Read Futuna-Aniwa MARKUS, 14 Bible Online

MARKUS, 14 - Futuna-Aniwa bible

MARKUS, 14

¹WAMURI nusiri nopoge erua tacripoga o ta paska nimai, ma o ta aofa leven jimra iai; fatoriki o tafare mori, fakou fakairo ma nifatshigeia keipurutshia aia ia karasia tshare, ma kotshi aia komate.

²Kaia acre neitucua, Jimra ia nopoge o tacripoga, ma tagata kofiatu iateia.

³¶ Aia nokonofo ia Bethane ia tafare o Saimona ta leprose, hepe aia neinofo ia takai, tafine tasi nimai iai, niamai taganea o alabaster nifonu ane iamosia erefia o nart nomata sore; aia nitafoia taganea, neirigia aia iluga tshana nouru.

⁴Faru tagata iai nifakainina i arotorea iateia, neitucua, Tiaha nitakaroiai ane iamosia hepe nei?

⁵Ma pe fakamata aia, ma nomata tolor forte ma faiv, keitufwa tagata niare ane jimra. Acre nifasao gusgusu iateia.

⁶Iesu neitucage, Natshicina aia; tiaha acowa saciria aia? aia neimna vere erefia iatavau.

⁷Ma tagata niare ane jimra konofo ia acowa nopoge ma nopoge iotshi, ma nopoge ma nopoge pe acowa acitiafakarafia acowa katufwa acre ane; kaia avau sikanofo ia acowa nopoge ma nopoge.

⁸Aia neimna ane iotshi aia tomatua iateia; aia komai mokagi keiamosia tshaku notshino keitanumia aia.

⁹Tamari avau koutucua iacowa, Wehe i iafanua iotshi afasao erefia nei kakova ane nei aia neimna katucua pe tagata senigaro aia.

¹⁰¶ Jutas tatane o Kariot, tasi o acre ta twelv, nifano ia fatoriki o tafare mori, keifakareresia aia acre.

¹¹Nopogera acre nifakarogona, acre nikabisa iateia, neitucage, keitufwa aia mune iateia. Aia nifatshigeia pe aia fakareresia aia iacre.

¹²¶ Nopoge fakatasi o acre anopoge o ta aofa leven jimrai iai, ia nopogera acre nitaia komate ta paska, niana tagata aia nifakairo neitucua iateia, Wehe akoi acitiafakarafia acime kororo ma penpena ta kai pe akoi kakeina ta paska?

¹³Aia nikowna mokagi acre erua o niana tagata aia nifakairo, neitucua iacrawa, Roro akorua ia tumrai sore. iai akorua kafapa ta tane nokamo taganea o tavai, roro wamuri aia akorua.

¹⁴Wehe aia kafano efare, akorua koutucua ia takou sore tsha tafare, Ta Teriki eitucage, Wehe nopito o tafare tagata koromai kowcitia akoi konofo, iai avau kakeina ta paska, ma tshaku tagata avau fakairo?

¹⁵Aia karafia akorua ia nopito sore iluga efare, ane iotshi erefia iai iateia; akorua penpena iai akai iacitia.

¹⁶Niana tagata aia nifakairo niroro efuafo, niromai ia tumrai sore, ma neicitia hepe aia neitucage iacrawa, iai acrawa neipenpena ta paska.

¹⁷Ia tefiafii aia nimai ia ta twelv.

¹⁸Hepe acre nimoi fakatafa nikokai, Iesu neitucage, Tamari avau koutucua iacowa, Tasi o acowa milou kokai ia avau kafakareresia avau.

¹⁹Acre neikamata keiamo arotorea komy iateia, ma keitucua iateia, tasi ma tasi foci, Aia ko avau mo? ma sece, Aia ko avou mo?

²⁰Aia nifasao neitucage iacre, aia tasi o ta twelv kofuia ia ta nasipeia ma avau ia ta taganea.

²¹Ta Nontariki o tagata tamari kofano hepe neiseriace o aia, kaia nokowe ia tatane kafakareresia ta Nontariki o tagata! erefia ia tatane tira pe nana sefarere aia.

²²¶ Hepe acre ma Kokai iai, Iesu niamo aofa, nimori iateia, ma nitoutshia aia neitufwa iacre, neitucage, Amo, kakeina; tenei tshaku notshino.

