Read Futuna-Aniwa MARKUS, 15 Bible Online

MARKUS, 15 - Futuna-Aniwa bible

MARKUS, 15

¹MILOWA ia tapopo ta fatoriki o tafare mori nifakatamou acre iotshi fakou sore, fakou fakairo, ma iotshi fakou arapakou keifasao, acre nifousia Iesu nitorotshia aia, ma neitufwa aia ia Pailet.

²Pailet nifakowia aia, Akoi ta Teriki o tagata o Juteia, mo jimra? Aia nikofasao neitucage iateia, Aia akoi neitucage keini.

³Ta fatoriki o tafare mori neitucua ane isa nalupai iateia, kaia aia niforapuana.

⁴Pailet nifakowia aia foci, nokoutucua, Tiaha akoi sefasao? kowcitia ane isa nalupai acre nokoutucua keitakaroiai akoi.

⁵Kaia Iesu foci sefasao iateia neimna Pailet nimasaro iateia.

⁶Ia tacripoga tira aia neitufwa iacre tagata tasi neinofo ia tafare mukei tasi acre nifakowia aia iateia.

⁷Tasi iai neigo Barabus, acre nifousia aia ia faru foci tagata acre ia aia nikofiatu takou sore, ma acre ia aia nikotshi komate tagata nikofiatu.

⁸Tagata nifitacina iai nokotapu fakapalo, neikamata keifakowia aia keimna magane foci hepe tshana magane iacre atau ma tau.

⁹Kaia Pailet nifasao iacre, nokoutucua, Acowa acitiafakarafia avau katufwa iacowa ma eiveteia tavavi o ta Teriki o tagata o Juteia, ma jimra?

¹⁰Ma aia nikeiro ta fatoriki o tafare mori neitufwa aia ia tshare fakainina.

¹¹Kaia ta fatoriki o ta fare mori neimna tagata, neinogia aia evetea tavava o Barabas eitufwa aia iacre.

¹²Pailet nifasao neitucage foci iacre, Acowa acitiafakarafia avau kamna taha ia aia acowa neitapa neigo tshana ta Teriki o tagata o Juteia?

¹³Acre neitapa palo foci, Tucia aia ia tererakou fakaravasia.

¹⁴Iai Pailet neitucage iacre, Tiaha, taha ane isa aia neimna? Acre nitapa fakapalo sore foci ma foci, Tucia aia ia tererakou fakaravasia.

¹⁵Hepra Pailet, neicitiafakarafia keimna arotorea o tagata mugaro iateia, neivetea tavava o Barabas neitufwa aia iacra, ma neitufwa iacre Iesu wamuri aia neitshi aia ia toura, keitucia aia ia tererakou fakaravasia.

¹⁶¶ Tagata o ta towa niarafia aia ia nopito o ta fare neigo Pretoreum, acre nitapa nifetacina iateia iotshi tagata o ta towa.

¹⁷Acre nitakaia aia ia tumiga our oura, nitavisia topurou o asone, neinagi aia kofori tshana nouru.

¹⁸Neikamata keifasao aia, Karofa Teriki o tagatata Juteia.

¹⁹Acre nitshitshi tshana nouru ia tomatshira, nisavari aia nifakaturia enturi nimori aia.

²⁰Iai acre nifakamanace aia, acre amke tumiga ouroura, nitaka aia i tshana tumiga, nitorotshia aia efuafo keitucia aia ia tererakou fakaravasia.

²¹Acre nifakumtakutshia tasi tatane Saimona o fanua Sairina aia nifeke itata, nokomai feke tagarakou papai, ta mana o Aleksanter ma Rufus, keitakoia niana tererakou fakaravasia.

²²Acre niarafia aia ia none neigo Colcotha, nokano neigo tira, Ta none o noipu o tagata.

²³Acre neitufwa aia keinumia weina ma mer repua; kaia aia senumia.

²⁴Acre neitucia aia ia tererakou fakaravasia, acre nitarou tshana umiga, neimna aloti iateia, keifakairo acre taha tumiga tasi tatane ma tasi foci kamo.

