nimai keisara pe aia keicitia nohua iai, aia nimai iateia, aia neicitia norau ana iai, ma tumrama tsha tsharupe semai.

¹⁴Iesu nifasao neitucage iateia, Jimra tatane tasi kakai tshou nohua wamuri nei atau ma tau, Niana tagata aia nifakairo nifakarogona tira.

¹⁵¶ Acre niromai ia Jerusalem; Iesu nifano ia tafare o Jhova, neikamata keiturocina acre tagata nifakamata ma niamo nomata o ane ia tafare o Ihova, nifurusia ma afata o tagata neiioria mune, ma ane tagata nokoike iai nifakamata afoitu;

¹⁶Aia neitucuasana mukei acre tagata iai natshicina keiamke aganea ia teretu o tafare mori sore.

¹⁷Aia nifakairo, nokoutucua iacre, Aia ko jimra neiserace mo, “Tshaku fare tagatotshi o iafanua iotshi katucua neigo tafare mori? Kaia acowa neimna aia tupunaga o tagata tshigofia.”

¹⁸Fakou nifakairo tatapuria ma fatoriki o tafare mori nifakarogona tira, acre neisara neicitiafakarafia takaroiai aia, ma acre nimtacu aia, ma ane tira tagatosthi nimasaro ia tshan afasao aia nifakairo.

¹⁹Iai fiafi nimai aia nifeke watafa tumrai sore.

²⁰¶ Ia tapopo, hepe acre niroro fakatafa, acre neicitia ta tsharupe nimero ia nontafito.

²¹Pitrus neimintua neitucage aia, Teriki, kowcitia, ta tsharupe akoi neisaciria aia komero sa.

²²Iesu nokofasao neitucage iacre, Nokamo fakarogrogo i Atua.

²³Ma tamari avau koutucua iacowa, Pe tagata tasi katucua ia taora nei, Akoi natshicina konofo icunei, ma towaki akoi ia tatai; ma kanatshicina kumtacu ia tshana roto, kaia kafakarogrogo ane aia nokofasao iateia karomai, aia kamo ane iotshi aia koutucua iateia.

²⁴Ianei avau koutucua iacowa, Ane iotshi acowa acitiafakarafia, pe acowa mori, fakarogrogo acowa kamo ane iotshira, ma acowa kamo ane iotshira.

²⁵Pe acowa kotu nokomori, towaki niawa fakainina, pe fakainina konofo ia niawa roto ia tagata tasi, ma Tamanowa i taragi Katowaki tshana fakainina ia maganisa tshowa.

²⁶Kaia pe acowa setowaki fakainina tshowa, foci Tamanowa taragi kanatshicina towaki tshana fakainina ia amaganisa tshowa.

²⁷¶ Acre niromai foci ia Jerusalem, iai hepe aia nikotakaro ia ta fare o Ihova, iai niromai iateia fatoriki o tafare mori, fakau fakairo, ma fakau sore.

²⁸Neitucua iateia, Akai nikowna akoi keimna ana iotshi tira? akai neitufwa akoi tomatua keimna ane iotshi tira ma?

²⁹Iesu nifasao neitucage iacre, Avau ma kafakowia acowa ane tishana, pe acowa koutucua avau, avau ma koutucua iacowa akai neitufwa avau tomatua keimna ane iotshi tira.

³⁰Ta baptiso o Joanes, nimai o taragi, mo o tagata? eitucua iatavau.

³¹Acre nifasao macre, nokoutucua, Pe acime koutucua o taragi, aia katucua, Tiaha acowa sefakarogrogo aia?

³²Kaia pe acime katucua, O tagata; acre nimtacua tagata; ma tagatotshi nikeiro Joanes, aia ta profeta tamari.

³³Acre nifasao neitucua ia Iesu, acime puspusi. Iesu nokofasao neitucage iacre, avau foci ma kanatshicina koutucua iacowa ia tomatua tsha akai avau eimna ane iotshi tera.