²³Aia niamo taganea ta kup, nimorice, aia neitufwa iacre, ma acre iotshi neinumia o aia.

²⁴Aia neitucage iacre, Tenei ko tshaku toto o tafasao fou erefia, aia neirigia ma tagata nalupai.

²⁵Tamari avau koutucua iacowa, Avau kanatshicina inumia faru foci tavai o nohua tsha ta vaine, ia taha nopoge avau kanumia aia fou ia tavaka o Atua.

²⁶¶ Wamuri acre nifekece tagoro, acre niroro efuafo ia Taora Olivet.

²⁷Iesu neitucage iacre Acowa iotshi kumtacu ma kanatshicina avau i tupo nei, ma aia neiseriace, Avau katschi aia karafia ta sip, ma ta sip kafura papai.

²⁸Kaia wamuri avau kamasike, avau kafano mokagi acowa ia tafanua Calili.

²⁹Kaia Pitrus neitucage iateia, Pe tagatotshi kumtacu ma kanatshicina akoi, avau senatshicina akoi.

³⁰Iesu neitucage iateia, Tamari avau koutucua iatakoi, ia nopoge nei, ia tupo nei, mokagi tamoa koko tshici erua, akoi katucua tshici toru, akoi puspusi avau.

³¹Kaia aia neitucage foci mukei, Pe avau komate iatakoi, Avau sekanatshicina koutucua avau pupusi akoi. Hepe nei foci acre iotshi neitucua.

³²¶ Acre niromai ia none tasi neigo Cethsemene; aia neitucage niana tagata aia nifakairo, Konofo acowa icunei tari, avau fano kamori.

³³Aia niarafia ia aia Pitrus ma Jakobus ma Joanes, ma neikamata keimasaro sore, ma keimafa ana.

³⁴Aia neitucage iacratou, Tskaku roto komy sore ana ia ta mate; tari acoutou icunei, ma kuara fatshigeia.

³⁵Aia nifano mokagi fakasisi, nito ia takere, nimori iai, pe erefia, our o tupora natshicina aia.

³⁶Aia neitucage, Abba, Tata, akoi tomatua ia ane iotshi avakea taganea kup tenei ia avau, haia jimra hepe avau acitiafakarafia, kaia hepe akoi acitiafakarafia.

³⁷Aia nimai iai, neicitia acre nimero, neitucage ia Pitrus, Saimona akoi komero, mo? akoi kotaru kuara fatshigeia tasi our, mo?

³⁸Fatshigeia acowa mori, mo acowa kororo ia keireresia. Ta nokano tamari tomatua, kaia notshino kotaru.

³⁹Foci aia nifano, nimori, neitucua afasao hepre mokagi.

⁴⁰Iai aia nimai foci, aia neicitia acre nimero foci (ma feimatorea mafa), acre neipuspusi taha keifasao aia.

⁴¹Aia nimai fakatoru, neitucage iacre, komero mukei milou, ma amo kogapu tshowa; kurava milou, ta our komai; kowcitia ta Nontariki o tagata kofakareresia ia norima o tagata isa.

⁴²Masike acoutou acitia kororo; kowcitia, aia fakareresia avau koitata.

⁴³¶ Milowa, hepe aia nifasao, nimai Jutas, tasi o ta twelv, ma aia niarafia tagata nalupai su ia atomatshira palo ma aterakau tokotoko, ia fatoriki o tafare mori, fakou fakairo ma, fakou sore ma.

⁴⁴Aia nifakareresia aia neitucage iacre, nokoutucua, aia avau kasogi, aia tira, apurutshia aia, ma arafiace aia mukei.

⁴⁵¶ Milowa aia nimai iai, aia nifano milowa totonu iateia, neitucage, Teriki, teriki; ma nisogi aia.

⁴⁶Acre nipurutshia aia ia arimore, niarafia aia.

⁴⁷Tasi o acre nikotu itata nitorotshia kace tomatshira palo, neitshi tasi fitshicou o teriki tsha tafare mori nisawace tshana nontariga.

⁴⁸Iesu nifasao neitucage iacre, Acowa koromai watafa mo, hepe keiamo tagata kotshigo, ia atomatshira palo ma aterakau tokotoko keipurutshia avau?