²⁵Ia tapopo nopogera ia ta our toru, acre neitucia aia ia tererakou fakaravasia.

²⁶Iai tatapuria nifakairo tshana magane neiseria iluga, TA TERIKI O TAGATA O JUTEIA.

²⁷Ia aia acre neitucia ia tererakou fakaravasia erua foci tagata tshigofia, tasi ia niana norima matua ma tasi foci ia norima masui.

²⁸Acre neimna tira hepe tafasao o Ihova neiseriace, aia neitucage, Nitawa aia ma tagata maganisa.

²⁹Acre nifeke itata neisaciria aia, nitataia tshare nouru, nokoutucua, Kowe! akoi tatane takaroiai ta fare o Ihova, ma keimna tasi foci i nopoge toru.

³⁰Kapare akoi, ma komai iraro ia tererakou fakaravasia.

³¹Hepe amagane tira ma fatoriki o ta fare mori nifakamana, neitucua acre macre ia tagata fakairo, Aia nipare tagata nalupai, kaia aia kotaru keipare aia.

³²Erefia Kristo ta Teriki o tagata o Isreil komai iraro milowa ia tererakou fakaravasia, pe acime kowcitia ma fakarogrogo aia. Erua takou neitucia iai ia tererakou fakaravasia itata ia aia neisaciria aia ma.

³³Iai ta our ono nomai, ta pouri nimai neinofo kofori iotshi fanua ia our iva.

³⁴Ia ta our iva Iesu nitapa ia norio palo, nokoutucua, Eloi, Eloi, lama sabakthani? Nokano o ta fasao tira hepe, Tshaku Atua, tshaku Atua, tiaha akoi natshicina avau?

³⁵Faru o acre nikotu itata iai, acre nifakarogona tira neitucage kowcitia aia nitapa Elaija.

³⁶Tasi nitere nifuia nifonu terimrimu ia venecar, nifousia aia tomatshira neitufwa aia keinumia, nokoutucua Natshicina aia; acitia kacitia pe Elaija komai keiamo aia iraro, mo jimra?

³⁷Iesu nitapa norio palo, ma neitufwa iluga tshana nokano, aia nimate.

³⁸Ta tumega touriapofna nopito tapu o tafare tsha Ihova neifasia ia erua iluga ma ia iraro.

³⁹¶ Iai tatane senturio, aia nikotu itata mokagi aia, neicitia aia nitapa palo ma neitufwa iluga tshana nokano, aia nimate, aia neitucage, Tamari tatane tira ta Nontariki o Atua.

⁴⁰Iai ma faru fafine neicitia papai su, faru o acre, Mere o Mactala, ma Mere ta nana o Jakobus ta sisi, ma Joses, ma Salome;

⁴¹(Acre ma enaia aia neinofo i Calili, niroro wamuri aia niavage aia anea) ma faru foci fafine nalupai niromai ia aia ia Jerusalem.

⁴²¶ Milowa araia fiafi nimai, ianei nipogera nopoge tau, nokano o ta fasao tira, ta nopoge mokagi ta nopoge tapu.

⁴³Josef tatane o Aramathia, aia tatane sore arapakou i afasao, aia ma nitari ia ta vaka o Atua, nimai, aia sumtacu mana ma tomatua nifano ia Pailet, neinogia noaga o Iesu.

⁴⁴Pailet nimasaro pe aia nimate milowa; aia nokotapa iateia ta senturio nifakowia aia pe aia nimate milowa, mo?

⁴⁵Iai aia nikeiro tira o tafasao o senturio, aia neitufwa ta noaga ia Josef.

⁴⁶Aia nifakamata tumiga erefia lenen, amweifo aia iraro, nitakaia aia ia ta lenen, neinagi aia i tupunaga aia nisawace ia tafatu sore, ma nifurusia tafatu tasi ia tafeitoca o tupunaga.

⁴⁷Mere o Mactala, ma Mere ta nana o Joses neicitia wehe acre neinagi aia.