Read Futuna-Aniwa MARKUS, 13 Bible Online

MARKUS, 13 - Futuna-Aniwa bible

MARKUS, 13

¹HEPE aia nifano efuafo tafare o Ihova, tasi o niana tagata aia nifakairo neitucage iateia, Teriki kowcitia afatu sore tira, afare erefia ma.

²Iesu nokofasao neitucage iateia, Akoi kowcitia afare sore tira; iai jimra tasi tafatu kanofo iluga tafatu foci, kafakarerece iotshi iraro.

³Hepe aia neinofo ia taora Olivet mokagi tafare o Ihova, Pitrus ma Jakobus, ma Joanes, ma Antreus ana nifakowia aia,

⁴Koutucua iacime, inaia ane iotshi tira karomai? Ma taha acime kacitia i taha nopoge ane iotshi tira karomai?

⁵Iesu nokofasao acre neikamata keitucage, Fatshigeia pe tatane tase sekeiresia acowa;

⁶Ma nalupai karomai ia tshaku neigo, nokoutucua, Avav ta Kristo, ma acre karasia tagata nalupai.

⁷Taha nopoge acowa kafakarogona o atowa, afasao sore o atowa ma, natshicina acowa kumtacu, ma ane iotshi tira tamari karomai, kaia nopoge wamuri sekaromai milowa.

⁸Ma fanua tasi kamasike kataia fanua foci, mo ta vaka tasi kataia tasi foci ta vaka; umahuke ma karomai ia nuntafa nalupai, akai o tagata o fanua nalupai ma kajimra kabune, amy nalupai ia arotorea ma; iotshi ane tira karomai neikamata o tamai nalupai i aroto o tagata.

⁹¶ Kaia fatshigeia fakarafia acowa; ma acre karafia acowa ia fakou sore arapakou kofasao, ia afare mori ma acre kataia acowa, acre karafia acowa ma mokagi fakou sore ma fatoriki ma ane nei acowa acitiafskarafia avau, ma ia neitucuasana maganisa tshare.

¹⁰Ma ta fasao erefia katucua mokagi i iafanua iotshi.

¹¹Kaia taha nopoge acre karafia acowa, ma katufwa acowa iacre, natshicina acowa kamintua afasao mokagi iateia, mo nagi afasao ia fenagarowa iatea; kaia taha afasao katufwa iacowa iateia ia our tira, tina koutucua acowa; ma kojimra acowa kofasao, kaia ta Nokano Tapu.

¹²Milou ta noso kafakareresia ta noso ia ta mate, ma tamana ta nontariki, ma erecriki kamasike takaroiaia ta mana ma nana tshare, kautucua tagata kotaia acre komate.

¹³Ma tagatotshi kafeimacowa acowa ma ane nei acowa acitiafakarafia tshaku neigo, kaia aia kapurutshia tshana acitiafakarafia iatavau ia nopoge wamuri, aia kafano taragi.

¹⁴¶ Kaia ia taha nopogi acowa kacitia ane isa tsha takaroiai isa ana, neitucua afasao iateia ia tatapuria o Taniel ta profeta, nokotu ia none tapu aia iai (erefia aia tawa tatapuria keiro nokano), taha nopoge tira erefia tagata konofo ia fanua Juteia kafura ia aora.

¹⁵Erefia aia konofo iluga tatahufu o tafare natshicina fano iraro efare, ma natshicina fano efare, keiamke efuafo ane tishana ia tshana fare.

¹⁶Erefia aia konofo ia ta vere natshicina kuafe foci keiamo tshana miga.

¹⁷Kaia kowe iacre nuntama konofo ia nonai tshare, iacre ma keitufwa erecriki fakoumia tou ia taha nopoge iotshi tira!

¹⁸Mori nogia Ihova acowa, pe kofura tshowa jimra kamai ia nopoge poto ma mukaligi.

¹⁹Ma ia nopoge iotshi tira kamai tamy nalupai, jimra tamai hepe mokagi wamuri nontafito o ane iotshi Atua neimna ia nopoge tira, ma sekaromai nopoge wamuri hepra.

²⁰Pe Ihova sekamna potpoto anopoge iateia, jimra tagata tasi konofo wamuri, kaia ma niana tagata aia mokagi neicitiafakarafia aia neimna potpoto tira.

²¹I taha nopoge tira pe tatane tasi katucua iacowa, kowcitia Kristo icunei; mo, kowcitia, Kristo icona, natshicina fakarogrogo tshanafasao.

²²Ma faru Akristo korefu, ma faru aprofeta korefu kamasike, kamna ane sore nalupai, keimna tagata komasaro, ma keiresia tagata nalupai, kaia sekeiresia tagata Ihova mokagi neicitiafakarafia.

²³Keia fatshigeia acowa; kowcitia avau koutucua ane iotshi mokagi iacowa.

²⁴¶ Kaia i taha nopoge iotshi tira, wamuri tamy sore tira, tara kamna pouri, tumrama ma kanatshicina kavagi mirama tshana,

²⁵Ma afatu ia taragi kamerigi, ma ane iotshi o tomatua ia taragi ka virviri.

²⁶Taha nopoge acre kacitia ta Nontariki o tagata nokomai ia apa ia tomatua sore ma kabisa tshana.

²⁷Ia taha nopoge aia kakowna niana agelo, kafetacina niana tagata aia mokagi neicitiafakarafia ia tumtagi efa, ma ia nopitopito fanua papai, ia nontafa taragi papai su ma.

²⁸Fakarogona ta fakatagasia o ta tsharupe; taha nopoge tsho nora komeru ma tshana norau nokotupu, acowa keiro nopoge ane iotshi kosomo koitata.

²⁹Hepe ana, taha nopoge acowa kacitia ane iotshi nei komai, keiro aia koitata, ia afitocoa tafare.

³⁰Tamari avau koutucua iacowa, pe faru tagata konofo milownei sekamate, mokagi ane iotshi nei karomai.

³¹Taragi ma iafanua karoro, kaia tshaku afasao sekaroro.

³²¶ Kaia o tira nopoge, ma our, jimra ta agelo konofo ta teragi keiro, ma jimra ta Nontariki keiro, kaia ta Mana.

³³Sara fakarafia acowa, fatshigeia ma mori, ma acowa puspusi roaia ta nopoge komai.

³⁴Ma ta Nontariki o tagata hepe tatane nokofano ia fanua papai, nopogera aia natshicina tshana fare, aia nifakairo niana fitshicou, niavage tasi ma sece iotshi takou tshana vere, ma nifakairo aia nifatshigeia tafeitoca keifatshigeia fakarafia.

³⁵Fatshigeia acowa foci, ma acowa puspusi pe teriki o tafare nokomai, ia tafiafi, mo ia taratupo, mo ia tafeitiata amoa koko, mo i tapopo.

³⁶Pe aia komai milowa aia koricofia acowa nokomiro.

³⁷Taha avau koutucua iacowa, avau koutucua ia tagatotshi, Fatshigeia.