⁴⁹Avau neinofo ia acowa nopoge ma nopoge ia tafare o Ihova nokofakairo, ma acowa sepurutshia avau; kaia anera komai hepe neiseriace i afasao o Ihova.

⁵⁰Acre iotshi natshicina aia ma nifura.

⁵¹Nifano wamuri aia iai tasi atumtane, aia nitoutshi ana nuntafa tumiga lenen, ma agatumtane nipurutshia aia.

⁵²Aia eivetea ma natshicina nuntafa tumiga lenen, ma nitere tshana tumiga nijimra.

⁵³¶ Acre niarafia Iesu ia teriki o tafare mori; ia aia nifetacina iotshi fatoriki o tafare mori, fakou sore ma, fakou fakairo tatapuria ma.

⁵⁴Pitrus nifano wamuri aia papai, ia tafare sore o teriki tsha tafare mori, aia neinofo ia afetshicou nikomuru tshana notshino itata tiafi.

⁵⁵Fatoriki o tafare mori, ma iotshi fakou fakairo afasao arapakou nisasara tagata nikeiro ane isa tsha Iesu keitshi aia komate iateia, kaia acre secitia tasi.

⁵⁶Ma nalupai tagata neitucua afasao korefu iateia, kaia tshare fasao jimra totonu hepe tishana.

⁵⁷Iai faru tagata nimasike, neitucua afasao korefu iateia, nokoutucua.

⁵⁸Acime nifakarogona aia neitucagi avau takaroiai ta fare o Ihova tira arimore neimna, ma ia nopoge toru avau kamna tantaru severe o arimore.

⁵⁹Kaia tshare fasao ma jimra totonu hepe tasi fasao tamari.

⁶⁰Teriki sore o tafare mori nikotu ia roto o acre nifetacina, nifakowia Iesu, nokoutucua, Tiaha akoi natshicina afasao? taha ane iotshi acre kofasosa iatakoi?

⁶¹Kaia aia niavagripana, sefasao, Foci ta teriki o tafare mori nifakowia aia, neitucage iateia, Akoi ta Kristo, ta Nontariki o aia ta Erefia, mo jimra?

⁶²Iesu neitucage, Avau aia; ma acowa kacitia ta Nontariki o tagata nokonofo ia norima matua o tomatua, ma nokomai i apa o taragi.

⁶³Iai ta terikia o tafare mori neifasia tshana miga, neitucage, Tiaha acime acitiafakarafia sece afasao o faruke iateia?

⁶⁴Acowa nifakarogona niana tafasosa tapu; taha acowa kamintua iateia? Acreotshi neitucua erefia kotshi aia komate.

⁶⁵Faru tagata iai neikamata keisavari ia aia, ma keiapotshia niana foimata, keiferpacia aia, ma keitucua iateia, Tucuara fakairo; ma afitshicou niferpacia aia ia noriarima.

⁶⁶¶ Iai Pitrus neinofo iraro ia tafare sore, iai nimai tasi atamafine tsha teriki o tafare mori;

⁶⁷Aia neicitia Pitrus iai nokumuru tshana notshino ia tiafi, aia neicitia mukei aia, ma neitucage, Akoi ma neinofo ia Iesu o Nasareth.

⁶⁸Kaia aia nikovetea, nokoutucua, Avau seiro mana, ma avau puspusi afasao akoi katucage. Aia nifano efuafo ia nopito o tafare tsha ta feitoga; ma tamoa nikoko.

⁶⁹Tasi atamafine neicitia aia foci iai, aia neikamata keifasao iacre nikotu iai, Tenei tasi o acre.

⁷⁰Aia nikovetea foci, Wamuri tira sisi, acre nikotu itata iai neitucua foci ia Pitrus, Tamari akoi tasi o acre; ma akoi tagata o Calili, ma tshou afasao hepra.

⁷¹Kaia aia neikamata keifasosa ma tapu, nokoutucua, Avau puspusi tatane tira acowa kofasao iateia.

⁷²Ta fakarua ta moa nikoko, Pitrus nimentua ta fasao Iesu neitucage, iateia, Mokagi ta moa koko fakarua akoi kavetea avau fakatoru, Iai aia nimentua ta fasao tira aia nitagi.